பூ கட்டத் தெரியாதவங்க கவலையே பட வேண்டாம்; ஒரே நாளில் ஈசியா பழக ஒரு வாட்டர் பாட்டில் போதும்!

பூக்களைப் பிடிக்காத பெண்கள் இருக்க வாய்ப்பு இல்லை. ஆனால், பூவைச் சூடிக்கொள்ளும் பெண்கள் நிறைய பேருக்கும் பூ கட்டத் தெரிவதில்லை. பூ கட்டுவதில் ஆண்கள் என்ன, பெண்கள் என்ன? பூ கட்ட அனைவருக்கும் தெரிந்திருக்க வேண்டும். 

பூ கடையில் கட்டிய பூக்களை வாங்குவதைவிட உதிரி பூக்களை வாங்கி வந்து வீட்டீல் நீங்களே பூ கட்டினால் அதிகமாக பூ கிடைக்கும். அடர்த்தியாகவும் இருக்கும். ஆனால், பலரும் பூ கட்டத் தெரியாததால் கடைகளில் பூக்களை வாங்கி வந்து வீடுகளில் கட்டுகிறார்கள். உங்களுக்கு பூ கட்டத் தெரியவில்லை என்று கவலைப்பட வேண்டாம். இந்த டிப்சைப் பயன்படுத்தி, ஒரே நாளில் ஈசியாக பூ கடப் பழகலாம். 

நீங்கள் ஒரே நாளில் ஈஸியாக பூ கட்டிப் பழக ஒரு வாட்டர் பாட்டில் போதும். என்னது வாட்டர் பாட்டில் பயன்படுத்தி பூ கட்ட முடியுமா என்று கேட்கிறீர்களா? ஆம் வாட்டர் பாட்டில் பயன்படுத்தி நம்மால் பூ கட்ட முடியும். 

ஒரு வாட்டர் பாட்டில் எடுத்துக்கொள்ளுங்கள், பூ கட்டுவதற்கான நூல் எடுத்துக்கொள்ளுங்கள், கட்டுவதற்கான பூக்களையும் எடுத்துக்கொள்ளுங்கள். நூலை இருபக்கமும் சரிசம அளவில் வாட்டர் பாட்டிலைச் சுற்றி முடிச்சு போடுங்கள். இப்போது அந்த முடிச்சுக்கு நடுவே ஒரு பூவையும் தலைகீழாக ஒரு பூவையும் வைத்து இடது புறம் இருக்கும் நூலை எடுத்து வலது புறம் இருக்கும் நூல் மீது போடுங்கள். அப்படியே இடதுபக்கம் இருக்கும் நூலை உள்பக்கம் வழியாக வெளியே எடுத்து, முடிச்சு போட்டால் அந்த பூ கட்டப்பட்டு விடும். அப்படியே, நீங்கள் இன்னொரு அடுக்கு பூவை வைத்து இப்படியே அடர்த்தியாக பூக் கட்டலாம். இப்படி பூ கட்டி பழகலாம்.