'அவரு டார்லிங்'... விஜய் குறித்த கேள்விக்கு மனு பாக்கர் ஜாலி டாக்

பாரிஸ் ஒலிம்பிக் பெண்களுக்கான துப்பாக்கி சுடுதல் 10 மீ ஏர் பிஸ்டல் பிரிவில் இந்தியாவிற்கு முதல் பதக்கத்தை வென்று கொடுத்தவர் மனு பாக்கர். 3-வது இடம் பிடித்த அவர் வெண்கலப் பதக்கம் வென்றார். இதே போல், கலப்பு இரட்டையர் 10 மீ ஏர் பிஸ்டல் பிரிவிலும் வெண்கலப் பதக்கம் வென்று சாதனை படைத்தார்.

இந்நிலையில், சென்னையில் நடைபெற்ற 'வேலம்மாள்'ஸ் விஷன் ஃபார் ஒலிம்பிக் மெடல் 2032' நிகழ்வில் இந்தியாவின் ஒலிம்பிக் பதக்க நாயகி மனு பாக்கர் கலந்துகொண்டார். இந்த நிகழ்வின் போது அவர் மாணவ - மாணவியர் மத்தியில் உரையாற்றினார்.

அப்போது, மனு பாக்கரிடம், மாணவி ஒருவர், “தமிழ்நாடு குறித்து நான் சில கேள்விகளைக் கேட்கிறேன். உங்களுக்கு அது குறித்து தெரியுமா என்பதைச் சொல்லுங்கள்” என்றார். அதற்கு மனு பாகர் ஒப்புக்கொண்டதும், “பொங்கல் சாப்பிட்டது உண்டா?” என கேட்டார். அதற்கு அவர், “நான் சாப்பிட்டுள்ளேன் என்று தான் நினைக்கிறேன். எனக்கு தென்னிந்திய உணவுகள் மிகவும் பிடிக்கும்” என்று கூறினார்.

மனு பாக்கரிடம், “மகாபலிபுரம் குறித்து கேள்விப்பட்டுள்ளீர்களா?” என்று கேட்கப்பட்ட நிலையில், “எனக்கு அதுபற்றி பெரிய அளவில் தெரியாது” என்றார். “மீனாட்சி அம்மன் கோயில் தெரியுமா?”, “எங்கள் முதல்வர் ஸ்டாலினை கேள்விப்பட்டுள்ளீர்களா?” என கேட்ட கேள்விகளுக்கு சிரிப்புடன் நழுவினார்.

மேலும், மனு பாக்கரிடம்,“செஸ் வீரர் பிரக்ஞானந்தா தெரியுமா?”, “கண்டிப்பாக தெரியும். அவரை நேரில் பார்த்திருக்கிறேன்” என்றார். இறுதியாக, “பிரபல நடிகர் விஜய் தெரியுமா?” என்ற கேட்டதற்கு மனு பாக்கர், “தெரியும். அவர் டார்லிங்” என்று ஜாலியாக பதிலளித்தார். இந்நிலையில், நடிகர் விஜய் குறித்து மனு பாக்கர் பேசியது தொடர்பான வீடியோ சமூக வலைதளங்களில் வைரலாகி வருகிறது.

சுதந்திரத்திற்குப் பிறகு, ஒரே ஒலிம்பிக்கில் இரண்டு பதக்கங்களை வென்ற முதல் தடகள வீராங்கனை என்கிற சாதனையை மனு பாக்கர் படைத்தார் என்பது குறிப்பித்தக்கது.