வெதுவெதுப்பான நீரில் நெய் கலந்து குடித்தால் இத்தனை நன்மைகளா..?

பொதுவாக கறிகள் தயாரிப்பிலும், இனிப்புகள் தயாரிப்பிலும் நெய் பரவலாக பயன்படுத்தப்படுகிறது. நெய்யானது உணவுகள் மற்றும் இனிப்புகளின் சுவையை அதிகரிப்பது மட்டுமல்லாமல், பல ஆரோக்கிய நன்மைகளையும் வழங்குகிறது. குறிப்பாக நெய்யை சூடான உணவோடு சேர்த்து சாப்பிட்டால் அற்புதமான சுவையும், பலன்களும் கிடைக்கும் என்கிறார்கள்.

குறிப்பாக தினமும் காலையில் வெதுவெதுப்பான நீரில் நெய் கலந்து குடித்து வந்தால், மேலும் பல அற்புத ஆரோக்கிய பலன்கள் கிடைக்கும் என்று கூறப்படுகிறது. தினசரி காலை வெறும் வயிற்றில் வெதுவெதுப்பான நீரில், நெய் கலந்து குடித்தால் என்ன நன்மைகள் கிடைக்கும் என்பதை இப்போது பார்க்கலாம்.

வெதுவெதுப்பான நீரில் நெய்யை கலந்து குடித்து வருவது சருமம் மற்றும் கூந்தலுக்கும் மிகவும் நல்லது. நெய்யில் இருக்கும் ஆன்டி-ஆக்ஸிடன்ட்கள் மற்றும் வைட்டமின்ஸ்கள் சருமத்தை பளபளப்பாக மாற்றும். மேலும் இந்த கலவை முடி வலுவாகவும் அடர்த்தியாகவும் வளர உதவுகிறது.

தினமும் வெதுவெதுப்பான நீரில் நெய் கலந்து குடிப்பதால் சருமத்தின் நிறம் மேம்படும். மேலும் குடல் அழற்சி குறைந்து செரிமான ஆரோக்கியம் மேம்படுகிறது. மேலும் இந்த பழக்கம் வாயு, மலச்சிக்கல் மற்றும் அசிடிட்டி போன்ற பிரச்சனைகளில் இருந்து நிவாரணம் அளிக்கும் என்றும் கூறப்படுகிறது. குடலைச் சுத்தப்படுத்துவதன் மூலம் உடலில் இருந்து நச்சுகளை அகற்ற இது உதவுகிறது. மேலும் உடலில் சேரும் அதிகப்படியான கொழுப்பை குறைக்கிறது. உடலுக்குத் தேவையான ஆற்றலை தருவதோடு, அதீத பசியை கட்டுப்படுத்துகிறது.

மேலும் நெய்யில் உள்ள ஆரோக்கிய கொழுப்புகள் உடலில் இருக்கும் ஹார்மோன்கள் சமநிலையுடன் இருக்க மிகவும் உதவியாக இருக்கும் என்று கூறப்படுகிறது. பெண்களுக்கு ஏற்படும் மாதவிடாய் பிரச்சனைகளை குறைக்கிறது. தவிர மூட்டு வலியிலிருந்து நிவாரணம் அளிக்கிறது.

நெய்யில் உள்ள சத்துக்கள் உடல் நோய் எதிர்ப்பு சக்தியை பலப்படுத்துகிறது. இதன் மூலம் தொற்றுகள் மற்றும் நோய்களை எதிர்த்துப் போராடும் வலிமையை உடலுக்கு வழங்குகிறது. வெதுவெதுப்பான நீரில் நெய் கலந்து குடிப்பதால் உடலின் வெப்பம் தணியும். இதனால் சளி, இருமல் போன்ற பிரச்சனைகள் தடுக்கப்படும் என்றும் நிபுணர்கள் கூறுகிறார்கள்.