நாம் பார்க்கும் உலக வரைபடம் பொய்யா? 2,600 ஆண்டுகால வரலாறு, அதன் பின்னால் உள்ள அறிவியல், சர்ச்சை!

நாம் பள்ளியிலும் அலுவலகங்களிலும், ஏன் கூகுள் மேப்ஸிலும் கூடப் பார்க்கும் உலக வரைபடம், புவியின் முப்பரிமாண (3D) உருவத்தை ஒரு தட்டையான இருபரிமாண (2D) தாளில் கொண்டு வருவதற்கான நுட்பமான முயற்சியாகும். இந்த வரைபடம் உருவானது ஒரு நாள் இரவில் அல்ல, மாறாகப் பல நூற்றாண்டுகளின் அறிவியல் வளர்ச்சி மற்றும் அரசியல் ஆதிக்கத்தின் விளைவாகும்.

உலக வரைபடம் எப்போது தயாரிக்கப்பட்டது?

உலக வரைபடத்தின் வரலாறு என்பது சுமார் 2600 ஆண்டுகளுக்கு முந்தையது. இதுவரை கண்டுபிடிக்கப்பட்ட உலகிலேயே மிகப் பழமையான வரைபடம், கி.மு. 6-ம் நூற்றாண்டைச் சேர்ந்த 'இமேகோ முண்டி' (Imago Mundi) எனப்படும் பாபிலோனிய களிமண் தகடு ஆகும். இது பாபிலோனை மையமாக கொண்டு, உலகை தட்டையான வட்ட வடிவமாக சித்தரித்தது. கிரேக்க புவியியலாளர்களான எரடோஸ்தனிஸ் (கி.மு 3-ம் நூற்றாண்டு), தாலமி (Ptolemy - கி.பி. 2-ம் நூற்றாண்டு) போன்றோர்தான் பூமி கோள வடிவிலானது என்று கருதி, அட்சரேகை (Latitude) மற்றும் தீர்க்கரேகை (Longitude) அடிப்படையில் வரைபடங்களை முதன்முதலில் உருவாக்கினர்.

15-ம் நூற்றாண்டில் கடற்பயணங்களின் சகாப்தம் தொடங்கிய பின்னரே, வரைபடங்கள் துல்லியம் பெற்றன. 1569 ஆம் ஆண்டில், ஃபிளெம்கார்ட் புவியியலாளர் ஜெரார்டஸ் மெர்கேட்டர் (Gerardus Mercator) என்பவரால் உருவாக்கப்பட்ட மெர்கேட்டர் ப்ரொஜெக்‌ஷன் (Mercator Projection) என்ற வரைபடம்தான், இன்று நாம் பார்க்கும் வரைபடங்களுக்கு அடியெடுத்துக் கொடுத்தது.

ஏன் ஒரே ஒரு படமாக இருக்கிறது? 

பூமி ஒரு கோள வடிவமாக (Sphere) இருக்கும்போது, அதன் மேற்பரப்பைத் தட்டையான தாளில் அல்லது திரையில் கொண்டு வர முடியாது. ஒரு ஆரஞ்சுப் பழத்தின் தோலை உரித்து, அதைத் தட்டையாக நீட்ட முயற்சித்தால், சில இடங்கள் நிச்சயம் கிழியும் அல்லது நீளும் அல்லவா? அதே சிக்கல்தான் உலக வரைபடத்திலும் உள்ளது.

ப்ரொஜெக்‌ஷன் (Projection) என்றால் என்ன?

பூமியின் வளைந்த மேற்பரப்பைக் கணிதச் சமன்பாடுகள் மூலம் தட்டையான மேற்பரப்பிற்குக் கொண்டு வரும் முறைக்குத்தான் 'வரைபட வீழ்த்துதல்' (Map Projection) என்று பெயர். ஒரே நேரத்தில் சரியான வடிவத்தையும், சரியான பரப்பளவையும் ஒரு தட்டையான வரைபடத்தில் ஒருபோதும் காட்ட முடியாது என்று விஞ்ஞானி கார்ல் ஃபிரெட்ரிச் காஸ் நிரூபித்துள்ளார்.

மெர்கேட்டர் வரைபடமே இன்று உலகளாவிய தரநிலையாக மாறியதற்கு முக்கியக் காரணம், இது கடல் பயணிகளுக்கு மிகவும் வசதியானது. இந்த வரைபடத்தில் ஒரு நேர்கோடு வரைந்தால், அது திசைகாட்டியில் (Compass) ஒரே நிலையான திசையைக் குறிக்கும் (Constant Bearing). இதனால் 16-ம் நூற்றாண்டில் கப்பல் செலுத்துபவர்களுக்குப் பாதையைத் திட்டமிட இன்றியமையாததாக இருந்தது. வசதிக்காக உருவாக்கப்பட்ட இந்த ஒரே தட்டையான படமே, காலப்போக்கில் பள்ளிகள், அட்லஸ்கள் மற்றும் கூகுள் மேப்ஸ் என அனைத்திலும் உலகளாவிய தரநிலையாக மாறிவிட்டது.

உலக வரைபடம் என்பது அறிவியல் டேட்டா மட்டுமல்ல, அது வரலாற்றின் ஒரு கண்ணாடியும் கூட. நாம் இன்று பார்க்கும் ஒற்றைத் தட்டையான வரைபடம், கடல் பயண வசதிக்காக உருவாக்கப்பட்ட 'திருத்தம்' ஆகும். இது உலகைப் பற்றிய ஒரு தவறான பார்வையைத் தரக்கூடியது என்ற விமர்சனம் இருந்தாலும், தொடர்ந்து செய்யப்பட்ட திருத்தங்கள் மூலம், உலகின் பல்வேறு பரிமாணங்களை நாம் அறிந்துகொள்ள முடிகிறது. எனவே, இனி நீங்க உலக வரைபடத்தைப் பார்க்கும்போது, அது புவியின் முழுமையான உண்மைத் தோற்றம் அல்ல, மாறாக கணிதச் சமரசம் என்பதை நினைவில் கொள்ளுங்கள்.