பறி போன துணை கேப்டன் பதவி… தொடக்க வீரர் இடத்தை கில்லிடம் இழக்கும் ராகுல்!

IND vs AUS: KL Rahul, Shubman Gill Tamil News: இந்தியாவில் சுற்றுப்பயணம் செய்து வரும் ஆஸ்திரேலிய கிரிக்கெட் அணி தற்போது பார்டர்-கவாஸ்கர் கோப்பைக்கான 4 போட்டிகள் கொண்ட டெஸ்ட் தொடரில் பங்கேற்றுள்ளது. இதில் நாக்பூரில் நடந்த முதலாவது டெஸ்டில் இந்திய அணி இன்னிங்ஸ் மற்றும் 132 ரன்கள் வித்தியாசத்தில் ஆஸ்திரேலியாவை வீழ்த்தியது. இதைத் தொடர்ந்து டெல்லியில் நடந்த 2-வது டெஸ்டில் 6 விக்கெட்டுகள் வித்தியாசத்தில் இந்தியா வென்றது. இந்த தொடர் வெற்றிகள் மூலம் தொடரில் இந்திய அணி 2-0 என்ற கணக்கில் முன்னிலை வகிக்கிறது.

இந்நிலையில், இந்தூர் மற்றும் அகமதாபாத்தில் நடக்கவிருக்கும் மூன்றாவது மற்றும் நான்காவது டெஸ்ட் போட்டிகளுக்கான அணியை நேற்று முன்தினம் பிசிசிஐ வெளியிட்டது. அதில், இந்திய தொடக்க வீரரான கே.எல்.ராகுலின் பெயருக்குப் பின் அவரை துணை கேப்டன் என்று குறிப்பிடவில்லை. மேலும், புதிய துணை கேப்டனை முடிவு செய்யும் பொறுப்பு இந்திய கேப்டன் ரோகித் சர்மாவிடம் ஒப்படைக்கப்பட்டு விட்டதாக பிசிசிஐ-யின் மூத்த அதிகாரி ஒருவர் தி இந்தியன் எக்ஸ்பிரஸிடம் கூறியிருந்தார். எனவே, கே.எல் ராகுல் இனி துணை கேப்டானாக செயல்பட வாய்ப்பில்லை.

ராகுல் டெஸ்ட் கிரிக்கெட்டில் பெரிய ஸ்கோர்களை குவிக்காத நிலையிலும், அவருக்கு தொடர்ச்சியான வாய்ப்புகள் வழங்கப்பட்டன. வங்கதேச மண்ணில் நடந்த டெஸ்ட் தொடருக்கான அணியை வழிநடத்த கேப்டன் ரோகித் சர்மா இல்லாத நேரத்தில் அவரே அணியை வழிநடத்தி இருந்தார். ஆனால், அதன்பிறகு நடந்த போட்டிகளிலும், ஆஸ்திரேலியாவுக்கு எதிரான முதல் இரண்டு டெஸ்ட் போட்டிகளிலும் பெரிதும் சோபிக்காத அவர் தனது துணை கேப்டன் பதவியை இழந்துள்ளார். அடுத்ததாக அவர் தனது தொடக்க வீரர் இடத்தையும் இளம் வீரர் ஷுப்மான் கில்லிடம் இழக்கும் நிலையில் உள்ளார்.

இதுவரை 47 டெஸ்டுகளில் விளையாடியுள்ள அவரின் சராசரி 33.44 ஆக மட்டுமே உள்ளது. மேலும் அவர் விளாசிய 7 சதங்களில் கடைசியாக, தென் ஆப்பிரிக்காவுக்கு எதிராக செஞ்சூரியனில் சதம் அடித்த பிறகு அவர் 23, 50, 8, 12, 10, 22, 23, 10, 2, 20, 17 மற்றும் 1 ரன்களை எடுத்துள்ளார். தவிர, ஒவ்வொரு வெளிநாட்டு சுற்றுப்பயணங்களின் போதும், அவரை அணியில் கழற்றிவிட வேண்டும் என குரல்கள் வலுத்துள்ளன. தற்போது, இளம் வீரரான கில் தனது தரமான ஃபார்மில் உள்ளதால் அவரை சொந்த மண்ணிலும் கை கழுவி விடலாம் என்று பலரும் கூறுகின்றனர்.

தனது சிறப்பான மற்றும் அதிரடியான ஆட்டத்தால் டி20 போட்டிகளில் ஏற்கனவே ராகுலை விட தொடக்க ஆட்டக்காரர் இடத்தை சொந்தமாக்கிக் கொண்ட கில், இப்போது டெஸ்டிலும் அதையே பிரதிபலிக்கும் வாய்ப்பிற்காக அவர் காத்திருக்கிறார். ஆஸ்திரேலிய சுற்றுப்பயணத்தின் போது அவர் சிட்னி மற்றும் பிரிஸ்பேனில் அரைசதம் அடித்தார். அதன்பிறகு, சமீபத்திய வங்கதேச சுற்றுப்பயணத்தில் ​​கில் தனது முதல் டெஸ்ட் சதத்தை அடித்தார்.

அப்போதிருந்து, கில் அணியில் இந்தியாவின் சிறந்த வீரராக இருந்து வருகிறார். ஒருநாள் போட்டிகளில் முதல் இரட்டை சதத்தை அடித்தார் மற்றும் டி20ஐகளில் சதம் அடித்தார். அவரது ஆக்ரோஷமான ஸ்ட்ரோக்பிளேயை ஆதரிக்க ஒரு சிறிய நுட்பத்துடன், கில் டெஸ்டில் ஒரு தொடக்க வீரராக இருப்பதற்கான தகுதியை காட்டியுள்ளார்.

2021 ஆம் ஆண்டு இங்கிலாந்து சுற்றுப்பயணத்தின் போது, ​​ஆஸ்திரேலியாவில் கில்லின் செயல்திறன், ரோகித் சர்மாவுடன் பார்ட்னர்ஷிப் அமைத்து முதல்-தேர்வு தொடக்க வீரராக அவரை மாற்றியது. தொடருக்கு முன், அவர் நியூசிலாந்திற்கு எதிரான உலக டெஸ்ட் சாம்பியன்ஷிப் இறுதிப் போட்டியில் கூட களமாடி இருந்தார். இந்தியாவின் சிந்தனைக் குழு ராகுலை மிடில்-ஆர்டர் ஸ்லாட்டுக்கான போட்டியாளராகப் பார்க்கும்படி கட்டாயப்படுத்தியது.

இருப்பினும், காலில் ஏற்பட்ட காயம் காரணமாக கில் தொடரை இழக்க நேரிட்டது. அது ராகுலுக்கான கதவைத் திறந்தது. அவர் லார்ட்ஸில் 129 ரன்கள் எடுத்தார். அது ஒரு பிரபலமான வெற்றியை அமைத்தது. அடுத்த சில மாதங்களில், ராகுல் அந்த இடத்தை சொந்தமாக்கிக் கொண்டார். மேலும், தனது அனுபவ அறிகுறிகளையும் காட்டினார். அணி நிர்வாகத்தை கில்லை ஒரு மிடில்-ஆர்டர் விருப்பமாக பார்க்கும்படி கட்டாயப்படுத்தினார்.

கடுமையான போட்டி

தற்போது இந்திய கிரிக்கெட்டில் தொடக்க வீரர் இடங்களுக்கு கடும் போட்டி நிலவி வருகிறது. கில்லைத் தாண்டி ராகுலின் நண்பரும் சக கர்நாடக தொடக்க வீரருமான மயங்க் அகர்வால் இருக்கிறார். இந்திய அணியில் இருந்து நீக்கப்பட்ட அகர்வால், இந்த சீசனில் ரஞ்சி டிராபியில் மூன்று சதங்கள் மற்றும் 6 அரைசதங்களுடன் 82.50 சராசரியுடன் 990 ரன்கள் எடுத்து அசத்தினார்.

இதேபோல், பெங்கால் தொடக்க ஆட்டக்காரரான அபிமன்யு ஈஸ்வரனும் போட்டியில் இருக்கிறார். இவர் இந்திய அணியில் பேக்-அப் தொடக்க வீரராக இருந்து, நவம்பர்-டிசம்பர் மாதங்களில் 6 சதங்களை அடித்துள்ளார். யஷஸ்வி ஜெய்ஸ்வால், ப்ரித்வி ஷா, மற்றும் ருதுராஜ் கெய்க்வாட் ஆகியோரும் சிறந்த தொடக்க வீரருக்கான திறன்களைக் கொண்டுள்ளனர் மற்றும் உள்நாட்டு தொடர்களில் பெரிய அளவில் ரன்களை பெற்றதன் பின்னணியில் இந்தியா A இன் ஒரு பகுதியாக உள்ளனர். இதனால் தான் ஒவ்வொரு மோசமான ஆட்டத்தின் போதும் ராகுல் மீது அழுத்தம் அதிகரித்து வருகிறது.

வெளியில் இருந்து சத்தம் அதிகமாக இருந்தாலும், அணிக்குள் ராகுலுக்கு இன்னும் ஏராளமான அபிமானம் இருக்கிறது. அவரது 7 சதங்களில் 6 வெளிநாட்டு டெஸ்ட்களிலும் ஆஸ்திரேலியா, இலங்கை, வெஸ்ட் இண்டீஸ், இங்கிலாந்து மற்றும் தென் ஆப்பிரிக்கா போன்ற பல்வேறு சூழ்நிலைகளிலும் வந்தவை. வீரேந்திர சேவாக்கிற்குப் பிறகு வேறு எந்த இந்திய தொடக்க ஆட்டக்காரராலும் இதுபோன்ற வெளிநாட்டு சதங்களை விளாசி பெருமைப்படுத்த முடியாது. தென் ஆப்பிரிக்கா சுற்றுப்பயணத்திற்குப் பிறகு, ராகுலின் அடுத்த தொடர் வங்கதேசத்தில் மட்டுமே இருந்தது. ஏனெனில் அவர் இலங்கைக்கு எதிரான சொந்த மண்ணில் நடந்த தொடரையும் இங்கிலாந்தில் ஒரு டெஸ்ட் போட்டியையும் தவறவிட்டு இருந்தார்.

மெதுவான சூழல்கள் மற்றும் இந்தியாவில் சுழலும் ஆடுகளங்கள் ராகுலை தொந்தரவு செய்தாலும், இது மற்ற பேட்டிங் வரிசைக்கும் சிக்கல்களை உருவாக்கியுள்ளது. இந்தக் கருத்து தேர்வாளர்கள் கூட ஒப்புக்கொள்ளத் தகுந்ததாகவும் உள்ளது. ராகுலுக்கு கேப்டன் ரோகித் மற்றும் தலைமை பயிற்சியாளர் ராகுல் டிராவிட் ஆகியோரின் ஆதரவும் உள்ளது. டெல்லி கோட்லா டெஸ்டில் இந்தியா தோல்வியடைந்திருந்தால், அவரை அணியில் தக்கவைப்பது அணி நிர்வாகத்திற்கு கடினமாக இருந்திருக்கலாம். இந்தியா, வரலாற்று ரீதியாக, சொந்த மண்ணில் தோற்றால் சில கடினமான முடிவுகளை எடுத்துள்ளது இங்கு நினைவுகூரத்தக்கது.

இந்திய அணி நிர்வாகம் மற்றும் தேர்வாளர்கள் அவரை மீதமுள்ள இரண்டு டெஸ்ட் போட்டிகளுக்கு தக்கவைத்துக்கொள்வதற்கு முன், இந்தியாவின் அபார வெற்றி என்ற அந்த அம்சம்தான் காரணம். “தாமதமாக அவரது பேட்டிங் பற்றி நிறைய பேசப்பட்டது. ஆனால் அணி நிர்வாகமாக எங்களைப் பொறுத்தவரை, கே.எல் மட்டுமல்ல, எந்தவொரு தனிநபரின் திறனையும் நாங்கள் எப்போதும் பார்க்கிறோம்,” என்று தனது வாழ்க்கையில் இதேபோன்ற கட்டத்தை அனுபவித்த கேப்டன் ரோகித் கூறியிருந்தார்.

“கடந்த காலத்தில் நிறைய வீரர்களைப் பற்றி என்னிடம் கேட்கப்பட்டது, அந்த பையனுக்கு திறன் இருந்தால், அவர் அந்த நீட்டிக்கப்பட்ட ஓட்டத்தைப் பெறுவார். இது கே.எல் பற்றி மட்டுமல்ல, யாரையும் பற்றியதும் தான். இந்தியாவுக்கு வெளியே அவர் பெற்ற சில சதங்களைப் பார்க்கப்பட வேண்டும். கேஎல்-லிடம் இருந்து நான் பார்த்த சிறந்த இரண்டு சதங்கள், குறிப்பாக லார்ட்ஸ் மைதானத்தில் – ஈரமான ஆடுகளத்தில் பேட்டிங் செய்வது, டாஸ் இழந்து, ஆடுவது, இங்கிலாந்தில் விளையாடுவது என்பது எளிதல்ல. அவர் அங்கு ஒரு சிறந்த ஆட்டத்தை வெளிப்படுத்தினார். மேலும் செஞ்சுரியன் மற்றொரு உதாரணம். அந்த இரண்டுமே இந்தியாவின் வெற்றிக்குக் காரணமாக அமைந்தது. எனவே மீண்டும், அதுவே அவருக்கு இருக்கும் திறன்” என்றும் கேப்டன் ரோகித் கூறினார்.

ராகுல் இதுவரை அனுபவிக்காத ஆடம்பரம் இது. விராட் கோலி மற்றும் ரவி சாஸ்திரியின் கீழ், எம்.விஜய், ஷிகர் தவான் மற்றும் ராகுல் ஆகிய மூவரும் ஒவ்வொரு இரண்டாவது டெஸ்டிலும் இசை நாற்காலிகளில் விளையாடுவது போல் இருந்தது. ஆனால் இந்த முறை – குறைந்த ஸ்கோர்கள் இருந்தபோதிலும், அவர் மீது ரோகித் மற்றும் டிராவிட் அபார நம்பிக்கையையும் பொறுமையையும் காட்டியுள்ளனர்.

“அவர் தனது செயல்முறைகளை நம்ப வேண்டும் என்று நான் நினைக்கிறேன். இது ஒரு கட்டம் மட்டுமே, அவர் எங்களின் வெற்றிகரமான வெளிநாட்டு தொடக்க வீரர்களில் ஒருவராக இருந்து வருகிறார். தென் ஆப்பிரிக்கா மற்றும் இங்கிலாந்தில் அவர் சதம் அடித்துள்ளார், நாங்கள் அவருக்கு தொடர்ந்து ஆதரவளிப்போம். இதிலிருந்து வெளிவர தரமும் திறனும் அவரிடம் இருப்பதாக நான் நம்புகிறேன். இந்த அலகுடன் பணிபுரிவது மிகவும் சிறப்பானது, வடிவங்களை நிர்வகிப்பது மிகவும் கடினமான பகுதியாகும்,” என்று பயிற்சியாளர் டிராவிட் கூறினார்.

எவ்வாறாயினும், இவ்வளவு நாள் ராகுலுக்கு “துணை கேப்டன்” என்ற டேக் பாதுகாப்பு கொடுத்து வந்தது. எனினும், உள்நாட்டு தொடர்களில் எந்த அணியையும் வழிநடத்தாத அவருக்கு, தென் ஆப்பிரிக்கா மற்றும் வங்கதேச சுற்றுப்பயண தொடரில் அந்தப் பதவி கொடுக்கப்பட்டது குறித்த கேள்விகள் இன்னும் உள்ளன. இப்பொது இந்தியா அவரை துணை-கேப்டன் பதவியில் இருந்து விடுவிப்பது நிச்சயம் சரியானதாக தோன்றுகிறது. இந்தூரில் கில்லை இந்தியா கொண்டு வர இருப்பதால், ராகுலுக்கு தனது இடத்தை தக்கவைத்துக்கொள்வதற்கான கூடுதல் சொகுசை இது வழங்காது.

தமிழ்  இந்தியன்  எக்ஸ்பிரஸின்  அனைத்துசெய்திகளையும்உடனுக்குடன்  டெலிகிராம்  ஆப்பில்  பெற https://t.me/ietamil