![Indian cricket new challenge Nearly half in IPL 2024 played one or no Ranji game this season Tamil News](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/VURpIn3z86QDZ6u9Hr1C.jpg)
ஜார்கண்ட் அணியின் இஷான் கிஷான் ரஞ்சி தொடரில் விளையாடி இந்தியாவுக்கு மீண்டும் களமிறங்க வேண்டும் என்று இந்திய பயிற்சியாளர் ராகுல் டிராவிட் கூறியிருந்தார்.
IPL 2024 | BCCI: 17-வது ஐ.பி.எல் கிரிக்கெட் திருவிழா நாளை வெள்ளிக்கிழமை முதல் இந்தியா முழுதும் உள்ள பல்வேறு நகரங்களில் அரங்கேறி நடைபெற உள்ளது. 2008 ஆம் ஆண்டு முதல் நடந்து வரும் இந்த தொடரில் இருந்து வரும் நீண்ட கால சிக்கல் குறித்து கடந்த மாதம், பி.சி.சி.ஐ வெளிப்படுத்தியது.
அதாவது, "உள்நாட்டு கிரிக்கெட்டை விட ஐ.பி.எல்" போட்டிகளுக்கு இந்திய வீரர்கள் அதிக முக்கியத்துவம் கொடுப்பது குறித்து கடுமையாக எச்சரித்தது. அதற்கு முன்மாதிரியாக, இரண்டு இளம் வீரர்களான ஸ்ரேயாஸ் ஐயர் மற்றும் இஷான் கிஷான் இந்த சீசனில் ரஞ்சி டிராபி போட்டிகளில் தவறவிட்டதற்காக அதன் ஒப்பந்த பட்டியலில் இருந்து விலக்கியது.
இது போன்ற வீரர்களின் போக்கை பி.சி.சி.ஐ இப்போது கட்டுப்படுத்தத் துடிப்பதற்கு காரணம் இருக்கிறது. தி இந்தியன் எக்ஸ்பிரஸ் அலசி ஆராய்ந்த 10 அணிகளின் பட்டியல் படி, ஐ.பி.எல் 2024 போட்டிக்கு கையெழுத்திட்ட 165 இந்திய கிரிக்கெட் வீரர்களில், 56 பேர் தங்கள் மாநில அணிகளில் இருந்தபோதிலும், இந்த வாரம் முடிவடைந்த ரஞ்சி சீசனில் ஒரு ஆட்டத்தில் கூட விளையாடவில்லை. மேலும் 25 பேர் ஒரே ஒரு போட்டியில் மட்டுமே ஆடியுள்ளனர்.
“இது கவலைக்குரிய விஷயம். வேகப்பந்து வீச்சாளர்களை மறந்துவிடுங்கள் (காயத்தால் பாதிக்கப்படுபவர்கள்), ஐ.பி.எல் ஒப்பந்தத்தில் உள்ள பேட்டர்கள் கூட ரஞ்சி டிராபியை விளையாட விரும்பவில்லை. ரஞ்சிக் கோப்பைக்குப் பிறகு ஐ.பி.எல் ஏலத்தை நடத்த பி.சி.சி.ஐ-யிடம் கோரிக்கை வைத்துள்ளோம். இதன் காரணமாக நாங்கள் பெரிதும் பாதிக்கப்படுகிறோம், ”என்று ஜம்மு மற்றும் காஷ்மீர் மாநில கிரிக்கெட் சங்க நிர்வாக அதிகாரி அனில் குப்தா கூறினார்.
நான்கு மணி நேர ஐ.பி.எல்-லில் காயம் இல்லாமல் இருக்க, கிரிக்கெட் வீரர்கள் நான்கு நாள் ரஞ்சி ஆட்டங்களைத் தவறவிடுகிறார்கள் என்று அதிகாரிகள் சுட்டிக்காட்டுகின்றனர். ஆனால், வீரர்களை மட்டும் குற்றம் சாட்டுவது ஏன்? என்று அவர்கள் கேள்வி எழுப்பிகிறார்கள்.
“பிசிசிஐ அவர்களை தப்பிக்க அனுமதிக்கிறது. தெளிவான கொள்கை அல்லது உடற்தகுதி நெறிமுறை இல்லாமல், ஐபிஎல் நட்சத்திரங்களை முதல்தர கிரிக்கெட்டை விளையாட கட்டாயப்படுத்துவதில் மாநில சங்கங்கள் உதவியற்றவையாக இருக்கின்றன,” என்று மூத்த மாநில கிரிக்கெட் சங்க அதிகாரி ஒருவர் தெரிவித்தார்.
ரஞ்சி டிராபி தரவுகள் மற்றும் மாநில கிரிக்கெட் சங்க அதிகாரிகள் மற்றும் ஐ.பி.எல் அணிகளின் நேர்காணல்களிலிருந்து எடுக்கப்பட்ட இந்த எடுத்துக்காட்டுகளை விட நெருக்கடியை எதுவும் சிறப்பாக விளக்கவில்லை - ரஞ்சி ஆட்டங்களைத் தவறவிடுவதற்கு கிரிக்கெட் வீரர்கள் பெரும்பாலும் காயங்கள்தான் அதிகாரப்பூர்வ காரணம்.
ஐ.பி.எல்-லில் அதிக வருமானம் ஈட்டிய மும்பை இந்தியன்ஸ் அணியின் புதிய கேப்டனான ஹர்திக் பாண்டியா மற்றும் லக்னோ சூப்பர்ஜெயன்ட்ஸ் (எல்எஸ்ஜி) ஆல்ரவுண்டரான அவரது சகோதரர் க்ருனால் பாண்டியா ஆகியோர் பரோடா அணிக்காக ரஞ்சியில் சிறிது காலம் விளையாடவில்லை. ஹர்திக் கடைசியாக 2018 இல் தான் உள்நாட்டுப் போட்டியில் விளையாடினார்.
"அதற்கான காரணத்தை பாண்டிய சகோதரர்கள் எங்களிடம் தெரிவிக்கவில்லை. அவர்கள் இருக்கும் போது பயிற்சியாளர் அல்லது சங்கத் தலைவரைத் தொடர்பு கொள்கிறார்கள், ஆனால் அவர்கள் இப்போது ரஞ்சி விளையாடவில்லை. க்ருனால் இந்த சீசனில் பரோடாவுக்காக மட்டுப்படுத்தப்பட்ட ஓவர் கிரிக்கெட்டில் விளையாடினார், ஹர்திக் காயத்தில் இருந்து மீண்டு வருகிறார்,” என்று பரோடா கிரிக்கெட் சங்க செயலாளர் அஜித் லெலே தெரிவித்தார்.
உம்ரான் மாலிக் தனது அதிவேக பந்துவீச்சின் (மணிக்கு 150 கி/மீ) தலைப்புச் செய்திகளை ஆக்கிரமித்தப் பிறகு, ஜம்மு மற்றும் காஷ்மீர் அணியிலிருந்து மற்ற இரண்டு வேகப்பந்து வீச்சாளர்களான ரசிக் சலாம் தார் மற்றும் யுத்வீர் சிங் சரக் ஆகியோர் ஐ.பி.எல்-க்கு தேர்ந்தெடுக்கப்பட்டனர். இருவரும் தற்போது முழு ரஞ்சி சீசனையும் தவறவிட்டனர்.
“ராசிக் முகாமில் அவரது தசைநார் காயம் அடைந்தார், யுத்வீர் எல்.எஸ்.ஜி-யிடம் இருந்து மருத்துவ அறிக்கையைப் பெற்றார், அவருக்கு தோள்பட்டையில் சிறிய காயம் உள்ளது. அவர்கள் எங்கள் பிசியோக்களால் சரிபார்க்கப்படவில்லை. உம்ரான் கூட ரஞ்சி டிராபியில் விளையாட தயங்கினார்,” என்று ஜம்மு மற்றும் காஷ்மீர் கிரிக்கெட் சங்க அதிகாரி அனில் குப்தா கூறினார்.
ஜார்கண்ட் அணியின் இஷான் கிஷான் ரஞ்சி தொடரில் விளையாடி இந்தியாவுக்கு மீண்டும் களமிறங்க வேண்டும் என்று இந்திய பயிற்சியாளர் ராகுல் டிராவிட் கூறியிருந்தார். ஆனால் ஜார்கண்ட் மாநில கிரிக்கெட் சங்கத் தலைவர் சஞ்சய் சஹய், “அவர் தன்னை ஒருபோதும் ரஞ்சிக்கு கிடைக்கச் செய்யவில்லை. பயிற்சியாளர், தேர்வாளர்கள் அல்லது பி.சி.சி.ஐ-யிடம் இருந்து எங்களுக்கு எந்த வழிகாட்டுதலும் வரவில்லை." என்று கூறினார்.
2014 ஆம் ஆண்டு முதல் விதர்பா அணிக்காக ரஞ்சியில் விளையாடும் ஜிதேஷ் ஷர்மா தனது முதல் ஐபிஎல் ஒப்பந்தத்தை 2022 இல் பெற்றார். இந்த ஜனவரியில், அவர் முதலில் இந்தியா-ஆப்கானிஸ்தான் டி20 தொடரில் விளையாடினார், பின்னர் அதே மாதத்தில் ரஞ்சி ஆட்டத்தில் விளையாடினார். இந்த ஆண்டு நடந்த ரஞ்சியில் விதர்பா அணி இறுதிப் போட்டிக்கு முன்னேறிய நிலையில், அவர் அந்தப் போட்டி உட்பட ஒன்பது ரஞ்சி ஆட்டங்களை அவர் தவறவிட்டார்.
“கடைசியாக எங்களுக்குத் தெரிந்தது, ஜிதேஷ் தனக்கு இடுப்பு பகுதியில் ஏதோ பிரச்சனை இருப்பதாக மருத்துவ அறிக்கையை சமர்பித்தார். அவர் சங்கத்திற்கு ஃபிட்னஸ் அப்டேட்டை வழங்கவில்லை. எங்களைப் பொறுத்த வரையில், அவர் காயமடைந்துள்ளார், ”என்று விதர்பாவின் தேர்வுக் குழுத் தலைவர் சுஹாஸ் பட்கர் கூறினார்.
சாஹர் சகோதரர்கள் - தீபக் (சென்னை சூப்பர் கிங்ஸ்) மற்றும் ராகுல் (பஞ்சாப் கிங்ஸ்) - ரஞ்சி டிராபியில் ராஜஸ்தானை பிரதிநிதித்துவப்படுத்துகின்றனர். ஆனால் இந்த சீசனில் ராகுல் ஒரு ஆட்டமும், தீபக் எதுவும் விளையாடவில்லை. "அவர்கள் ரஞ்சி ஆட்டங்களைத் தேர்ந்தெடுத்து தேர்வு செய்கிறார்கள் அல்லது அவர்கள் தகுதியற்றவர்கள் என்று தங்கள் ஐ.பி.எல் அணிகளிடமிருந்து மருத்துவ அறிக்கைகளை சமர்ப்பிக்கிறார்கள். இது பல ஆண்டுகளாக நடந்து வருகிறது” என்று ராஜஸ்தான் கிரிக்கெட் சங்க அதிகாரி ஒருவர் தெரிவித்தார்.
சென்னை சூப்பர் கிங்ஸ் (சி.எஸ்.கே) வேகப்பந்து வீச்சாளர்கள் ராஜ்வர்தன் ஹங்கர்கேகர் மற்றும் முகேஷ் சவுத்ரி ஆகியோர் காயம் காரணமாக இந்த சீசனில் ரஞ்சி ஆட்டத்தில் விளையாடவில்லை, ஆனால் அவர்களது சொந்த சங்கமான மகாராஷ்டிரா, அவர்களின் உடற்தகுதி குறித்து தெளிவுபடுத்தவில்லை.
“ஹங்கர்கேகர் மற்றும் முகேஷ் காயம் அடைந்துள்ளனர், அவர்கள் எப்போது உடல்தகுதியுடன் இருப்பார்கள் என்பது எங்களுக்குத் தெரியாது. இந்த சீசனில் அவர்கள் ரஞ்சி தொடரை இழக்க இதுவே காரணம். பிசியோக்கள் அவர்களைக் கண்காணித்து வருவதால் அவர்களின் காயங்களின் தன்மை எனக்குத் தெரியாது, ”என்று கடந்த மாதம் வரை மகாராஷ்டிர கிரிக்கெட் சங்க செயலாளராக இருந்த சுபேந்திர பண்டார்கர் கூறினார்.
இப்போது இதைக் கவனியுங்கள்: மும்பையின் ரஞ்சி வென்ற அணியில் இருந்த பூபென் லால்வானி, 10 முதல் தர போட்டிகளில் விளையாடியதற்காக 17,20,000 ரூபாய் பெற்றார். மாறாக, கடந்த ஐ.பி.எல் ஏலத்தில் ஒரு வீரரின் குறைந்த அடிப்படை விலையே ரூ.20 லட்சமாக இருந்தது.
ஐ.பி.எல் வீரர்கள் மற்றும் அவர்களின் நம்பிக்கையாளர்கள் காணும் ஒரே உள்நாட்டுப் போட்டியாக சையத் முஷ்டாக் அலி டி20 மற்றும் 50 ஓவர் விஜய் ஹசாரே டிராபி ஆகியவை மட்டுமே உள்ளன என்பதில் ஆச்சரியமில்லை. திறமையான தேர்வுக்குழுவை அனுப்பும் ஐ.பி.எல் அணிகளால், இந்த ஒயிட்-பால் போட்டிகள் ஐ.பி.எல் ஒப்பந்தங்களுக்கான நுழைவாயில்களாக மாறிவிட்டன. ரஞ்சி போட்டிகள் முற்றிலும் மறக்கடிக்கப்பட்டுள்ன.
முன்னாள் இந்திய கேப்டனும், பி.சி.சி.ஐ கவுன்சில் மூத்த உறுப்பினருமான திலீப் வெங்சர்க்கரின் கூற்றுப்படி, முதல் தர கிரிக்கெட் உங்களை சிறந்த கிரிக்கெட் வீரராக மாற்றுகிறது. "நீண்ட நேரம் களத்தில் ஆடுவது மன கடினத்தன்மை மற்றும் மனோபாவத்தை வளர்க்க உதவுகிறது, இது ஷார்ட் ஃபார்மெட்டுகளில் கூட ஒரு நல்ல கிரிக்கெட் வீரராக மாற உதவுகிறது," என்று அவர் கூறினார்.
உண்மையில், ஐ.பி.எல் புள்ளிவிவரங்கள் படி, டி20 லீக்கில் அதிக ரன்கள் எடுத்த முதல் 10 வீரர்கள் பட்டியலில் உள்ள ஒவ்வொரு பேட்ஸ்மேன்களும் 100 முதல் தர ஆட்டங்களில் விளையாடியுள்ளனர். அதே நேரத்தில் அவர்களின் பட்டியலில் உள்ள குறைந்தது 8 பந்துவீச்சாளர்கள் 50 க்கும் மேற்பட்ட போட்டிகளில் விளையாடியுள்ளனர்.
“19 வயதுக்குட்பட்ட கிரிக்கெட் வீரர்கள் டி20 வடிவத்தில் விளையாட அனுமதிக்கக் கூடாது என்று நான் உறுதியாக நம்புகிறேன். இப்போதெல்லாம் என்ன நடந்தது என்றால், பள்ளி கிரிக்கெட்டில் கூட அவர்கள் டி20 வடிவத்தில் மட்டுமே விளையாடுகிறார்கள், ”என்று 116 டெஸ்ட் போட்டிகளில் விளையாடி, தேர்வாளர்களின் தலைவராக இருந்த காலத்தில் கோலியின் திறனைக் கண்டறிந்த திலீப் வெங்சர்க்கார் கூறினார்.
சில ஐ.பி.எல் அணிகள் தங்கள் கிரிக்கெட் வீரர்கள் நீண்ட ஃபார்மெட்டில் விளையாட வேண்டும் என்று வலியுறுத்துவதாகக் கூறுகின்றனர். "இந்த வீரர்கள் ரஞ்சி விளையாட வேண்டும் என்று நாங்கள் வலியுறுத்தி வருகிறோம், ஏனென்றால் நீங்கள் கிரிக்கெட் வீரர்களாக வளர்கிறீர்கள்" என்று சி.எஸ்.கே அணியின் சி.இ.ஓ காசி விஸ்வநாதன் கூறினார்.
உத்தரகாண்ட் ரஞ்சி பயிற்சியாளர் மணீஷ் ஜாவின் கூற்றுப்படி, கடந்த மாதம் பி.சி.சி.ஐ செயலாளர் ஜெய் ஷாவின் எச்சரிக்கை சரியான நேரத்தில் வந்தது. “நாட்டின் முதன்மையான உள்நாட்டு கிரிக்கெட் போட்டியில் விளையாட வீரர்கள் உண்மையிலேயே ஆர்வம் காட்டாததால், இது ரஞ்சி கோப்பையை காப்பாற்றியுள்ளது. ஐ.பி.எல் இந்திய உள்நாட்டு கிரிக்கெட்டில் குழப்பத்தை ஏற்படுத்துகிறது,” என்று கூறினார்.
ஆங்கிலத்தில் படிக்கவும்: Indian cricket’s new challenge: Nearly half in IPL 2024 played one or no Ranji game this season
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.