திருப்பதி பிரம்மோற்சவ 3-வது நாள்: சிம்ம வாகனத்தில் எழுந்தருளிய மலையப்பர்

திருப்பதி ஏழுமலையான் கோவிலில் வருடாந்திர பிரம்மோற்சவ விழா நேற்று முன்தினம் (அக்.4) கொடியேற்றத்துடன் கோலாகலமாக தொடங்கியது. இரவு பெரிய சேஷ வாகன வீதி உலா நடைபெற்றது.

விழாவின் 2-வது நாளான நேற்று காலை 8 மணியில் இருந்து 10 மணிவரை 5 தலைகளை கொண்ட சிறிய சேஷ வாகன வீதிஉலா நடந்தது. அதில் உற்சவர் மலையப்பசாமி, 'புல்லாங்குழல் வாசிக்கும் கிருஷ்ணர்' அலங்காரத்தில் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள் பாலித்தார்.

இந்தநிலையில், பிரம்மோற்சவ விழாவின் 3-வது நாளான இன்று (அக்.6) காலை 8 மணியில் இருந்து 10 மணி வரை சிம்ம வாகனத்தில் மலையப்பசாமி எழுந்தருளி வீதிஉலா வந்தார்.

விலங்குகளில் வலிமை மிக்கது சிங்கம். ஸ்ரீகிருஷ்ணர் பகவத் கீதையில் விலங்குகளில் நான் சிம்மமாக இருப்பேன் என்பார். பாதி மனிதன், பாதி சிங்கம் உருவம் கொண்டது தான் நரசிம்மர் அவதாரம்.

இதை விளக்கும் வகையில் இன்று உற்சவர் மலையப்பசாமி சிங்க வாகனத்தில் சிறப்பு அலங்காரத்தில் பக்தர்களுக்கு அருள் பாலித்ததார். இந்த பிரம்மோற்சவ விழா வரும் 12-ம் தேதி காலை சக்கர ஸ்நான நிகழ்ச்சியுடன் நிறைவடைய உள்ளது.