தமிழ் சினிமாவின் டாப் 3 சைக்கோ திரில்லர் படங்கள்: இந்த ஓ.டி.டி.யில் பாருங்க

போர் தொழில்

திருச்சியில் பெண்களை குறிவைத்து ஒரே ஃபார்மெட்டில் தொடர் கொலைகள் நிகழ்த்தப்படுகின்றன. எந்தவித தடயமும் கிடைக்காததால் குற்றவாளியைக் கண்டுபிடிக்க முடியாமல் உள்ளூர் காவல் துறை திணறுகிறது. இதனால், இந்த வழக்கு கிரைம் பிரான்ச் எஸ்.பி.லோகநாதனிடம் (சரத்குமார்) ஒப்படைக்கப்படுகிறது. அவரிடம் புதிதாக டிஎஸ்பியாக பணி நியமனம் பெற்ற பிரகாஷ் (அசோக் செல்வன்) பயிற்சிக்காக இணைகிறார்.

சைக்கோ கொலைகாரனை கண்டுபிடிக்கும் முயற்சியில் இருவரும் விசாரணையை தொடங்குகின்றனர். கொலையாளி யார்? அவர் ஏன் இந்தக் கொலைகளைச் செய்தார்? இதைக் கண்டுபிடிக்கும் பயணத்தில் லோகநாதனுக்கும் பிரகாஷுக்கும் என்ன ஆனது? என்பது மீதிக் கதை. இப்படத்தை சோனி எல்.ஐ.வி ஓடிடி தளத்தில் காணலாம்.

ராட்சசன்

சினிமா உதவி இயக்குநர் விஷ்ணு விஷால், உலகெங்கும் இருக்கும் சைக்கோக்களைப் படித்து, முதல் படத்துக்கான கதையெழுதி தயாரிப்பாளருக்கான தேடுதலில் அலைகிறார். இன்னொரு பக்கம் குடும்பத்தைக் காப்பாற்றுவதற்காக தன் அப்பா விட்டுச் சென்ற காக்கிச் சட்டையைப் போட வேண்டிய சூழலும் இவருக்கு ஏற்படுகிறது. துணை ஆய்வளராகப் பொறுப்பேற்றதும் ஊருக்குள் நடக்கும் சில கொடூரக் கொலைச் சம்பவங்களில் ஆர்வம் காட்டத் தொடங்குகிறார். ராட்சசனாக வேட்டையாடும் அக்கொலைகாரனை விஷ்ணு விஷால் எப்படித் தடுத்து நிறுத்துகிறார் என்பதே ராட்சசன் படத்தின் கதை. இப்படம் சன் என்எக்ஸ்டி ஓடிடி தளத்தில் கிடைக்கிறது.

சைக்கோ

கோவையில் வசிக்கும் பார்வையற்ற செல்வந்தரான கவுதம் (உதயநிதி), வானொலி அறிவிப்பாளர் தாஹினியை (அதிதி ராவ்) ஒருதலையாகக் காதலிக்கிறார். அதேநேரம், நகரில் அடுத்தடுத்து இளம்பெண்களைக் கடத்திக் கொடூரமான முறையில் கொல்லும் சைக்கோ கொலைகாரன் (ராஜ்குமார்) பற்றி எந்தத் துப்பும் கிடைக்காமல் அல்லாடுகிறது காவல் துறை. அப்படிப்பட்ட கொலைகாரனிடம் சிக்கிக்கொள்கிறார் தாஹினி.

காவல் துறையால் கண்டுபிடிக்க முடியாத அவனைக் கண்டுபிடித்து தனது காதலியைக் காப்பாற்றத் துடிக்கிறார் கவுதம். அந்த சைக்கோ கொலைகாரன் யார், பார்வையற்ற நாயகனால், நாயகியை காப்பாற்ற முடிந்ததா, இல்லையா என்பது கதை கடந்த 2020-ம் ஆண்டு வெளியான இப்படத்தை தற்போது ஜீ5 தளத்தில் காணலாம்.