நடிகை முதல் முதல்வர் வரை; ஜெயலலிதா அன்சீன் போட்டோஸ்!

தமிழ்நாட்டில் அசைக்க முடியாத அரசியல் சக்தியாக வலம் வந்தவர் முன்னாள் முதலமைச்சர் ஜெயலலிதா. அ.தி.மு.க எனும் மாபெரும் கட்சியை தனது கட்டுக்குள் வைத்திருந்தார். 5 முறை தமிழகத்தின் முதல்வராக அரியணை ஏறிய, மக்களுக்காக ஏராளமான திட்டங்களை கொண்டு வந்தார். இந்த செய்தி தொகுப்பில் ஜெயலலிதாவின் அரிய புகைப்படங்களை பார்க்கலாம்.

தனது முன்னோடி எம்.ஜி. ராமச்சந்திரனைப் போலவே (எம்.ஜி.ஆர்) சினிமா மூலமும் ரசிகர்கள் மனதில் நீங்க இடம் பிடித்த அவர், கர்நாடகாவின் மைசூரில் பிறந்தவர். ஜெயலலிதா தனது 15 வயதில், 1964 ஆம் ஆண்டு சின்னதா கோம்பே என்ற கன்னட திரைப்படத்துடன் தனது திரைப்பட வாழ்க்கையைத் தொடங்கினார்.

ஜெயலலிதா பாரம்பரிய இசை, மேற்கத்திய பாரம்பரிய பியானோ மற்றும் பரதநாட்டியம், மோகினியாட்டம், மணிப்பூரி மற்றும் கதக் உள்ளிட்ட பல்வேறு வகையான பாரம்பரிய நடனங்களில் பயிற்சி பெற்றார்.

எம்.ஜி.ஆரைத் தவிர, ஜெயலலிதா மற்றொரு உச்ச நடிகரான சிவாஜி கணேசனுடனும் நடித்தார். இவர்களின் நடிப்பில் வெளிவந்த தெய்வ மகன், சிறந்த வெளிநாட்டு மொழிக்கான அகாடமி விருதுக்காக இந்தியாவால் பரிந்துரைக்கப்பட்ட முதல் தமிழ்த் திரைப்படமானது.

தமிழ்த் திரையுலகில் 'அம்மு'-வாக வலம் வந்த ஜெயலலிதா, பின்னாளில் கட்சித் தொண்டர்களாக 'அம்மா' என அழைக்கப்பட்டார். அவருக்கு அரசியல் அறிமுகத்தை கொடுத்தார் எம்.ஜி.ஆர். அகில இந்திய அண்ணா திராவிட முன்னேற்றக் கழகத்தை அ.இ.அ.தி.மு.க-வை நிறுவி, ஜெயலலிதாவை அரசியலுக்கு அறிமுகப்படுத்தியவர் எம்.ஜி.ஆர் தான்.

எம்.ஜி.ஆரின் மறைவுக்குப் பிறகு 1991-ல் ஆட்சியைப் பிடித்த ஜெயலலிதா, 1996 ஆம் ஆண்டு நடைபெற்ற தேர்தலில் அவரின் தலைமையிலான அ.தி.மு.க படுதோல்வியடைந்தது. ஜெயலலிதாவால் தனது பதவியையும் தக்க வைத்துக் கொள்ள முடியவில்லை. ஆனால், மீண்டும் 2001 ஆம் ஆண்டு இரண்டாவது முறையாக முதல்வரானார்.

2011 ஆம் ஆண்டு ஜெயலலிதா மூன்றாவது முறையாக மீண்டும் ஆட்சிக்கு வந்தார். 2014 ஆம் ஆண்டு, 18 வருடங்களாக நடந்த சொத்து குவிப்பு வழக்கில் அவருக்கு நான்கு ஆண்டுகள் சிறைத்தண்டனை விதிக்கப்பட்டது. எனினும், 2015 ஆம் ஆண்டு வழக்கில் ஜெயலலிதா விடுதலை செய்யப்பட்டு மீண்டும் பதவிக்கு வந்தார். இதன்பின்னர், 2016 ஆம் ஆண்டு தேர்தலில் ஜெயலலிதா மீண்டும் வெற்றி வாகை சூடினார். எம்.ஜி.ஆருக்குப் பிறகு தொடர்ந்து முதலமைச்சராகப் பதவி வகித்த இரண்டாவது முதல்வர் என்கிற பெருமையைப் பெற்றார்.

அம்மா, புரட்சித் தலைவி என அழைக்கப்பட்ட ஜெயலலிதா டிசம்பர் 6, 2016 ஆம் ஆண்டில் உடல்நலக்குறைவால் காலமானார். தனது 68 வயதில் இம்மண்ணை விட்டு அவர் மறைந்தாலும், அவரது ஆதரவாளர்கள் மத்தியில் அவரின் நினைவுகள் நீங்கா அலைகளாக உள்ளன.