ஜெட் வேகத்தில் செல்லும் நீரஜ் சோப்ரா பிராண்ட் மதிப்பு... மனு பாக்கருக்கு எவ்வளவு தெரியுமா?

பாரிஸ் ஒலிம்பிக் ஆடவர் ஈட்டி எறிதலில் இந்திய வீரர் நீரஜ் சோப்ரா வெள்ளி வென்றார். இதன்மூலம், சுதந்திர இந்தியாவில் ஒலிம்பிக் தடகளத்தில் தொடர்ச்சியாக 2 பதக்கங்கள் (2020 டோக்கியோ - தங்கம், 2024 பாரிஸ் - வெள்ளி) வென்ற முதல் இந்தியர் ஆனார்.

பெண்களுக்கான துப்பாக்கி சுடுதல் 10 மீ ஏர் பிஸ்டல் பிரிவில் இந்தியாவிற்கு முதல் பதக்கத்தை வென்றவர் மனு பாக்கர். 3-வது இடம் பிடித்து வெண்கலப் பதக்கம் வென்று அசத்தினார். மேலும், கலப்பு இரட்டையர் 10 மீ ஏர் பிஸ்டல் பிரிவிலும் வெண்கலப் பதக்கம் வென்று சாதனை படைத்தார்.

இந்நிலையில், பாரிஸ் ஒலிம்பிக் ஆடவர் ஈட்டி எறிதலில் வெள்ளிப் பதக்கம் வென்ற இந்திய வீரர் நீரஜ் சோப்ராவின் பிராண்ட் மதிப்பு பல மடங்கு உயர்ந்துள்ளது.

நீரஜ் சோப்ராவின் பிராண்ட் மதிப்பு 29.6 மில்லியன் முதல் 40 மில்லியன் அமெரிக்க டாலர்கள் இருக்குமாம். அதாவது, இந்திய ரூபாயில் தோராயமாக ரூ. 330 கோடி எனக் கணக்கிடப்பட்டுள்ளது.

நீரஜ் சோப்ராவின் பிராண்ட் மதிப்பு பாரிஸ் ஒலிம்பிக்கிற்கு முன்பு வரை இந்திய கிரிக்கெட் ஆல்-ரவுண்டர் ஹர்திக் பாண்டியாவின் மதிப்புக்கு இணையாக இருந்தது. ஆனால் இப்போது பிராண்ட் மதிப்பில் நீரஜ் ஹர்திக்கை முந்துவார் என எதிர்பார்க்கப்படுகிறது.

இதேபோல், பாரிஸ் ஒலிம்பிக் துப்பாக்கி சுடுதலில் 2 வெண்கலப் பதக்கம் வென்ற மனு பாக்கரின் பிராண்ட் மதிப்பும் அதிரடியாக அதிகரித்துள்ளது.

22 வயதான மனு பாக்கர் குளிர்பான பிராண்டான தம்ஸ்அப் உடன், 1.5 கோடி ரூபாய் மதிப்பிலான பிராண்ட் அங்கீகார ஒப்பந்தத்தில் சமீபத்தில் கையெழுத்திட்டுள்ளார்.

பாரிஸ் ஒலிம்பிக் போட்டிக்கு முன் மனு பாக்கரின் ஒப்புதல் கட்டணம் ஆண்டுக்கு ஒரு ஒப்பந்தத்திற்கு சுமார் 25 லட்சமாக இருந்தது. தற்போது அது கணிசமாக உயர்ந்துள்ளது. சமீபத்தில், சுமார் 40 பிராண்டுகள் மனு பாக்கர் உடன் ஒப்பந்தம் போட அணுகியுள்ளனர்.

பாரிஸ் ஒலிம்பிக்கில் பதக்கம் வெல்லவில்லை என்றாலும், தனது சிறப்பான செயல்திறனை மல்யுத்த வீராங்கனை வினேஷ் போகத் வெளிப்படுத்தி இருந்தார். எடை அதிகரிப்பு காரணமாக இறுதிப் போட்டிக்கு அவரால் தகுதி பெற முடியவில்லை.

இந்த நிலையில், மனு பாக்கரைப் போலவே, வினேஷின் பிராண்ட் மதிப்பும் அதிரடியாக உயர்ந்து வருகிறது. ஆண்டுக்கு ஒப்பந்தம் ஒன்றுக்கு ரூ.25 லட்சமாக இருந்த அவரது ஒப்புதல் கட்டணம் சுமார் ரூ.1 கோடியாக உயர்ந்துள்ளது.