இறுதிவரை பரபரப்பு... கடைசி வாய்ப்பில் வெயிட் காட்டிய நீரஜ் சோப்ரா!

ஜப்பான் தலைநகர் டோக்கியோவில் நடந்த 2020 ஒலிம்பிக் போட்டியில் ஆடவருக்கான ஈட்டி எறிதலில் 87.58 மீட்டர் தூரம் வரை எறிந்து தங்கம் வென்று வாகை சூடினார் இந்திய வீரர் நீரஜ் சோப்ரா.

இந்த ஆண்டு பிரான்ஸ் தலைநகர் பாரிஸில் நடந்த ஒலிம்பிக்கில் நீரஜ் சோப்ரா களமாடிய நிலையில், அவர் மீண்டும் தங்கம் வெல்வார் என பலரும் எதிர்பார்த்தனர்.

ஆனால், 89.45 மீ தூரம் வரை மட்டுமே அதிகபட்சமாக வீசிய அவர் பாகிஸ்தானின் அர்ஷத் நதீமிடம் (92.97 மீ) தங்கப் பதக்கத்தை பறிகொடுத்தார். இது இந்திய ரசிகர்களிடையே பெரும் சோகத்தை ஏற்படுத்தியது.

இந்த சூழலில் தான், சுவிட்சர்லாந்தின் லொசேன் நகரில் டயமண்ட் லீக் 2024 போட்டிகள் நடந்து வருகிறது. இதில் களமாடிய நீரஜ் சோப்ரா முதல் வாய்ப்பில் 82.10 மீட்டர் தூரம் மட்டுமே ஈட்டியை எறிந்தார்.

இதன்பின், தனது 2-வது வாய்ப்பில் 83.21 மீட்டர் தூரம் ஈட்டியை எறிந்து 4வது இடத்தில் இருந்தார். 3-வது வாய்ப்பில் அவர் 83.13 மீட்டர் தூரம் மட்டுமே வீசினார்.

நீரஜ் சோப்ராவை விட ஒலிம்பிக் தொடரில் வெண்கலப் பதக்கம் வென்ற ஆண்டர்சன் பீட்டர்ஸ் 88.49 மீட்டர் தூரம் வீசி முதலிடத்திலும், ஜெர்மனியின் ஜூலியன் வெப்பர் 87.08 மீட்டர் தூரம் வீசி -2வது இடத்திலும், உக்ரைனைச் சேர்ந்த ஆர்தர் 83.38 மீட்டர் தூரம் வீசி 3-வது இடத்தில் இருந்தனர்.

தொடர்ந்து தனது 4-வது வாய்ப்பில் நீரஜ் சோப்ரா 82.34 மீட்டர் தூரம் வரை மட்டும் வீசியது பெரும் அதிர்ச்சியை ஏற்படுத்தியது. ஏனென்றால், அவருக்கு இன்னும் ஒரேயொரு வாய்ப்பு மட்டுமே இருந்தது. அதில் டாப் 3 இடங்களை பிடிக்கவில்லை என்றால், அவருக்கு 6 முறை வீசுவதற்கான வாய்ப்பு கிடைக்காது.

இந்த நிலையில், தனது 5வது வாய்ப்பில் நீரஜ் சோப்ரா 85.58 மீட்டர் தூரம் வீசி டாப் 3 இடங்களுக்குள் அதிரடியாக முன்னேறினார். அதேநேரத்தில், ஆண்டர்சன் பீட்டர்ஸ் தனது கடைசி வாய்ப்பில் 90.61 மீட்டர் தூரம் ஈட்டியை எறிந்து ஆச்சரியம் அளித்தார்.

இதனால் நீரஜ் சோப்ரா தனது கடைசி வாய்ப்பில் 90 மீட்டர் தூரத்தை எட்டி சாதிப்பாரா என்ற எதிர்பார்ப்பு ஏற்பட்டது. கடைசி வாய்ப்பில் நீரஜ் சோப்ரா ஈட்டியை எறிந்து விட்டு ஆக்ரோஷமான சத்தத்தை எழுப்பினார். அவர் வீசிய ஈட்டி 89.49 மீட்டர் தூரம் சென்றது.

இதன் மூலம் டைமண்ட் லீக் தொடரிலும் நீரஜ் சோப்ரா வெள்ளிப் பதக்கம் வென்று சாதனை படைத்துள்ளார். தங்கப் பதக்கத்தை ஆண்டர்சன் பீட்டர்ஸ் கைப்பற்றினார். ஜெர்மனியின் ஜூலியன் வெப்பர் வெண்கலம் வென்று அசத்தினார்.