IND vs AUS முதல் டெஸ்ட்; பந்துவீச்சில் அசத்திய பும்ரா: ஆஸ்திரேலியாவை சாய்த்த இந்தியா அபார வெற்றி!

ஆஸ்திரேலியாவில் சுற்றுப்பயணம் செய்யும் இந்திய கிரிக்கெட் அணி, பார்டர்-கவாஸ்கர் கோப்பைக்கான 5 போட்டிகள் கொண்ட டெஸ்ட் தொடரில் விளையாடுகிறது. இதில், இந்தியா – ஆஸ்திரேலியா அணிகள் இடையிலான முதலாவது டெஸ்ட் போட்டி பெர்த்தில் நேற்று வெள்ளிக்கிழமை (நவ.22) முதல் தொடங்கி நடைபெறுகிறது. 

ஆங்கிலத்தில் படிக்கவும்: India vs Australia LIVE Cricket Score, 1st Test 

முதல் நாள் ஆட்டம்  -  டாஸ் வென்ற இந்தியா  பேட்டிங் 

இந்த போட்டியில் டாஸ் வென்ற இந்திய அணி முதலில் பேட்டிங்கை தேர்வு செய்து விளையாடி வருகிறது. இந்திய அணியில் தொடக்க வீரர்களாக களமிறங்கிய கே.எல்.ராகுல் யெஸ்ஸ்வி ஜெய்ஸ்வால் இருவரும் தடுப்பாட்டத்தில் ஈடுப்பட்ட நிலையில்,  8 பந்துகளை சந்தித்த ஜெயஸ்வால் ரன் கணக்கை தொடங்காமலே ஆட்டமிழந்தார். அடுத்து பந்த படிக்கல் 23 பந்துகளை சந்தித்தும் ரன் கணக்கை தொடங்காமல் வெளியேறி அதிர்ச்சி அளித்தார்.

4-வது விக்கெட்டுக்கு களமிறங்கிய முன்னாள் கேப்டன் விராட்கோலி, 5 ரன்கள் எடுத்து ஆட்டமிழந்த நிலையில், இந்திய அணி 32 ரன்களுக்கு 3 விக்கெட்டுகளை இழந்து நிலையில், 74 பந்துகளை சந்தித்த ராகுல் 3 பவுண்டரியுடன் 26 ரன்கள் குவித்து ஆட்டமிழந்தாா. உணவு இடைவேளை வரை இந்திய அணி 54 ரன்களுக்கு 4 விக்கெட்டுகளை இழந்து தடுமாறி வருகிறது. பண்ட் 10 ரன்களுடனும், ஜோரல் 4 ரன்களுடனும் களத்தில் இருந்தனர்.

உணவு இடைவேளை முடிந்து மீண்டும் களமிறங்கிய இந்திய அணியில், மேற்கொண்டு 7 ரன்கள் சேர்த்த துருவ் ஜோரேல், 20 பந்துகளில் 11 ரன்கள் எடுத்து ஆட்டமிழந்தார். அடுத்து வந்த வாஷிங்டன் சுந்தர் 4 ரன்னுக்கு அவுட் ஆகி வெளியேறினார்.

இதன்பிறகு களத்தில் இருந்த பண்ட் - நிதிஷ் ரெட்டி ஜோடி, ஆஸ்திரேலிய பந்துவீச்சுக்கு தாக்குப் பிடித்து ஆடியது. இதில், பண்ட் 37 ரன்னில் அவுட் ஆனார். ஹர்ஷித் ராணா 7 ரன்னுக்கும், கேப்டன் பும்ரா 8 ரன்னுக்கும் அவுட் ஆனார். மிடில் ஆடரில் களமாடிய நிதிஷ் ரெட்டி 6 பவுண்டரிகள், 1 சிக்சருடன் 41 ரன்கள் எடுத்த நிலையில் அவுட் ஆனார். 

களத்தில் சிராஜ்  மட்டும் இருக்க, இந்தியாவின்  முதல்  இன்னிங்ஸ் முடிவுக்கு வந்தது. 49.4 ஓவரில் அனைத்து விக்கெட்டையும் இழந்த இந்தியா 150 ரன்கள்  எடுத்தது. ஆஸ்திரேலிய அணி தரப்பில் ஜோஷ் ஹேசில்வுட் 4 விக்கெட்டையும், கம்மின்ஸ், ஸ்டார்க், மார்ஷ்  தலா 2 விக்கெட்டையும் கைப்பற்றினர்.

ஆஸ்திரேலியா பேட்டிங் 

தொடர்ந்து ஆஸ்திரேலிய அணி  அதன் முதல் இன்னிங்சில் ஆடியது. ஆஸ்திரேலிய அணியில்  தொடக்க வீரர்களாக  உஸ்மான் கவாஜா - நாதன் மெக்ஸ்வீனி களமிறங்கிய நிலையில், மெக்ஸ்வீனி 10 ரன்னுக்கும், கவாஜா 8 ரன்னுக்கும் அவுட் ஆகினர். அடுத்து வந்த ஸ்மித் டக்-அவுட்  ஆகி வெளியேறினார். இந்த மூவரின் விக்கெட்டையும் கேப்டன் பும்ரா கைப்பற்றி மிரட்டினார். 

இதன்பின்னர், மார்னஸ் லாபுசாக்னே - டிராவிஸ் ஹெட் ஜோடி அமைத்த நிலையில், ஹெட் 11 ரன்னுக்கும், அடுத்து வந்த மிட்செல் மார்ஷ் 6 ரன்னுக்கும் சிராஜ் பந்தில் அவுட் ஆகி வெளியேறினர். 52 பந்துகள் தாக்குப்பிடித்து களத்தில் இருந்த லாபுசாக்னே 2 ரன்னுக்கு அவுட் ஆனார். அவருக்குப் பின் வந்த கேப்டன் பேட் கம்மின்ஸ் 3 ரன்னில் அவுட் ஆனார். 

அலெக்ஸ் கேரி 19 ரன்னுடனும், மிட்செல் ஸ்டார்க் 6 ரன்னுடனும் களத்தில் இருக்க முதல் நாள் ஆட்டம் முடிவுக்கு வந்தது. 27 ஓவரில் 7 விக்கெட் இழப்புக்கு 67 ரன்கள் எடுத்துள்ள ஆஸ்திரேலிய அணி இந்திய அணியை விட 83 ரன்கள் பின்தங்கிய நிலையில் இருந்தது.

2-ம் நாள் ஆட்டம் - ஆஸ்திரேலியா பேட்டிங் 

களத்தில் இருந்த அலெக்ஸ் கேரி - மிட்செல் ஸ்டார்க் ஜோடி 2ம் நாள் ஆட்டத்தை தொடங்கிய நிலையில், 3 பவுண்ட்ரியை விரட்டிய அலெக்ஸ் கேரி 21 ரன்னுக்கு அவுட் ஆனார். அடுத்து வந்த நாதன் லியான் 5 ரன்னில் அவுட் ஆகி வெளியேறினார். 

களத்தில் இருந்த ஸ்டார்க் - ஜோஷ் ஹேசில்வுட் ஜோடி சிறிது நேரம் தாக்குப் பிடித்த நிலையில், ஸ்டார்க் 26 ரன்னுக்கு அவுட் ஆனார். ஹேசில்வுட் 7 ரன்னுடன் களத்தில் இருக்க ஆஸ்திரேலிய அணியின் முதல் இன்னிங்ஸ் முடிவுக்கு வந்ததது. 51.2 ஓவர்களில் அனைத்து விக்கெட்டையும் பறிகொடுத்த ஆஸ்திரேலியா 104 ரன்கள் எடுத்து இந்திய அணியை விட 46 ரன்கள் பின்னிலையில் இருந்தது. பவுலிங்கில் மிரட்டி எடுத்த இந்திய அணி தரப்பில் பும்ரா 5 விக்கெட்டையும், ராணா 3 விக்கெட்டையும், சிராஜ் 2 விக்கெட்டையும் கைப்பற்றினர். 

இந்தியா பேட்டிங் 

இதனைத் தொடர்ந்து, 46 ரன்கள் முன்னிலையுடன் இந்திய அணி அதன் 2வது இன்னிங்சில் ஆடி வருகிறது. இந்திய அணியில் தொடக்க வீரர்களாக  கே.எல் ராகுல் -  யஷஸ்வி ஜெய்ஸ்வால் ஜோடி களமாடிய நிலையில், இந்த ஜோடி மிகச் சிறப்பாக மட்டையை சுழற்றியது. ஆஸ்திரேலிய பந்துவீச்சை தவிடு பொடியாக்கிய இருவரும் முதல் இன்னிங்ஸை போல் அல்லாமல் சிறப்பான பார்ட்னர்ஷிப்பை அமைத்தனர். 

இந்த ஜோடியில் ஜெய்ஸ்வால் 123 பந்தில் அரைசதம் அடித்தார். இதேபோல், 124 பந்தில் ராகுல் அரைசதம் அடித்தார். ஜெய்ஸ்வால்  90 ரன்னுடனும், ராகுல் 62 ரன்னுடனும் களத்தில் இருக்க 2ம் நாள் ஆட்டம் முடிவுக்கு  வந்தது. இந்திய அணி விக்கெட் இழப்பின்றி, 172 ரன்கள் எடுத்து ஆஸ்திரேலிய அணியை விட 218 ரன்கள் முன்னிலையில் இருந்தது.

3ம் நாள் ஆட்டம்  - இந்தியா பேட்டிங் 

களத்தில் இருந்த ராகுல்  - ஜெய்ஸ்வால் ஜோடியில் சிறப்பாக மட்டையை சுழற்றிய ஜெய்ஸ்வால் 205 பந்துகளில் சதம் அடித்து அசத்தினார். அவர் தனது 2வது சர்வதேச சதத்தை விளாசி அசத்தினார். 

ஆங்கிலத்தில் படிக்க:   India vs Australia LIVE Cricket Score, 1st Test Day 3

அரைசதம் அடித்து சிறப்பான பேட்டிங்கை வெளிப்படுத்திய ராகுல் 176 பந்துகளில் 5 பவுண்டரிகளுடன் 77 ரன்னில் அவுட் ஆனார்.

தற்போது ஜெய்ஸ்வால் - படிக்கல் ஜோடி களத்தில் ஆடி வருகிறார்கள். இந்திய அணி 78 ஓவர்களில் 1 விக்கெட் இழப்பிற்கு 247 ரன்கள் எடுத்து ஆஸ்திரேலிய அணியை விட 293 ரன்கள் வி்தியாசத்தில் முன்னிலையில் இருந்தது. 

இப்போது மதிய உணவு இடைவேளையில் இந்தியா 84 ஓவர் முடிவில் 1 விக்கெட் இழப்பிற்கு 275 ரன்கள் எடுத்துள்ளது. ஆஸ்திரேலிய அணியை விட 321 ரன்கள் முன்னிலையில் உள்ளது.

மதிய உணவு இடைவேளைக்கு பிறகு ஆட்டம் தொடங்கியதும் ஜோஷ் ஹேசில்வுட் ஓவரில் முதல் பந்தில் தேவ்தத் படிக்கல் அவுட் ஆகி வெளியேறினார். ஜோஷ் ஹேசில்வுட் பந்து வீச ஸ்டீவன் ஸ்மித்திடம் கேட்ச் ஆகி அவுட்டானார்.  25 ரன்னில் படிக்கல் அவுட் ஆகி வெளியேறிய நிலையில் விராட் கோலி பேட்டிங் தொடங்கி உள்ளார். இந்தியா 89.5 ஓவரில் 291 ரன்கள் எடுத்துள்ளது.

மிச்செல் மார்ஸ் பந்து வீச்சில் 93.5-வது ஓவரில் ஜெய்ஸ்வால் அவுட் ஆகி வெளியேறினார். 161 ரன்கள் எடுத்து அபாரமாக விளையாடினார். அடுத்து வந்த ரிஷப் பந்த், துருவ் ஜூரல் தலா ஒரு ரன் மட்டுமே எடுத்து அடுத்தடுத்து விக்கெட் இழந்தனர்.

இறுதியாக, விராட் கோலி 100 (143), வாஷிங்டன் சுந்தர் 29 (94), நிதிஷ் ரெட்டி 38 (27) என  சிறப்பாக ரன்களை அடித்ததால், இந்தியா, தனது இரண்டாவது இன்னிங்ஸில் 487/6 ரன்களை அடித்து, டிக்ளெர் அறிவித்தது. இந்தியா மொத்தமாக 533 ரன்கள் முன்னிலை பெற்றுள்ளதால், ஆஸ்திரேலியாவுக்கு 534 ரன்கள் இலக்காக நிர்ணயம் செய்யப்பட்டுள்ளது.

ஆஸ்திரேலியா 2-வது இன்னிங்ஸ்

தொடர்ந்து 534 ரன்கள் வெற்றி இலக்குடன் களமிறங்கிய ஆஸ்திரேலிய அணி அடுத்தடுத்து 3 விக்கெட்டுகளை இழந்தது. தொடக்க வீரர் மெக்சிவென்னே ரன் கணக்கை தொடங்காமல் வெளியேறிய நிலையில், அடுத்து வந்த கேப்டன் கம்மின்ஸ் 2 ரன்னுக்கும், லபுசேன்னே 3 ரன்னுக்கும் வெளியேறியதால், 3-வது நாள் ஆட்ட நேர முடிவில், ஆஸ்திரேலிய அணி 3 விக்கெட் இழப்பிற்கு 12 ரன்கள் எடுத்திருந்தது. கவாஜா ஸ்டீவ் ஸ்மித் களத்தில் இருந்தனர். 

4-வது நாள் ஆட்டம்

4வது நாள் ஆட்டத்தில் தொடர்ந்து விளையாடிய ஆஸ்திரேலிய அணியில் கவாஜா 4 ரன்களுக்கு ஆட்டமிழந்த நிலையில், அடுத்து களமிறங்கிய டிராவிஸ் ஹெட் ஸ்டீவ் ஸ்மித்துடன் ஜோடி சேர்ந்து தடுப்பாட்டத்தில் ஈடுபட்டார். இதனால் ஆஸ்திரேலிய அணியின் விக்கெட் வீழ்ச்சி சிறிது நேரம் தடைபட்ட நிலையில், அணியின் ஸ்கோர் 79 ரன்களை எட்டியபோது 17 ரன்களில் ஸ்டீவ் ஸ்மித் ஆட்டமிந்தார். அடுத்து மீச்செல் மார்ஷ் களமிறங்கினார். 

டிராவிஸ் ஹெட் - மீச்செல் மார்ஷ் இருவரும் விக்கெட் வீழ்ச்சியை தடுத்து நிறுத்திய நிலையில், அவ்வப்போது பவுண்டரி விரட்டிய டிராவிஸ் ஹெட் அரைசதம் கடந்து அசத்தினார். தொடர்ந்து நேர்த்தியான ஆட்டத்தை வெளிப்படுத்திய டிராவிஸ் ஹெட் அரைசதம் கடந்த நிலையில், 101 பந்துகளில் 8 பவுண்டரியுடன் 89 ரன்கள் எடுத்து ஆட்டமிழந்தார். அடுத்து வந்த அலெக்ஸ் கேரி, மீச்செல் மார்ஷூடன் ஜோடி சேர்ந்து சிறிது நேரம் தாக்குபிடித்து ஆடினார்.

இந்தியா அபார வெற்றி

சிறப்பாக விளையாடி அரைசதத்தை நெருங்கிய மார்ஷ் 67 பந்துகளில் 3 பவுண்டரி 2 சிக்சருடன் 47 ரன்கள் எடுத்து தனது விக்கெட்டை பறிகொடுத்தார். 
அடுத்து களமிறங்கிய மீச்செல் ஸ்டார்க் 12 ரன்களுக்கும், லயன் 0 ரன்களுக்கும், ஆட்டமிழந்த நிலையில், தடுப்பாட்டத்தில் ஈடுபட்ட விக்கெட் கீப்பர் அலெக்ஸ் கேரி, 58 பந்துகளில் 8 பவுண்டரியுடன் 36 ரன்கள் எடுத்து கடைசி விக்கெட்டாக வெளியேறினார். இதனால் ஆஸ்திரேலியா அணி 238 ரன்களுக்கு ஆட்டமிழந்தது. இதன் மூலம் இந்திய அணி 295 ரன்கள் வித்தியாசத்தில் ஆழ்த்திரேலியா அணியை வீழ்த்தியது.

இந்திய அணி தரப்பில், பும்ரா சிராஜ் ஆகியோர் தலா 3 விக்கெட்டுகளும், வாஷிங்டன் சுந்தர், 2 விக்கெட்டுகளும், ஹர்ஷித் ராணா, நித்திஷ் ரெட்டி ஆகியோர் தலா ஒரு விக்கெட்டும் வீழ்த்தினர். இந்த வெற்றியின் மூலம் 5 போட்டிகள் கொண்ட டெஸ்ட் தொடரில் இந்திய அணி 1-0 என்ற கணக்கில் முன்னிலை பெற்றுள்ளது. 2-வது போட்டி வரும் டிசம்பர் 6-ந் தேதி அடிலெய்டில் நடைபெற உள்ளது. 

இரு அணியின் ஆடும் லெவன்  வீரர்கள் பட்டியல்:

இந்தியா: கே.எல் ராகுல், யஷஸ்வி ஜெய்ஸ்வால், தேவ்தத் படிக்கல், விராட் கோலி, ரிஷப் பண்ட் (விக்கெட் கீப்பர்), துருவ் ஜூரல், நிதிஷ் ரெட்டி, வாஷிங்டன் சுந்தர், ஹர்ஷித் ராணா, ஜஸ்பிரித் பும்ரா (கேப்டன்), முகமது சிராஜ்.

ஆஸ்திரேலியா: உஸ்மான் கவாஜா, நாதன் மெக்ஸ்வீனி, மார்னஸ் லாபுசாக்னே, ஸ்டீவன் ஸ்மித், டிராவிஸ் ஹெட், மிட்செல் மார்ஷ், அலெக்ஸ் கேரி (விக்கெட் கீப்பர்), பேட் கம்மின்ஸ் (கேப்டன்), மிட்செல் ஸ்டார்க், நாதன் லியான், ஜோஷ் ஹேசில்வுட். 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“