பாகிஸ்தான் - யு.ஏ.இ ஆசியக் கோப்பை போட்டி தாமதம்; பி.சி.பி - ஐ.சி.சி பேச்சுவார்த்தை

ஆசியக் கோப்பையில் ஐக்கிய அரபு அமீரகத்திற்கு (யு.ஏ.இ) எதிராக பாகிஸ்தான் கட்டாயம் வெல்ல வேண்டிய போட்டி தாமதமானது. ஏனெனில், பாகிஸ்தான் கிரிக்கெட் வாரியம் (பி.சி.பி) தனது அணியை மைதானத்திற்குச் செல்ல வேண்டாம் என்று தடுத்தது. மேலும், வீரர்களை அணியின் ஹோட்டலில் அடுத்த அறிவிப்புக்காக காத்திருக்கச் சொன்னதாக பல அறிக்கைகள் உறுதிப்படுத்தின. பி.சி.பி தலைவர் மற்றும் ஆசிய கிரிக்கெட் கவுன்சில் (ஏ.சி.சி) தலைவர் மொஹ்சின் நக்வி பின்னர் தனது எக்ஸ் கணக்கில்  “நாங்கள் பாகிஸ்தான் அணியை துபாய் கிரிக்கெட் மைதானத்திற்கு புறப்படச் சொல்லியுள்ளோம். மேலும் விவரங்கள் பின்னர் வரும்” என்று உறுதிப்படுத்தினார்.

ஆங்கிலத்தில் படிக்க:

புதன்கிழமை நடக்கவிருந்த போட்டியில் பாகிஸ்தானின் பங்கேற்பு குறித்த குழப்பம், துபாய் மற்றும் அபுதாபியில் நடந்து வரும் போட்டியில் அவர்களின் அடுத்தடுத்த பங்களிப்பு குறித்து நிச்சயமற்ற தன்மையை ஏற்படுத்தியது. பி.சி.பி அதன் தலைமையகத்தில் அவசர செய்தியாளர் சந்திப்புக்கு அழைப்பு விடுத்துள்ளதாகவும், அங்கு ஒரு தெளிவான விவரம் கிடைக்கும் என்று எதிர்பார்க்கப்படுவதாகவும் அறிக்கைகள் உறுதிப்படுத்தின.

கடந்த ஞாயிற்றுக்கிழமை நடந்த போட்டியில் இந்திய வீரர்கள் பாகிஸ்தான் வீரர்களுடன் கைகுலுக்க மறுத்த பிறகு, போட்டி நடுவர் ஆண்டி பைகிராஃப்டை மாற்றுமாறு பி.சி.பி கோரி வருகிறது. பைகிராஃப்ட் இந்தியக் கேப்டன் சூர்யகுமார் யாதவ் மற்றும் பாகிஸ்தான் கேப்டன் சல்மான் அலி ஆகா ஆகியோரை டாஸின் போது கைகுலுக்க வேண்டாம் என்று அறிவுறுத்தியதாக அவர்கள் கூறியதால், ஐக்கிய அரபு அமீரகத்திற்கு எதிரான போட்டிக்கு ஜிம்பாப்வேவைச் சேர்ந்த பைகிராஃப்டை நீக்கி, அவருக்கு பதிலாக ரிச்சி ரிச்சர்ட்சனை நியமிக்குமாறு பி.சி.பி சர்வதேச கிரிக்கெட் கவுன்சிலிடம் கோரிக்கை வைத்திருந்தது. இருப்பினும், ஐ.சி.சி, பி.சி.பி-யின் கோரிக்கையை ஏற்கவில்லை, மாறாக, புதன்கிழமை போட்டிப் பட்டியலில் குறிப்பிட்டுள்ளபடி பைகிராஃப்ட் துபாய் சர்வதேச மைதானத்தில் காணப்பட்டார். புதன்கிழமை போட்டி தாமதமானதால் இரண்டு அமைப்புகளுக்கும் இடையே தொடர்ந்து கருத்து மோதல்கள் தொடர்ந்தன.

பகல்காம் பயங்கரவாத தாக்குதல் மற்றும் அதைத் தொடர்ந்து நடந்த 'ஆபரேஷன் சிந்தூர்' ஆகியவற்றின் பின்னணியில், கைகுலுக்க வேண்டாம் என்று சூர்யா முடிவெடுத்த பிறகு, டாஸின் போது எந்த கைகுலுக்கலும் இருக்காது என்று பைகிராஃப்ட் ஆகாவிடம் தெரிவித்ததாக பி.சி.பி வாதிட்டது. பரம எதிரிகளுக்கு இடையிலான போட்டி நடந்தாலும், இந்தியா வெற்றி பெற்ற பிறகு இரு அணிகளுக்கும் இடையே வழக்கமான கைகுலுக்கல் எதுவும் இல்லை.

போட்டிக்குப் பிறகு, பாகிஸ்தான் வீரர்கள் மற்றும் அவர்களின் ஆதரவு ஊழியர்கள் காத்திருந்தாலும் இந்திய வீரர்கள் ஆடை மாற்றும் அறைக்குச் சென்றனர். பின்னர், பாகிஸ்தான் போட்டிக்குப் பிறகு நடந்த பரிசளிப்பு விழாவில் கலந்துகொள்ளவில்லை, தலைமை பயிற்சியாளர் மைக் ஹெஸ்ஸன் செய்தியாளர் கூட்டத்தில் இந்தியர்களின் செய்கை குறித்து தனது ஏமாற்றத்தை வெளிப்படுத்தினார்.

அன்றிலிருந்து, பைகிராஃப்டை போட்டியில் இருந்து நீக்குமாறு பி.சி.பி கோரி வருகிறது, அதை ஏற்க ஐ.சி.சி மறுத்துவிட்டது. இந்த நிகழ்வை நடத்தும் ஆசிய கிரிக்கெட் கவுன்சிலின் தலைவராகவும் பி.சி.பி தலைவர் மொஹ்சின் நக்வி உள்ளார்.