India vs Malaysia Hockey Asian Championship 2023: ஆசியக் கோப்பை ஹாக்கி போட்டியில் இந்தியா மற்றும் மலேசியா அணிகள் ஞாயிற்றுக்கிழமை மோதுகின்றன.
ஆசியக் கோப்பை ஹாக்கி போட்டிகள் சென்னையில் நடைபெற்று வருகிறது. போட்டியின் தொடக்க ஆட்டத்தில் சீனாவை 7-2 என்ற கோல் கணக்கில் வென்ற பிறகு, இந்தியா அணி பலம் வாய்ந்த ஜப்பானிடம் 1-1 என்ற கோல் கணக்கில் டிரா செய்தது. ஜப்பான் அணி தற்போது அட்டவணையில் 2வது இடத்தில் உள்ளது. இதற்கிடையில், மலேசியா அணி பாகிஸ்தான் (3-1), மற்றும் சீனா (5-1) ஆகியவற்றுக்கு எதிராக எளிதான வெற்றிகளைப் பதிவுசெய்துள்ளது.
இந்தநிலையில், இந்தியா மற்றும் மலேசியா அணிகள் மோதுகின்றன. இந்த ஆட்டம் சென்னையில் நடைபெறுகிறது. இது இந்திய அணிக்கு சாதகமாக இருக்கும் என எதிர்ப்பார்க்கப்படுகிறது.
இந்த அணியில் கேப்டன் ஹர்மன்ப்ரீத் சிங் சிறப்பாக விளையாடி வருகிறார். குறிப்பாக பெனால்டி கார்னர் ஷாட்களை கோல்களாக மாற்றுவதில் வல்லவர். ஜப்பானுக்கு எதிரான டிராவில் இந்தியாவுக்காக ஒரே கோல் அடித்தவர் கேப்டன் ஹர்மன்ப்ரீத் சிங் தான்.
இரு அணி வீரர்கள் விவரம்
இந்தியா: வருண் குமார், ஜர்மன்ப்ரீத் சிங், மன்பிரீத் சிங், ஹர்திக் சிங், மன்தீப் சிங், கிரிஷன் பகதூர் பதக் (கோல் கீப்பர்), ஹர்மன்ப்ரீத் சிங், சுமித், ஷம்ஷேர் சிங், ஆகாஷ்தீப் சிங், சுக்ஜீத் சிங்
மலேசியா: மர்ஹான் ஜலீல், பைசல் சாரி, ஃபிர்ஹான் அஷாரி, ரஸி ரஹீம், ஃபைஸ் ஜலி, அசுவான் ஹசன், ஹபிசுதீன் உத்மான் (கோல் கீப்பர்), அபு கமல் அஸ்ராய், நஜ்மி ஜஸ்லான், முஹம்மது ஹசன், அமிருல் அஸாஹர்
இந்த ஆட்டத்தில் இந்திய வீரர் கார்த்தி செல்வம் 15 ஆவது நிமிடத்தில் கோல் அடித்து அசத்தினார். பின்னர் முதல் பாதி வரை யாரும் கோல் அடிக்கவில்லை. இரண்டாவது பாதியின் இரண்டாவது நிமிடத்தில் இந்தியா கோல் அடித்தது. ஹர்திக் சிங் பெனால்டி கார்னர் மூலம் கோல் அடித்தார்.
அடுத்த பத்து நிமிடங்களில் இந்தியாவுக்கு மற்றொரு கோல் கிடைத்தது. ஹர்மன்பிரீத் சிங் 42 ஆவது நிமிடத்தில் கோல் அடித்தார். மலேசிய அணி கோல் அடிக்க முடியாமலும், இந்தியாவின் ஆதிக்கத்தை கட்டுப்படுத்த முடியாமலும் திணறியது. அடுத்ததாக குர்ஜந்த் சிங் 53 ஆவது நிமிடத்தில் கோல் அடித்து அசத்தினார். அடுத்த நிமிடத்திலே ஜுக்ராஜ் சிங் கோல் அடித்தார். இதனால் இந்திய அணி 5 கோல்கள் அடித்து முன்னிலையில் இருந்தது.
மலேசிய அணியால் ஒரு கோல் கூட அடிக்க முடியாததால் இந்திய அணி 5-0 என்ற கணக்கில் அபார வெற்றி பெற்றது. இந்த வெற்றி மூலம் இந்திய அணி புள்ளி பட்டியலில் முதலிடத்திற்கு முன்னேறியுள்ளது.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil