OTT: நொடிக்கு நொடி பரபரப்பு... இரக்கம் காட்டாத வில்லன் கும்பல்: ஓ.டி.டி-யில் இந்த த்ரில்லர் படத்தை மிஸ் பண்ணாதீங்க!

த்ரில்லர் திரைப்படங்கள் என்றாலே மலையாள திரையுலகம் என்ற நிலை தற்போது உருவாகி இருக்கிறது. அந்த வகையில் நெட்ஃப்ளிக்ஸ் ஓடிடி தளத்தில் புதிய வரவாக ‘ஆஃபீசர் ஆன் ட்யூட்டி’ என்ற திரைப்படம் வெளிவந்துள்ளது.

குஞ்சாக்கோ போபன், பிரியாமணி ஆகியோர் முதன்மை பாத்திரங்களாக இப்படத்தில் நடித்துள்ளனர். இதில் குஞ்சாக்கோ போபன் காவல்துறை அதிகாரியாக நடித்துள்ளார். சாதாரணமான செயின் பறிப்பு வழக்கு ஒன்று, அடுத்தடுத்த திருப்பங்களுக்கு வழிவகுக்கும் வகையில் திரைக்கதை அமைக்கப்பட்டுள்ளது.

அதீத கோபம் கொண்ட போலீஸ் ஆஃபீசரின் கதாபாத்திரத்தில் குஞ்சாக்கோ போபன் கச்சிதமாக பொருந்தியுள்ளார். குறிப்பாக, அவரது வாழ்வியலையும், திரைக்கதையையும் ஒன்றாக சேர்க்கும் வகையில் படம் காட்சிப்படுத்தப்பட்டுள்ளது.

இது தவிர, இன்றைய இளைஞர்களின் வாழ்க்கையை கேள்விக்குறியாக்கும் போதை பொருட்களின் பயன்பாடு குறித்து படத்தில் கூறப்பட்டுள்ளது. அதிலும், இத்தகைய தவறான பழக்கம் அவர்கள் மட்டுமல்லாமல் மற்றவர்களின் வாழ்க்கையையும் எப்படி பாதிக்கிறது என்பதற்கான விளக்கம் திரைப்படத்தில் இடம்பெற்றுள்ளது.

சீட் நுனியில் அமர்ந்து படம் பார்க்கும் விதமாக இருக்கும் த்ரில்லர் கதை விரும்பிகள் அனைவருக்கும் ‘ஆஃபீசர் ஆன் ட்யூட்டி’ திரைப்படம் நிச்சயம் தரமான அனுபவத்தை கொடுக்கும். நெட்ஃப்ளிக்ஸ் ஓடிடி தளத்தில் இப்படத்தை கண்டு மகிழலாம்.