ஓவியா உடன் ஹர்பஜன் சிங் நடிக்கும் தமிழ் படம்... உங்கள் அன்புக்காக வெயிட்டிங்

இந்திய கிரிக்கெட் அணியின் முன்னாள் வீரர் ஹர்பஜன் சிங் நடித்துள்ள அடுத்த தமிழ்ப் படம்  ‘சேவியர்’ உங்களை மகிழ்விக்க வரப்போகிறது என்றும் உங்கள் அன்புக்காக வெயிட்டிங் என்று தெரிவித்துள்ளார். இந்த படத்தில் ஹர்பஜன் சிங் நடிகை ஓவியா உடன் நடித்துள்ளார்.

தனது ஆஃப் ஸ்பின் சுழலில் ஆஸ்திரேலியாவை அலறவிட்டவர் இந்திய கிரிக்கெட் அணியின் முன்னாள் வீரர் ஹர்பஜன் சிங். இவர் ஐ.பி.எல் தொடரில் சி.எஸ்.கே அணியில் இருந்ததால் அவருக்கு தமிழகத்தில் பெரிய அளவில் ரசிகர்கள் இருக்கிறார்கள். ஹர்பஜன் ஓய்வுக்குப் பிறகு, சினிமாவிலும் நடித்து வருகிறார். 

இந்நிலையில், இந்திய கிரிக்கெட் அணியின் முன்னாள் வீரர் ஹர்பஜன் சிங் நடித்துள்ள அடுத்த தமிழ்ப் படம்  ‘சேவியர்’ உங்களை மகிழ்விக்க வரப்போகிறது என்றும் உங்கள் அன்புக்காக வெயிட்டிங் என்று ஹர்பஜன் சிங் தெரிவித்துள்ளார்.

இது குறித்து ஹர்பஜன் சிங் எக்ஸ் பக்கத்தில் குறிப்பிடுகையில், “என் தங்க தமிழ் நெஞ்சங்களுக்கு வணக்கம், என்னோட அடுத்த தமி படம் சேவியர் (Savior). உங்களை மகிழ்விக்க வரப்போகிறது. உங்கள் அன்புக்காக வெயிட்டிங்” என்று தெரிவித்துள்ளார்.

ஜான் பால் ராஜ் இயக்கியுள்ள சேவியர் படத்தில் நடிகை ஓவியா முக்கிய வேடத்தில் நடிக்கிறார்.  இந்த படத்தில் ஹர்பஜன் சிங் டாக்டர் வேடத்தில் நடிக்கிறார் என்பது போஸ்டர் மூலம் தெரிகிறது. சேவியர் படத்தில், ஓவியா, ஹர்பஜன் சிங் இவர்களுடன் வி.டி.வி கணேஷ் மற்றும் ஜி.பி.முத்து ஆகியோர் நடித்துள்ளனர். சிங்கம்புலி மற்றும் சாம்ஸ் ஆகியோரும் சேவியர் படத்தில் நடித்துள்ளனர். 

இந்த படத்தில் ஓவியா வர்ணாவாகவும், வி.டி.வி.கணேஷ் கடப்பாறை கணேசனாகவும் (தூங்கும் மனிதனாகவும்), ஹர்பஜன் சிங் டாக்டர் ஜேம்ஸ் மல்ஹோத்ராவாகவும், ஜி.பி.முத்து முத்து மாமாவாகவும் நடித்துள்ளனர் என்று படத் தயாரிப்புக் குழுவினர் வெளியிட்டுள்ளனர்.

முன்னாள் இந்திய கிரிக்கெட் வீரர் ஹர்பஜன் சிங் 2021-ம் ஆண்டு ஃப்ரெண்ட்ஷிப் திரைப்படத்தில் முன்னணி நடிகராக அறிமுகமானார். முஜ்சே ஷாதி கரோகி (2004), விக்டரி (2009), பாஜி இன் ப்ராப்ளம் (2013), செகண்ட் ஹேண்ட் ஹஸ்பண்ட் (2015), மற்றும் டிக்கிலோனா (2021) போன்ற பல மொழிகளில் சிறப்புத் தோற்றத்தில் நடித்துள்ளார்.

ஷாண்டோ ஸ்டுடியோ தயாரிப்பில், உருவாகியுள்ள சேவியர் படத்தில் தொழில்நுட்பக் குழுவில் ஒளிப்பதிவாளர் மாணிக், எடிட்டர் கோகுல் மற்றும் இசையமைப்பாளர் டி.எம் உதயகுமார் ஆகியோர் இணைந்துள்ளனர்.

படத்தின் கதைக்களம் மற்றும் வெளியீட்டு தேதி போன்ற மற்ற விவரங்களை தயாரிப்பாளர்கள் இன்னும் வெளியிடவில்லை.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“