வேப்பம் பூ முதல் முருங்கை பராத்தா, கிச்சடி வரை: 75 வயசுலயும் மோடி எனர்ஜியா இருக்க இந்த டயட் தான் காரணம்

உண்ணா நோன்பின் மகத்துவம்:

சமீபத்தில் பிரபலமான லெக்ஸ் ஃபிரிட்மேன் (Lex Fridman) பாட்காஸ்ட் நேர்காணலில், தனது உடற்தகுதி மற்றும் அன்றாட உணவுப் பழக்கங்கள் குறித்துப் பேசிய மோடி, "உண்ணா நோன்பு என்னை ஒருபோதும் மெதுவாக்குவதில்லை. வழக்கம்போல் நான் என் வேலைகளைச் செய்வேன். சில சமயங்களில் அதைவிட அதிகமாகவும் உழைப்பேன். மேலும், உண்ணா நோன்பு இருக்கும்போது என் எண்ணங்கள் எங்கிருந்து வருகின்றன, எப்படி அவை சீராகப் பாய்கின்றன என்பது குறித்து நான் ஆச்சரியப்படுகிறேன். இது ஒரு அற்புதமான அனுபவம். உண்ணா நோன்பு எனக்கு பக்தி, அது எனக்கு சுய ஒழுக்கம்" என்று உணர்ச்சிபூர்வமாகத் தெரிவித்தார்.

ஒரு வேளை உணவு:

அதே பாட்காஸ்ட் நேர்காணலில், சாதுர்மாஸ் (Chaturmas) என்ற பாரம்பரியம் தனது உணவுப் பழக்கம் மற்றும் உடற்தகுதியை எப்படி வரையறுக்கிறது என்றும் அவர் குறிப்பிட்டார். "ஜூன் நடுப்பகுதிக்கும் நவம்பருக்கும் இடைப்பட்ட இந்த நான்கு முதல் நான்கரை மாதங்களுக்கு, நான் 24 மணி நேரத்தில் ஒரு வேளை மட்டுமே சாப்பிடும் இந்த பாரம்பரியத்தைப் பின்பற்றுகிறேன்" என மோடி கூறினார். இந்த கடுமையான பழக்கம், உடலின் செரிமான மண்டலத்தை ஓய்வெடுக்கச் செய்து, உடலை புத்துணர்ச்சியுடன் வைத்திருக்க உதவுகிறது.

வெந்நீர் பழக்கம்:

பிரதமர் மோடியின் மற்றுமொரு ஆரோக்கிய ரகசியம், வெந்நீர் குடிப்பது. குறிப்பாக, ஷர்திய நவராத்திரி சமயத்தில், உணவை முழுமையாகத் தவிர்த்து, வெறும் வெந்நீர் மட்டுமே அருந்துவதாகக் கூறினார். "வெந்நீர் குடிப்பது எனது அன்றாட வழக்கத்தின் ஒரு பகுதியாக எப்போதும் இருந்து வருகிறது. எனது கடந்தகால வாழ்க்கை முறை, இந்த பழக்கத்தை காலப்போக்கில் இயல்பாகவே உருவாக்கியது" என்று குறிப்பிட்டார். வெந்நீர் அருந்துவது செரிமானத்தை மேம்படுத்துவதுடன், உடலை நச்சுத்தன்மையிலிருந்து சுத்தப்படுத்தவும் உதவுகிறது.

முருங்கை பராத்தா:

பிரதமர் மோடி தனது இன்ஸ்டாகிராம் ரீல் வீடியோ ஒன்றில், முருங்கை பராத்தா மீது தனக்கு இருக்கும் விருப்பத்தைப் பற்றிப் பேசியுள்ளார். ஆன்டிஆக்ஸிடன்ட்கள் நிறைந்த முருங்கை இலைகள், நோய்த்தொற்றுகள் மற்றும் ஆக்ஸிஜனேற்ற அழுத்தத்திலிருந்து உடலைப் பாதுகாக்கின்றன. மேலும், இவை கொலஸ்ட்ராலைக் குறைக்கவும், இரத்த அழுத்தத்தைக் கட்டுக்குள் வைத்திருக்கவும் உதவுகின்றன. நார்ச்சத்து நிறைந்த முருங்கை, குடல் ஆரோக்கியத்தை மேம்படுத்துவதுடன், மலச்சிக்கலைத் தடுக்கவும், நினைவாற்றலை அதிகரிக்கவும், மன அழுத்தத்தைக் குறைக்கவும் துணைபுரிகிறது.

ஆயுர்வேத உணவுப் பிரியர்!

2021-ல் அவர் வெளியிட்ட இன்ஸ்டாகிராம் பதிவின்படி, பிரதமர் மோடி ஆயுர்வேத உணவுகளை விரும்பி உண்பவர். வேப்பம் பூ, வேப்ப இலைகள் மற்றும் கற்கண்டு (Mishri) ஆகியவற்றை அவர் அடிக்கடி உட்கொள்கிறார். வேப்ப இலைகள் மருத்துவ குணங்கள் நிறைந்தவை. இது போன்ற பாரம்பரிய உணவுகள், உடலின் சமநிலையைப் பேணி, நோய் எதிர்ப்பு சக்தியை மேம்படுத்துகின்றன.

கோதுமைப் பராத்தாவிலிருந்து கிச்சடி வரை!

சமீக காலமாக பிரதமர் மோடி, முழு கோதுமை பராத்தாவுக்குப் பதிலாக, கேழ்வரகு, முருங்கை, வெந்தயம் போன்ற சத்து நிறைந்த உணவுப் பொருட்களைச் சேர்த்துக்கொள்ளத் தொடங்கியுள்ளார். அத்துடன், அவர் கிச்சடியின் தீவிர ரசிகர். அவரது சமூக வலைத்தளப் பதிவுகள், ஆரம்ப நாட்களில் அவர் பெரும்பாலும் எளிய, இதமான, சத்தான பருப்பு மற்றும் அரிசி கலந்த கிச்சடியை விரும்பிச் சமைத்து உண்டதை வெளிப்படுத்துகின்றன. மஞ்சள் மற்றும் நெய் சேர்த்து சமைக்கப்படும் இந்த கிச்சடி, அத்தியாவசிய வைட்டமின்கள், தாதுக்கள் மற்றும் ஆன்டிஆக்ஸிடன்ட்கள் நிறைந்தது. இது கார்போஹைட்ரேட் (அரிசி) மற்றும் புரதத்தின் (பருப்பு) சரியான கலவையாகும். ஆயுர்வேதத்திலும், விரதம் அல்லது உடல்நலக்குறைவின் போது செரிமான அமைப்பைச் சுத்தப்படுத்த இந்த கிச்சடி பரிந்துரைக்கப்படுகிறது.

குஜராத்தி உணவுகள்!

சின்னச் சின்ன நொறுக்குத் தீனிகளாக, அவர் குஜராத்தி உணவான தோக்லாவை (Dhokla) விரும்பி உண்கிறார். கடலை மாவு, ரவை, மஞ்சள் மற்றும் உப்பு ஆகியவற்றால் செய்யப்படும் இந்த மென்மையான, பஞ்சு போன்ற, சுவையான தோக்லா, ஆவியில் வேகவைக்கப்படுகிறது. இது இரும்பு, மெக்னீசியம், ஃபோலேட் மற்றும் வைட்டமின் B6 போன்ற ஊட்டச்சத்துக்களைக் கொண்டுள்ளது. குறைந்த கிளைசெமிக் குறியீடு கொண்ட தோக்லா, சர்க்கரை நோயாளிகளுக்கு ஏற்றது. மேலும், இதில் உள்ள அதிக நார்ச்சத்து, கொலஸ்ட்ராலைக் குறைத்து செரிமானத்தை மேம்படுத்த உதவுகிறது.

ஒட்டுமொத்தமாக, பிரதமர் நரேந்திர மோடியின் உணவுப் பழக்கங்கள், வெறும் உணவுக்கான தேர்வுகள் மட்டுமல்ல, அவை ஆரோக்கியமான, ஒழுக்கமான வாழ்க்கை முறையின் பிரதிபலிப்புகளாகும். அவரது உணவு ரகசியங்கள், எளிய, பாரம்பரிய மற்றும் இயற்கை உணவுகளைப் பின்பற்றுவதன் மூலம், நாமும் எப்படி நீண்ட காலத்திற்கு ஆரோக்கியமாகவும், சுறுசுறுப்பாகவும் இருக்க முடியும் என்பதற்கான ஒரு பாடமாக அமைகின்றன.