விண்வெளியில் 'இன்டர்ஸ்டெல்லர்' டன்னல்... விஞ்ஞானிகளை மிரளவைத்த புதிய கண்டுபிடிப்பு!

விண்வெளி என்றாலே வெற்றிடம், எதுவுமற்ற இருண்ட பகுதி என்ற எண்ணம் நம்மில் பலருக்கு உண்டு. ஆனால், அந்த எண்ணத்தை மாற்றியமைக்கும் புதிய கண்டுபிடிப்பு விஞ்ஞானிகளை ஆச்சரியத்தில் ஆழ்த்தியுள்ளது. ஜெர்மனியில் உள்ள மாக்ஸ் பிளாங்க் இன்ஸ்டிடியூட்டை சேர்ந்த ஆராய்ச்சியாளர்கள், நமது சூரிய குடும்பத்தை தொலைதூர நட்சத்திரங்களுடன் இணைக்கும் விண்மீன் மண்டல சுரங்கப்பாதையை கண்டுபிடித்துள்ளனர். இந்த சுரங்கப்பாதை, விண்வெளியின் ரகசியங்களை மேலும் ஆழமாக புரிந்துகொள்ள உதவும் என எதிர்பார்க்கப்படுகிறது.

கண்டுபிடிப்பின் பின்னணி:

2019-ல் ஏவப்பட்ட eROSITA எக்ஸ்ரே தொலைநோக்கி மூலம் சேகரிக்கப்பட்ட தரவுகளை ஆய்வு செய்தபோது, விஞ்ஞானிகள் இந்த மர்மமான சுரங்கப்பாதைகளைக் கண்டறிந்தனர். நமது சூரியன், சுமார் 300 ஒளியாண்டுகள் கொண்ட ஒரு பெரிய, சூடான பிளாஸ்மா பையின் நடுவில் இருப்பதை அவர்கள் கண்டறிந்தனர். இந்த பை, மற்ற விண்மீன் மண்டலப் பகுதிகளுடன் பிரம்மாண்டமான சுரங்கப்பாதைகளால் இணைக்கப்பட்டுள்ளது. அதில் ஒன்று, சென்டாரஸ் (Centaurus) விண்மீன் குழுவை நோக்கியும், மற்றொன்று கானிஸ் மேஜர் (Canis Major) விண்மீன் குழுவை நோக்கியும் செல்கிறது. இந்த இரண்டு வழிகளும் ஒரு பெரிய வலையமைப்பின் பகுதியாக இருக்கலாம் என்று ஆராய்ச்சியாளர்கள் நம்புகிறார்கள்.

சூப்பர்நோவாக்களின் உருவாக்கம்:

இந்த மர்மமான சுரங்கப்பாதைகள், சூப்பர்நோவா எனப்படும் நட்சத்திர வெடிப்புகளால் உருவாகியிருக்கலாம் என விஞ்ஞானிகள் கூறுகின்றனர். சுமார் 10 முதல் 20 மில்லியன் ஆண்டுகளுக்கு முன்பு, மிகப்பெரிய நட்சத்திரங்கள் வெடித்தபோது, அவை பெரும் ஆற்றலை வெளியிட்டன. இந்த ஆற்றல், விண்வெளியில் இருந்த வாயு மற்றும் தூசுகளை விலக்கி, ஒரு பெரிய வெற்றிடத்தை உருவாக்கியிருக்கலாம்.

இந்த ஆய்வின் மற்றொரு சுவாரசியமான தகவல் என்னவென்றால், நமது சூரியன் இந்த 'லோக்கல் ஹாட் பபுள்' என்ற பகுதியில் பிறக்கவில்லை. சூரியன் உருவான பிறகு, சில மில்லியன் ஆண்டுகளுக்கு முன்பு தற்செயலாகவே இந்த பகுதிக்குள் நுழைந்துள்ளது. விண்வெளியில் தொடர்ந்து நகர்ந்து கொண்டிருக்கும் நமது சூரியன், இந்த சூடான பையின் நடுவில் இருப்பது வெறும் தற்செயல் நிகழ்வு மட்டுமே என்று ஆராய்ச்சியாளர்கள் கூறுகின்றனர்.

இந்தக் கண்டுபிடிப்பு, விண்வெளி வெற்றிடம் அல்ல, அது தொடர்ந்து உருவாகி, நகர்ந்து கொண்டிருக்கும் ஒரு சிக்கலான அமைப்பு என்பதை நமக்கு உணர்த்துகிறது. மேலும், இது நமது பால்வெளி மண்டலத்தின் அமைப்பு குறித்து புதிய புரிதலை ஏற்படுத்தும் ஒரு முக்கியத் தொடக்கமாகவும் அமைகிறது.