Chennai Super Kings | Csk Vs Rcb | IPL 2024 | Chepauk: 17-வது ஐ.பி.எல். டி-20 கிரிக்கெட் போட்டி சென்னை சேப்பாக்கத்தில் நாளை வெள்ளிக்கிழமை கண்கவர் கலை நிகழ்ச்சியுடன் கோலாகலமாக தொடங்குகிறது. இரவு 8 மணிக்கு நடக்கும் தொடக்க ஆட்டத்தில் நடப்பு சாம்பியன் ருதுராஜ் கெய்க்வாட் தலைமையிலான சென்னை சூப்பர் கிங்ஸ் - பாப் டு பிளிஸ்சிஸ் தலைமையிலான பெங்களூரு ராயல் சேலஞ்சர்ஸ் அணிகள் மோதுகின்றன.
சேப்பாக்கம் ஆடுகளம்
சென்னை சேப்பாக்கம் மைதானத்தில் உள்ள ஆடுகளம் சுழற்பந்துவீச்சாளர்களின் சொர்க்க பூமியாக திகழ்கிறது. ஆடுகளம் மெதுவானதாகவும், சுழற்பந்து வீச்சாளர்களுக்கு சாதகமாகவும் இருக்கும். அதனால், பேட்ஸ்மேன்கள் மற்றும் வேகப்பந்து வீச்சாளர்கள் என இருவரும் தனித்துவமான சவால்களை எதிர்கொள்வார்கள்.
முதல் இரண்டு போட்டிகளுக்கு ஆடுகளம் புதிதாக இருக்கும் என்பதால், அதிக ரன்கள் குவிக்கப்படலாம். மேலும், இரு அணிகளும் கூடுதல் சுழற்பந்து வீச்சு விருப்பத்துடன் களமாடலாம். பேட்டர்கள் நிலைமைகளைப் படித்து, அதற்கேற்ப தங்கள் ஆட்டத்தை மாற்றியமைப்பதன் மூலம் ஆடுகளத்தின் சவால்களை சமாளிக்க முடியும். பேட்டர்கள் கூடுதல் கவனமாக இருப்பதும், சிக்ஸர் அடிக்கும் வாய்ப்புகளுக்காகக் காத்திருப்பதும், கவனமான ஷாட்களுடன் அவற்றைப் பயன்படுத்திக் கொள்வதும் இங்கு முக்கியமானதாக இருக்கும்.
முந்தைய ஐ.பி.எல் சீசனில் இங்கு முதல் இன்னிங்சில் சராசரியாக 170 ரன்கள் எடுக்கப்பட்டது. ஐ.பி.எல் வரலாற்றில் நான்கு முறை மட்டுமே இந்த மைதானத்தில் மொத்தம் 210 ரன்களுக்கு மேல் எடுக்கப்பட்டுள்ளது. பொதுவாக, இங்கு டாஸ் வென்ற அணிகள் முதலில் பந்துவீச்சைத் தேர்வு செய்யும்.
சென்னை சேப்பாக்கம் எம்.ஏ சிதம்பரம் ஸ்டேடியம்சென்னை சூப்பர் கிங்ஸ் (சி.எஸ்.கே) அணியின் கோட்டையாக திகழ்கிறது. இங்கு அந்த அணி கடைசியாக விளையாடிய 5 போட்டிகளில் 4ல் வெற்றி பெற்றுள்ளது. ராயல் சேலஞ்சர்ஸ் பெங்களூரு அணிக்கு எதிரான கடைசி ஆட்டத்தில் சென்னை அணி 8 ரன்கள் வித்தியாசத்தில் வெற்றி பெற்றது குறிப்பிடத்தக்கது.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“