'எல்லாமே அவர் தான்; நாங்க தலையிட மாட்டோம்’: தோனியின் எதிர்காலம் குறித்து சி.எஸ்.கே சி.இ.ஓ ஓபன் டாக்

பெங்களூரு சின்னசாமி ஸ்டேடியத்தில் ஞாயிற்றுக்கிழமை நடந்த ஆட்டத்திற்குப் பிறகு எம்.எஸ் தோனி (MS Dhoni) தனது சி.எஸ்.கே அணி நிர்வாகத்திடம் ஓய்வு பெறுவதற்கான எந்தத் தகவலையும் தெரிவிக்கவில்லை. அங்கு நடந்த தங்களது ஐ.பி.எல் 2024 (IPL 2024) கடைசி லீக் ஆட்டத்தில் சென்னை சூப்பர் கிங்ஸ் (Chennai Super Kings) ராயல் சேலஞ்சர்ஸ் பெங்களூருவிடம் கடைசி ஓவரில் தோல்வியடைந்தது. தோனியின் எதிர்காலம் குறித்து ஊகங்கள் நிலவி வரும் நிலையில், சி.எஸ்.கே தலைமை நிர்வாக அதிகாரி காசி விஸ்வநாதன், அது குறித்து எந்த பேச்சுவார்த்தையும் நடைபெறவில்லை என்று கூறினார்.

“அதைப் பற்றி டிரஸ்ஸிங் ரூமில் எந்த விவாதமும் நடக்கவில்லை. அவருடைய எதிர்காலத்தைப் பற்றி நாங்கள் அவரிடம் கேட்கவில்லை, அதைப் பற்றி அவர் எதுவும் சொல்லவில்லை. அவர் தனது ஓய்வு பற்றிய முடிவை எடுக்கும்போது, ​​அதனை எங்களுக்குத் தெரிவிப்பார். அதுவரை நாங்கள் தலையிட மாட்டோம், ”என்று காசி விஸ்வநாதன் தி இந்தியன் எக்ஸ்பிரஸ்ஸிடம் கூறினார். 

இதற்கிடையில், சி.எஸ்.கே பிளே-ஆஃப்களுக்குச் செல்லத் தவறிய ஒரு நாளுக்குப் பிறகு, தோனி ராஞ்சிக்கு புறப்பட்டுச் சென்றார், மேலும் அவர் வெளிநாடுகளுக்குச் செல்வார் என்று புரிந்து கொள்ளப்படுகிறது. 

மே 2023 இல் முழங்கால் அறுவை சிகிச்சைக்குப் பிறகு, தோனி இந்த சீசனில் அனைத்து 14 ஆட்டங்களிலும் விளையாடினார், 220.55 ஸ்ட்ரைக் ரேட்டில் 161 ரன்கள் எடுத்தார், இதில் 13 சிக்ஸர்கள் அடங்கும். தலைமை பயிற்சியாளர் ஸ்டீபன் ஃப்ளெமிங் மற்றும் பேட்டிங் பயிற்சியாளர் மைக் ஹஸ்ஸி ஆகியோர், தோனியிடம் பந்தை நீண்ட மற்றும் கடினமாக அடிக்கும் திறன் இன்னும் அப்படியே உள்ளது என்றும் அவரது உடற்தகுதியில் எந்த பிரச்சனையும் இல்லை என்றும் தொடர்ந்து கூறி வருகிறார்கள். 

தோனி விலகுவது அல்லது தொடருவது என்பது அடுத்த சீசனின் மெகா ஏலத்திற்கு முன் பி.சி.சி.ஐ முடிவு செய்யும் வீரர்களின் தக்கவைப்பு விதியைப் பொறுத்தது என்று அறியப்படுகிறது. 2022 வீரர்கள் ஏலத்திற்கு முன்னதாக, சி.எஸ்.கே நான்கு வீரர்களைத் தக்கவைத்தபோது, ​​தோனி அதிக சம்பளம் வாங்கும் வீரர்கள் வரிசையில் முதல் இடத்தில் இருந்து இரண்டாவது இடத்திற்கு நகர்ந்தார், இப்போது 12 கோடி பெறுகிறார், ரவீந்திர ஜடேஜா அதிகபட்சமாக ரூ. 16 கோடி பெறுகிறார். மொத்த அணியும் உருவாக்கப்படுமா? அல்லது தோனி தொடர்ந்து விளையாடி ஏலப் பணத்தின் பெரும்பகுதியை எடுத்துக் கொள்ளப்போகிறாரா? என்பதை பார்க்க வேண்டும். அணிக்கு 5 முறை கோப்பையை வென்ற கேப்டன் சி.எஸ்.கே-வின் பிராண்டிற்கு அதிக வலு சேர்ப்பதால், அணி நிர்வாகம் கடுமையான முடிவை எடுக்க வேண்டியிருக்கும்.

இந்த ஆண்டு ஐ.பி.எல் போட்டிக்கு முன்னதாக, சி.எஸ்.கே கேப்டன் பொறுப்பில் இருந்து விலகிய தோனி, ருதுராஜ் கெய்க்வாடிடம் பொறுப்பை ஒப்படைத்தார். அந்த நேரத்தில், ஃப்ளெமிங் கூறுகையில், தோனி தான் அந்த முடிவை எடுத்தார். அதனால் அவரை அந்த பொறுப்புக்கு கொண்டு வந்தார். 

ஆனால் முன்னோக்கி பார்க்கும்போது, ​​ஒரு வீரராக அவரது எதிர்காலம் அவரது உடற்தகுதியைப் பொறுத்தது. ஒரு அழுத்தத்திற்கு ஆளானதால், தோனி தனது அசைவுகளை மட்டுப்படுத்த வேண்டியிருந்தது. மேலும் விக்கெட்டுகளுக்கு இடையில் ஓடும்போது எளிதில் வேகத்தை குறைக்க முடியவில்லை. ஓடும்போது கூட விரைவான திருப்பங்கள் ஆபத்தானதாகக் கருதப்பட்ட நிலையில், கட்டாயப்படுத்தப்படாவிட்டால், தோனி கடைசி இரண்டு ஓவர்களில் தனது பங்கை ஃபினிஷராக வெளிப்படுத்தி இருப்பார். 

ஸ்டார் ஸ்போர்ட்ஸில் பேசிய முன்னாள் சி.எஸ்.கே வீரர் அம்பதி ராயுடு இது தோனியின் கடைசி ஆட்டம் இல்லை என்று நம்பிக்கை தெரிவித்தார். “இது அவருடைய கடைசி ஆட்டம் என்று நான் நினைக்கவில்லை. இந்த குறிப்பில் அவர் முடிக்க விரும்புவதை நான் காணவில்லை. வெளியே வந்தபோதும் சற்று விரக்தியுடன் காணப்பட்டார். எம்.எஸ். தோனியைப் போலல்லாமல், அவர் தகுதி பெற விரும்பினார். ஆனால் எம்.எஸ் தோனி பற்றி உங்களுக்கு தெரியாது, அவர் அடுத்த ஆண்டு மீண்டும் வரக்கூடும், ”என்று அவர் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“