இந்தியா vs ஜெர்மனி: ஹாக்கி அரைஇறுதிப் போட்டியை ஆன்லைனில் லைவ் ஆக பார்ப்பது எப்படி?

33-வது ஒலிம்பிக் திருவிழா பிரான்ஸ் தலைநகர் பாரீசில் கடந்த 28 ஆம் தேதி முதல் கோலாகலமாக நடைபெற்று வருகிறது. இதில் 206 நாடுகளைச் சேர்ந்த 10,714 வீரர், வீராங்கனைகள் பங்கேற்றுள்ளனர். இந்திய தரப்பில் 117 வீரர் - வீராங்கனைகள் கலந்து கொண்டுள்ளனர். 

இந்நிலையில், நேற்று ஞாயிற்றுக்கிழமை மாலை நடைபெற்ற ஆடவர் ஹாக்கி போட்டியின் காலிறுதி ஆட்டம் ஒன்றில் இந்தியா - இங்கிலாந்து (கிரேட் பிரிட்டன்) அணிகள் பலப்பரீட்சை நடத்தின. மிகவும் பரபரப்பாக அரங்கேறிய இந்தப் போட்டியில் இரு அணிகளும் சம பலத்துடன் மல்லுக்கட்டியதால் ஆட்டத்தில் அனல் பறந்தது.

ஆங்கிலத்தில் படிக்கவும்: India vs Germany Semifinal Live Streaming: When and where to watch hockey semifinal match?

வழக்கமான ஆட்ட நேர முடிவில் இரு அணிகளும் 1-1 என்ற கோல் கணக்கில் சமநிலை வகித்தன. இந்தியா தரப்பில் ஹர்மன்ப்ரீத் சிங் 1 கோல் அடித்தார். இங்கிலாந்து தரப்பில் மார்ட்டோன் லீ ஒரு கோல் அடித்தார். இதனையடுத்து வெற்றியாளரை தீர்மானிக்க சூட் அவுட் முறை கடைபிடிக்கப்பட்டது. சூட் அவுட்டில் இந்தியா 4-2 என்ற கோல் கணக்கில் இங்கிலாந்தை வீழ்த்தி அரையிறுதிக்கு முன்னேறி அசத்தியுள்ளது.

அரைஇறுதி மோதல் 

இந்நிலையில், இந்திய ஆடவர் ஹாக்கி அணி நாளை செவ்வாய்க்கிழமை நடைபெறும் அரைஇறுதிப் போட்டியில் பலம் பொருந்திய ஜெர்மனியை எதிர்கொள்கிறது. கிரேட் பிரிட்டனுக்கு எதிரான காலிறுதியில் சிவப்பு அட்டை பெற்றதைத் தொடர்ந்து, இந்தியாவின் முக்கிய டிஃபெண்டர் வீரரான அமித் ரோஹிதாஸ், ஒரு போட்டி போட்டியில் இருந்து சஸ்பெண்ட் செய்யப்பட்டுள்ளார். இதனால், அவர் ஜெர்மனிக்கு எதிரான அரையிறுதியில் விளையாடமாட்டார். இதன் விளைவாக, இந்திய அணியில் 15 வீரர்கள் இருப்பார்கள். இது இந்தியாவுக்கு சற்று பின்னடைவாகப் பார்க்கப்படுகிறது. 

இந்தியா vs ஜெர்மனி ஹாக்கி: நேருக்கு நேர்

ஒலிம்பிக் வரலாற்றில் இந்தியாவும் ஜெர்மனியும் 18 முறை நேருக்கு நேர் மோதியதில் இந்தியா 8-6 என முன்னிலை பெற்றுள்ளது. நான்கு போட்டிகள் டிராவில் முடிந்துள்ளன. ஜெர்மனியின் 37 கோல்களுடன் ஒப்பிடும்போது இந்தியா 41 கோல்களை அடித்துள்ளது. 

டோக்கியோ ஒலிம்பிக்கில் நடந்த வெண்கலப் பதக்கப் போட்டியில் இந்தியா 5-4 என்ற கணக்கில் வென்று அசத்தியது. கடைசி நேரத்தில் இந்திய கோல் கீப்பர் ஸ்ரீஜேஷ் சிறப்பாக பங்காற்றி இருந்தார். 

இந்தியா - ஜெர்மனி அணிகள் கடைசியாக விளையாடிய 6 போட்டிகளில் இந்தியா ஐந்தில் வெற்றி பெற்றுள்ளது. எவ்வாறாயினும், எஃப்.ஐ.எச் புரோ-வில் ஜெர்மனி 3-2 என்ற கோல் கணக்கில் இந்தியாவை வீழ்த்தியது. 

இந்தியா vs ஜெர்மனி ஒலிம்பிக் ஹாக்கி அரைஇறுதிப் போட்டியை லைவ் ஆகப் பார்ப்பது எப்படி? 

இந்தியா மற்றும் ஜெர்மனி அரைஇறுதி ஆட்டம் நாளை செவ்வாய்கிழமை (ஆகஸ்ட் 6) இரவு 10:30 மணிக்கு இந்திய நேரப்படி நடைபெறுகிறது. ரசிகர்கள் போட்டியை ஸ்போர்ட்ஸ் 18 1 மற்றும் ஸ்போர்ட்ஸ் 18 2 சேனல்களில் நேரலையில் பார்க்கலாம். அல்லது ஜியோசினிமா ஆப் மற்றும் இணையதளத்தில் லைவ் ஆக பார்க்கலாம்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“