கேள்வி - பதில் நேரம்: இந்தியாவின் டாப் 5 பழமையான ரயில் நிலையங்கள் எவை தெரியுமா? இந்த லிஸ்ட்ல சென்னையின் முக்கிய ஏரியா இருக்கு!

இந்தியாவின் ரயில்வே வலையமைப்பு நாட்டின் அத்தியாவசியப் போக்குவரத்து சாதனமாக மட்டுமின்றி, ஆழமான கலாச்சார மற்றும் வரலாற்று முக்கியத்துவத்தையும் கொண்டுள்ளது. இவற்றில் பல ரயில் நிலையங்கள் பிரிட்டிஷ் காலனித்துவ காலத்தைச் சேர்ந்தவை. அதன்படி, இந்தியாவிலேயே பழமையான டாப் 5 ரயில் நிலையங்களின் பட்டியலை இந்தப் புகைப்பட தொகுப்பில் காணலாம்.

சத்ரபதி சிவாஜி டெர்மினஸ், மும்பை (1853) முன்னர் விக்டோரியா டெர்மினஸ் என்று அழைக்கப்பட்ட சத்ரபதி சிவாஜி டெர்மினஸ், இந்தியாவின் மிகப் பழமையான ரயில் நிலையம் என்ற பெருமையைப் பெறுகிறது. ஃபிரடெரிக் வில்லியம் ஸ்டீவன்ஸ் என்பவரால் வடிவமைக்கப்பட்ட இதன் கட்டுமானம் 1878 இல் தொடங்கி 1887 இல் நிறைவடைந்தது. ஆரம்பத்தில் ராணி விக்டோரியாவின் பொன்விழாவைக் கொண்டாடும் வகையில் அவருக்குப் பெயரிடப்பட்டது. பின்னர் 1996 இல் மராட்டிய வீர மன்னர் சிவாஜியைக் கௌரவிக்கும் வகையில் சிவாஜி பெயரிலும், 2017 இல் சத்ரபதி சிவாஜி மகாராஜ் டெர்மினஸ் என்றும் பெயர் மாற்றப்பட்டது. இது யுனெஸ்கோ உலக பாரம்பரிய தளமாக அங்கீகரிக்கப்பட்டுள்ளதுடன், மும்பையின் கட்டிடக்கலை செழுமை மற்றும் வரலாற்று முக்கியத்துவத்தின் அடையாளமாகவும் திகழ்கிறது.

ஹவுரா ஜங்ஷன், கொல்கத்தா (1854) ஹவுரா ஜங்ஷன், அல்லது ஹவுரா நிலையம் என்று அழைக்கப்படும் இது, இந்தியாவின் பழமையான மற்றும் பரபரப்பான ரயில் நிலையங்களில் ஒன்றாகும். மேற்கு வங்காளத்தின் கொல்கத்தாவில் அமைந்துள்ள இது 1854 இல் நிறுவப்பட்டது. இதன் மூலம் நாட்டின் இரண்டாவது பழமையான ரயில் நிலைய வளாகமாக இது திகழ்கிறது. கிழக்கு ரயில்வேயால் இயக்கப்படும் ஹவுரா ஜங்ஷன் 23 நடைமேடைகளைக் கொண்டுள்ளது. இது கொல்கத்தாவை இந்தியாவின் பிற முக்கிய நகரங்கள் மற்றும் பகுதிகளுடன் இணைக்கும் ஒரு முக்கியப் போக்குவரத்து மையமாகச் செயல்படுகிறது.

ராயபுரம் ரயில் நிலையம், சென்னை (1856) ராயபுரம் ரயில் நிலையம், இந்தியாவின் மூன்றாவது பழமையான செயல்பாட்டில் உள்ள ரயில் நிலையம் மற்றும் தென்னிந்தியாவின் மிகப் பழமையான ரயில் நிலையம் என்ற தனித்துவத்தைப் பெறுகிறது. சென்னையில் அமைந்துள்ள இது, ஜூன் 1856 இல் செயல்படத் தொடங்கியது. 1922 வரை மதராஸ் மற்றும் தெற்கு மகாராஷ்டிரா ரயில்வேயின் தலைமையகமாக இது செயல்பட்டது. நான்கு நடைமேடைகளுடன், ராயபுரம் இன்றும் சென்னையின் புறநகர் ரயில்வே வலையமைப்பில் குறிப்பிடத்தக்க பங்கை வகிக்கிறது.

கான்பூர் சென்ட்ரல், உத்தரப் பிரதேசம் (1859) கான்பூர் சென்ட்ரல், ஆரம்பத்தில் கான்பூர் பேரக்ஸ் நிலையம் என்று அழைக்கப்பட்டது. இது 1859 இல் நிறுவப்பட்டது. இது உத்தரப் பிரதேசத்தின் கான்பூரில் உள்ள ஒரு முக்கிய ரயில் நிலையமாகச் செயல்படுகிறது. இது வட மத்திய ரயில்வேயால் இயக்கப்படுகிறது. கான்பூர் சென்ட்ரல், உத்தரப் பிரதேசத்தின் பல்வேறு பகுதிகளை வட மற்றும் கிழக்கு இந்தியாவுடன் இணைக்கும் ஒரு முக்கியமான சந்திப்பு நிலையமாகும்.

அலகாபாத் ஜங்ஷன், உத்தரப் பிரதேசம் (1859) 1859 இல் நிறுவப்பட்ட அலகாபாத் ஜங்ஷன், உத்தரப் பிரதேசத்தின் பழமையான மற்றும் பரபரப்பான ரயில் நிலையங்களில் ஒன்றாகும். அலகாபாத்தில் (தற்போது பிரயாக்ராஜ்) அமைந்துள்ள இது, கும்பமேளா மற்றும் பிற மத நிகழ்வுகளுக்கு வரும் யாத்ரீகர்களுக்கு ஒரு முக்கியமானப் போக்குவரத்து மையமாகச் செயல்படுகிறது.