மக்கானாவை அளவுக்கு அதிகமாக சாப்பிட்டால் என்ன ஆகும் தெரியுமா..?

மக்கானா என்று குறிப்பிடப்படும் தாமரை விதைகள் ஊட்டச்சத்துக்கள் நிறைந்த, கலோரி குறைவான ஒரு ஆரோக்கியமான சூப்பர் ஸ்னாக்ஸாக பரவலாக உட்கொள்ளப்படுகின்றன. மிகுந்த ஆரோக்கியமான மற்றும் பாதுகாப்பான உணவு என்றாலும் அளவுக்கு மிஞ்சினால் அமுதமும் நஞ்சு என்ற பழமொழிக்கேற்ப மக்கானாவை அதிகம் எடுத்து கொள்வது குறிப்பிட்ட சில பக்கவிளைவுகளை ஏற்படுத்த கூடும்.

மக்கானாவில் நிறைந்துள்ள கால்சியம் நம்முடைய எலும்பு ஆரோக்கியத்திற்கு அவசியமான ஒரு மினரல்ஸ் ஆகும். ஆனால் அதிகப்படியான கால்சியம் எடுத்து கொள்வது ஆரோக்கியமான விஷயமல்ல, குறிப்பாக ஏற்கனவே சிறுநீரக கற்கள் பிரச்சனை உள்ளவர்களுக்கு. மக்கானாவை தொடர்ந்து அதிக அளவு சாப்பிடுவது சிறுநீரில் கால்சியத்தின் அளவை அதிகரிக்க கூடும், இது பின் சிறுநீரகங்களில் கல் உருவாக தூண்டுதலாக இருக்க கூடும்.

மக்கானா எனப்படும் தாமரை விதை நார்ச்சத்து மிகுந்த உணவு பொருளாகவும், இதை மிதமான அளவில் சாப்பிட்டால் செரிமானத்திற்கு நல்லது. ஆனால் இதனை நீங்கள் அதிகமாக சாப்பிட்டால் உடலுக்குள் செல்லும் அதிக நார்ச்சத்து உடலில் ஆதிக்கம் செலுத்தி உப்புசம், வாயு மற்றும் மலச்சிக்கல் போன்ற பிரச்சனைகளை ஏற்படுத்த கூடும். அதே போல மக்கானாவில் நீர்ச்சத்து குறைவு என்பதால் இவற்றை அதிகம் சாப்பிட்டால் செரிமான பிரச்சனைகள் அதிகரிக்கும்

மக்கானாவானது லோ கிளைசெமிக் இன்டெக்ஸை கொண்டிருந்தாலும், இவற்றை அதிக அளவில் சாப்பிடுவது திடீரென ரத்த சர்க்கரை அளவை அதிகரிக்க வழிவகுக்கும். இது குறிப்பாக நீரிழிவு நோயாளிகளுக்கு பாதிப்பை ஏற்படுத்தும், ஏனெனில் மக்கானாவில் உள்ள கார்போஹைட்ரேட்ஸானது இன்சுலின் மற்றும் ரத்த சர்க்கரை அளவில் எதிர்மறை பாதிப்பை ஏற்படுத்துகின்றன, இதனால் சரியான முறையில் நீரிழிவை கட்டுப்படுத்துவது மிகவும் கடினமான ஒன்றாகி விடும்.

புரதம், நார்ச்சத்து மற்றும் ஆன்டிஆக்ஸிடன்ட்ஸ் போன்ற பல ஊட்டச்சத்துக்கள் தாமரை விதையில் நிறைந்திருக்கிறது. என்றாலும் நம் உடலுக்கு தேவையான அனைத்து ஊட்டச்சத்துக்களும் கிடைக்கும் வகையில், நாம் உண்ணும் உணவுகள் இருக்க வேண்டும். மக்கானாவை மட்டுமே அதிகம் சாப்பிட்டால் அது நம் ஊட்டச்சத்து சமநிலையை சீர்குலைக்கும். மேலும் நமக்கு தேவைப்படும்அத்தியாவசிய கொழுப்புகள், பிற வைட்டமின்ஸ் மற்றும் மினரல்ஸ்களை பெற முடியாமல் போக கூடும்.