2025-26 கல்வி ஆண்டில் விடுமுறை தினங்கள் எத்தனை? தேர்வுகள் குறித்த அட்டவணை வெளியீடு!

தமிழகத்தில், 2025-26- ம் கல்வி ஆண்டில், பள்ளி விடுமுறை மற்றும் தேர்வு காலங்கள் குறித்து கல்வியாண்டிற்கான நாட்காட்டி வெளியிடப்பட்டுள்ளது.

தமிழகத்தில் கடந்த ஜூன் மாதம் 2-ந் தேதியில் இருந்து பள்ளி கல்விக்கான 2025-26 கல்வி ஆண்டு தொடங்கியது. பள்ளிகள் திறக்கப்பட்டு 2 வாரங்கள் நிறைவடைந்துள்ள நிலையில், புதிய மாணவர்களுக்கான அட்மிஷனும் நடைபெற்று வருகிறது.

தற்போது 2025 – 2026 கல்வியாண்டிற்கான நாட்காட்டி அட்டவனையை அரசு வெளியிட்டுள்ளது. அதன்படி 2025-26ம் கல்வியாண்டில் மொத்தம் 210 நாட்கள் வேலை நாட்களாக அறிவிக்கப்பட்டுள்ளது. அதேபோல், இந்த ஆண்டின், அனைத்து சனி, ஞாயிற்றுக்கிழமைகள் விடுமுறை என அறிவிக்கப்பட்டுள்ளது.

இந்த கல்வி ஆண்டின் காலாண்டு தேர்வு செப். 18 முதல் 26 வரை நடைபெறும். இந்த தேர்வுக்கான விடுமுறை செப். 29 தொடங்கி அக். 5ம் தேதி வரை 9 நாட்கள் அளிக்கப்பட்டுள்ளது.

காலாண்டு விடுமுறையிலேயே ஆயுத பூஜை, விஜயதசமி விடுமுறை வருகிறது. அரையாண்டு தேர்வு டிச. 15ம் தேதி முதல் 23 வரை நடைபெறும். இந்த தேர்வுக்கான விடுமுறை, டிச. 24 முதல் ஜன. 4, 2026 வரை 12 நாட்கள் வழங்கப்பட்டுள்ளது.

பொங்கல் தினத்திற்கான விடுமுறை, ஜன. 14, 2026 (புதன்) முதல் ஜனவரி 18 வரை அறிவிக்கப்பட்டுள்ளது. அதன்பிறகு பிப். 1, 2026 தைப்பூச நாள் விடுமுறை அளிக்கப்பட்டுள்ளது.

அதன்பிறகு, முழு ஆண்டு தேர்வு 2026 ஏப்ரல் 10-ந் தேதி தொடங்குகிறது. பள்ளியில் கடைசி வேலை நாள் ஏப்ரல் 24, 2026 என அறிவிக்கப்பட்டுள்ளது. ஏப்ரல் 25, 2026 முதல் அடுத்த ஆண்டிற்கான கோடை விடுமுறை தொடக்கம் என்றும் அறிவிக்கப்பட்டுள்ளது.