வாட்டர் பாட்டிலில் கெட்ட வாடை? லெமனுடன் கொஞ்சுண்டு பேக்கிங் சோடா; இனி இப்படி வாஷ் செஞ்சு பாருங்க!

அதிகபட்சம் வாட்டர் பாட்டில்களை வாரத்திற்கு ஒரு முறை சோப்பு போட்டு கழுவுவோம். சிலர் தினமும் கூட சோப்பு பயன்படுத்தி கழுவுவார்கள். ஆனால் அதன் உட்புறத்தில் அடிப்பகுதியில் நிறைய அடுக்குகள் சேர்ந்திருக்கும் அதை நாம் ஆழமாக சுத்தம் செய்வதே இல்லை.

அந்த அழுக்குகளில் பாக்டீரியாக்கள் பெருகும்போதுதான் பாட்டில்களில் கறைகள் படிவதோடு மட்டுமல்லாமல் ஒருவித துர்நாற்றமும் வீசும். இது உடலில் பல பிரச்சனைகளை ஏற்படுத்தும். அதனால் உங்கள் குழந்தைகளின் வாட்டர் பாட்டிலையும் சரி, நீங்கள் தினமும் எடுத்துச் செல்லும் பாட்டில்களையும் வாரத்திற்கு ஒரு நாள் கீழ்க்கண்ட வழிமுறைகளில் டீப் கிளீனிங் செய்தால் பாட்டில்கள் புதிது போலவே பளபளவென்று இருக்கும். உட்புறத்தில் உள்ள அழுக்குகள் நீங்கி துர்நாற்றமும் அடிக்காமல் இருக்கும்.

தேவையான பொருள்கள்

பேக்கிங் சோடா - 2 ஸ்பூன், எலுமிச்சை சாறு - 2 ஸ்பூன், வெந்நீர் - 1 லிட்டர் அளவு,

தண்ணீர் அதிக சூடாக இருந்தால் பிளாஸ்டிக் பாட்டில்கள் உருகி விடும். அதனால் மிதமான சூட்டில் வைத்துக் கொள்ளுங்கள். ஸ்டீல் பாட்டில், பிளாஸ்டிக் பாட்டில் இரண்டையுமே இந்த முறையில் சுத்தம் செய்ய முடியும். பாட்டிலில் 1-2 ஸ்பூன் அளவு பேக்கிங் சோடாவை போட்டு அதில் எலுமிச்சை சாறையும் பிழிந்து விட்டு, அதை அப்படியே 2-5 நிமிடங்கள் விட்டுவிடுங்கள். பிறகு வெதுவெதுப்பான நீரை பாட்டில் முழுவதும் ஊற்றுங்கள். அப்படியே அரை மணி நேரம் முதல் ஒரு மணி நேரம் வரை விட்டுவிடுங்கள்.

சாறு பிழிந்து விட்டு அந்த எலுமிச்சை தோலை கீழே தூக்கி வீசாதீங்க. அதை வைத்து இன்னும் சூப்பராக சுத்தம் செய்யலாம். பாட்டிலை சுத்தம் செய்தாலும் அதன் மூடிகளைப் பற்றி நாம் கவலைப்படுவதே இல்லை. அதற்கு இந்த எலுமிச்சை தோல் பயன்படும். எலுமிச்சை பழத்தின் தோலால் வாட்டர் பாட்டிலின் மூடியின் வெளிப்புறம் மற்றும் உட்புறத்தில் இருக்கும் அழுக்குகளையும் பாக்டீரியாக்களையும் நீக்க பயன்படுத்த முடியும்.

அரை மணி நேரம் வெந்நீர், பேக்கிங் சோடா கலவையில் ஊறியிருக்கும் பாட்டிலில் உள்ள தண்ணீரை முக்கால் வாசி அளவு கீழே ஊற்றி விடுங்கள். பாட்டில் கழுவும் பிரஷ்ஷைக் கொண்டு நன்கு தேய்த்துக் கழுவுங்கள். தேவைப்பட்டால் கொஞ்சம் சோப் லிக்விடு சேர்த்து நன்கு தேய்த்துக் கழுவுங்கள். பின்பு இரண்டு, மூன்று நன்கு தண்ணீர் ஊற்றி பாட்டிலை கழுவினால் சுத்தமாக அழுக்குகள் மற்றும் துர்நாற்றம் நீங்கியிருக்கும்.