worldcup 2023 | pakistan-vs-afghanistan | babar-azam: கடந்த 20 ஆண்டுகளாக ஹாக்கி மற்றும் ஸ்குவாஷில் பாகிஸ்தான் அதிர்ச்சிகரமான மற்றும் தொடர்ச்சியான சரிவை சந்தித்துள்ளது. 3 ஒலிம்பிக் தங்கங்களையும், ஹாக்கியில் 4 உலகக் கோப்பைப் பட்டங்களையும் வென்ற ஒரு நாடு, தொடர்ந்து 3வது ஒலிம்பிக் போட்டிகளைத் தவறவிடும் விளிம்பில் இருப்பது பேரழிவு தான் என்பதைத் தவிர வேறில்லை. 80 மற்றும் 90 களில், ஸ்குவாஷ் போட்டியில் ஜான்ஷர் கான் மற்றும் ஜஹாங்கீர் கான் போன்ற ஜாம்பாவான்கள் ஆதிக்கம் செலுத்தினர். 1996ல் பிரிட்டிஷ் ஓபனில் ஜான்ஷரின் கடைசி வெற்றியைத் தொடர்ந்து, பாகிஸ்தானில் ஸ்குவாஷ் ஒரு விளையாட்டாக மட்டுமே குறைந்துவிட்டது.
தற்போது நடைபெற்றும் வரும் ஒருநாள் உலகக் கோப்பையில் பாகிஸ்தான் சென்னையில் ஆப்கான் அணிக்கு எதிரான தோல்வியைத் தொடர்ந்து, பாகிஸ்தானில் ஹாக்கி மற்றும் ஸ்குவாஷுக்கு நேர்ந்த கதி தான் கிரிக்கெட்டும் நிகழுமா? என்ற கேள்வி எழுந்துள்ளது.
ஆங்கிலத்தில் படிக்கவும்: Pakistan’s World Cup loss against Afghanistan opens can of worms; flood of criticism directed at Babar Azam
'ஏ ஸ்போர்ட்ஸ்' என்ற டி.வி-யில் ஒளிபரப்பாகும் கிரிக்கெட் நிகழ்ச்சியான 'தி பெவிலியன்' நிகழ்ச்சியில், அதன் தொகுப்பாளரான ஃபகர்-இ-ஆலம், தன்னுடன் அமர்ந்திருந்த முன்னாள் கேப்டன்களான வாசிம் அக்ரம், மொயின் கான், சோயிப் மாலிக் மற்றும் மிஸ்பா-உல்-ஹக் ஆகியோரிடம் இந்தக் கேள்வியைக் கேட்டார். அவரின் இந்த கேள்விக்கு எந்த பதிலும் கிடைக்கவில்லை.
பாகிஸ்தானின் மூத்த பத்திரிக்கையாளர் ஷாகித் ஹஷ்மி சென்னை சேப்பாக்கத்தில் இருந்து ஆரி நியூஸில் தனது செய்தி அறிக்கையை போட்டியின் பாதிலே பாகிஸ்தானின் சரிவு குறித்து வெளிப்படுத்தினார். அந்த நிகழ்ச்சியில் பங்கேற்ற விருந்தினர்களில் ஒருவரான பாசித் அலி, "இது முழு பாகிஸ்தானியர்களின் வலி" என்று கூறினார்.
எவ்வாறாயினும், இந்த விளையாட்டில் முதலீடு செய்யப்படும் பணத்தால் பாகிஸ்தானில் ஹாக்கி மற்றும் ஸ்குவாஷ் போலவே கிரிக்கெட்டுக்கும் ஏற்படாது என்று பாகிஸ்தான் முன்னாள் கேப்டன் ரஷித் லத்தீப் கூறுகிறார்.
இது தொடர்பாக இந்தியன் எக்ஸ்பிரஸிடம் பேசிய ரஷித் லத்தீப், "பாகிஸ்தானில் கிரிக்கெட் ஒருபோதும் இறக்காது. இதற்கு ஹாக்கி மற்றும் ஸ்குவாஷின் தலைவிதி இருக்காது. காரணம் பணம். ஆம், நமது கிரிக்கெட் வீரர்கள் இந்தியாவைப் போல அதிகம் சம்பாதிக்கவில்லை. ஆனால் நமது பொருளாதாரத்தைப் பொறுத்தவரை, அவர்கள் அனைவரும் நன்றாகக் கவனிக்கப்படுகிறார்கள். ஐ.பி.எல் தொடரைத் தவிர அனைத்து டி20 லீக் போட்டிகளிலும் விளையாடுகிறார்கள். பாகிஸ்தானில் உள்ள மற்ற விளையாட்டுகளை விட கிரிக்கெட்டின் வர்த்தக மதிப்பு அதிகமாக உள்ளது. ஆம், எங்களுக்கு ஹாக்கி மற்றும் ஸ்குவாஷில் நடந்தது வருத்தமளிக்கிறது. ஆனால் பாகிஸ்தானில் கிரிக்கெட்டின் வீழ்ச்சியை என்னால் பார்க்க முடியவில்லை, ”என்று கூறினார்.
இருப்பினும் ரஷித் லத்தீப், பாகிஸ்தான் கிரிக்கெட் வாரிய (பி.சி.பி), தேர்வாளர்கள், தற்போதைய உலகக் கோப்பையில் அவர்களின் செயல்திறனுக்கான சிந்தனைக் குழு ஆகியவற்றைக் கடுமையாக விமர்சித்தார். “நாங்கள் அகமதாபாத், பெங்களூர் மற்றும் சென்னையில் பார்த்தவை அனைத்தும் மோசமான தேர்வின் விளைவாகும். பாகிஸ்தானில் திறமைக்கு பஞ்சம் இல்லை. சரியான திறமைசாலிகளுக்கு வாய்ப்பு தருவார்களா இல்லையா என்பதை வாரியம் தான் முடிவு எடுக்கிறது. சிந்தனையாளர்கள் குழுவிலும் பிரச்சனை இருக்கிறது,” என்றார்.
அத்துடன், பாகிஸ்தான் கிரிக்கெட்டில் அரசியல் தலையீடுகள் உள்ளன என்றும், அன்றாட கிரிக்கெட் நடவடிக்கைகளை அதிகாரிகள் தான் முடிவு செய்கிறார்கள் என்றும் குற்றம் சாட்டியுள்ளார். "இந்த செயல்திறனுக்குப் பிறகு கேட்கப்பட வேண்டிய கேள்வி என்னவென்றால், நாம் எங்கு மேம்படுத்தலாம்? தலைவர் முன்னாள் கிரிக்கெட் வீரராக இருக்க வேண்டும் என்று நான் கூறவில்லை. ஆனால் சி.இ.ஓ, உயர் செயல்திறன் மையத்தின் தலைவர் முன்னாள் கிரிக்கெட் வீரராக இருக்க வேண்டும். எங்களது பிரச்சனை என்னவென்றால், இந்த முக்கியமான பிரிவுகளை அதிகாரத்தில்உள்ளவர்கள் நடத்துகிறார்கள். அவர்கள் குழப்பத்தை உருவாக்குகிறார்கள்" என்று அவர் கூறுகிறார்.
பாகிஸ்தான் அணியின் முன்னாள் வேகப்பந்து வீச்சாளர் சோயிப் அக்தர் தனது யூடியூப் சேனலில், பாகிஸ்தானின் சென்னை தோல்விக்கு பாகிஸ்தான் கிரிக்கெட் வாரியத்தை (பி.சி.பி) கடுமையாக சாடி இருந்தார். அதில் அவர், “இன்று தொலைக்காட்சியில் இப்போது காண்பிக்கப்படும் பி.சி.பி-யின் உண்மையான பிரதிபலிப்பு இதுதான். கிரிக்கெட்டில் கடந்த 20-30 ஆண்டுகளாக நீங்கள் செய்த தேர்வுகளின் நேரடி தாக்கம் இது. இதுவே நீங்கள் பெறும் இறுதி முடிவு,” என்றார்.
மேலும், இளம் தலைமுறையினர் கிரிக்கெட்டை கையில் எடுக்க உத்வேகம் அளிக்கக் கூடிய ஒரு வீரர் கூட தற்போதைய பாகிஸ்தான் கிரிக்கெட் அணியில் இல்லை என்றும் சோயப் அக்தர் வேதனை தெரிவித்துள்ளார். "ஒரு விஷயம் சொல்லுங்கள், இந்த அணியில் ஒரு ஊக்கமளிக்கும் கிரிக்கெட் வீரர் இருக்கிறாரா? வளர்ந்த பிறகு, வக்கார் யூனிஸ் மற்றும் வாசிம் அக்ரம் போன்றவர்களை நான் பார்த்திருக்கிறேன். பாகிஸ்தான் அணியில் உள்ள எந்த கிரிக்கெட் வீரர், இளம் தலைமுறையினர் கிரிக்கெட்டை கையில் எடுக்க போதுமான உத்வேகத்தை அளிக்கிறார்." என்றார்.
பாபரின் மோசமான கேப்டன்சி
ஆப்கானிஸ்தானுக்கு எதிராக பாகிஸ்தான் 8 விக்கெட் வித்தியாசத்தில் தோல்வியடைந்ததை அடுத்து, ஒருநாள் உலகக் கோப்பையில் பாபர் அசாமின் கேப்டன்சி குறித்து கடுமையாக விமர்சித்த பாகிஸ்தான் முன்னாள் கேப்டன்கள் வாசிம் அக்ரம், மொயின் கான், ஷோயப் மாலிக் மற்றும் மிஸ்பா உல் ஹக் ஆகியோர் கேப்டன் பதவிக்கு அசாம் பொருத்தமானவர் அல்ல என்று கூறியுள்ளனர். பாகிஸ்தானை 282 ரன்களுக்கு கட்டுப்படுத்திய ஆப்கானிஸ்தான், அந்த ஸ்கோர் ஒரு ஓவர் மீதம் வைத்து இலக்கை எட்டிப் பிடித்தது.
பாபர் அசாம் பெரும்பாலான முன்னாள் பாகிஸ்தானிய ஜாம்பவான்களின் டார்ட்-இலக்குகளில் இருக்கிறார் மற்றும் விமர்சன வெள்ளத்தில் மூழ்கி இருக்கிறார். ஷோயப் மாலிக், கடந்த காலங்களில், பாபரின் கீழ், பாகிஸ்தான் நட்பு, விருப்பு மற்றும் வெறுப்பின் கலாச்சாரத்தைக் கொண்டுள்ளது என்று ட்வீட் செய்துள்ளார். இந்த நிலைமைக்கு கேப்டன் பாபர் அசாம் மட்டுமே காரணம் என்று மாலிக் கூறியுள்ளார். “மிகவும் பொறுப்பானவர் கேப்டன். ஒரு பேட்ஸ்மேனாக, அவர் கிங், ஆனால் ஒரு தலைவராக, அவர் இல்லை." என்று பதிவிட்டுள்ளார்.
பாகிஸ்தான் முன்னாள் கேப்டனும், விக்கெட் கீப்பருமான மொயின் கான், பாபர் மீது கடுமையான கருத்தை தெரிவித்தார். "கடந்த நான்கு ஆண்டுகளாக அவர் அணியை வழிநடத்தி வருகிறார். அவர் கிட்டத்தட்ட அனைத்து பெரிய போட்டிகளிலும் அணியை வழிநடத்தியுள்ளார். காலங்காலமாக அவர் கற்றுக்கொண்டது ஒன்றும் இல்லை." என்று கூறியுள்ளார்.
பாபர் அசாம், விராட் கோலியிடம் இருந்து பாடம் கற்று, கேப்டன் பதவியை ராஜினாமா செய்து தனது கிரிக்கெட்டை ரசித்து விளையட வேண்டும் என்றும் அவர் கூறியுள்ளார்.
“அவர் இந்த அணியை வழிநடத்துவதை விட பேட்ஸ்மேனாக சிறப்பாக விளையாடியிருப்பார் என்பது எனது தனிப்பட்ட கருத்து. கோலியைப் பாருங்கள், அவர் இந்தியாவின் கேப்டன் பதவியை விட்டுவிட்டார். அது அவரது அதிர்ஷ்டத்தை மாற்றிவிட்டது, ”என்று பாகிஸ்தான் வீரர் ஃபவாத் ஆலம் நமது இதழுக்கு அளித்த பேட்டியில் கூறியிருந்தார்.
டி20யில் பாபர் அசாமின் பயமுறுத்தும் அணுகுமுறையை விமர்சித்த முன்னாள் பாகிஸ்தான் வேகப்பந்து வீச்சாளர் அகிப் ஜாவேத், இப்போது பாகிஸ்தான் கிரிக்கெட்டின் புதிய கேப்டனாக ஷஹீன் ஷா அப்ரிடி இருக்க வேண்டும் என விரும்புகிறார், பாகிஸ்தான் சூப்பர் லீக்கில் லாகூர் கலாண்டர்ஸ் கேப்டனாக அவர் வெற்றி பெற்றதை அவர் சுட்டிக்காட்டியும் உள்ளார்.
"உலகக் கோப்பைக்குப் பிறகு பாகிஸ்தான் கிரிக்கெட் அணிக்கு வீரர்களுக்கு ஆக்ரோஷத்தை ஏற்படுத்தக்கூடிய புதிய கேப்டன் தேவை. பாபர் அசாம் போன்ற ஒரு சாதாரண வீரர் நினைத்துக்கூடப் பார்க்க முடியாத இத்தகைய முடிவுகளை பிஎஸ்எல்லில் எடுத்த ஷஹீன் அப்ரிடியை நான் பரிந்துரைக்கிறேன், ”என்று அவர் சுனோ நியூஸில் கூறினார்.
ஜியோ டி.வி-யின் "ஹர்னா மனா ஹை" என்ற நிகழ்ச்சியில் பேசிய முன்னாள் ஆல்-ரவுண்டர் அப்துல் ரசாக், பாபரின் தரவரிசையை குறித்துவைத்துள்ளார். "எங்கள் நம்பர் 1 பேட்ஸ்மேன் தரையில் இறங்கி சிக்ஸர் அடிக்க கூட முடியாது." என்று கடுமையாக சாடியுள்ளார்.
அதே நிகழ்ச்சியில், பாபரின் முன்னாள் அணி வீரர் முகமது அமீர் பேசுகையில், “கடந்த நான்கு ஆண்டுகளாக அவர் கேப்டனாக இருந்தார். எந்த முன்னேற்றமும் இல்லை. சென்னையில் வேகப்பந்து வீச்சாளர்கள் ரிவர்ஸ் ஸ்விங் செய்து, சுழற்பந்து வீச்சாளர்களை மீண்டும் கொண்டு வந்தார். முதல் நாள் முதல் அவரது அணுகுமுறையில் எதுவும் மாறவில்லை." என்று கூறினார்.
“அந்த டிரஸ்ஸிங் ரூமில் பாபர் எங்கே தவறு செய்கிறார் என்று சொல்லக்கூடியவர்கள் யாரும் இல்லை. டிரஸ்ஸிங் ரூமில் பாபரை யாரும் கட்டளையிட முடியாது, அதுதான் பிரச்சனை. விராட் கேப்டனாக இருந்தபோது இந்தியாவுக்கும் இதேதான் நடந்தது.
ஓவர்களைக் கணக்கிட முடியாமல் பாபர் தவறு செய்கிறார். இதற்கு டி20 கிரிக்கெட் தான் காரணம். ஸ்டிரைக் பவுலர்களின் ஓவர்களை அவரால் கணக்கிட முடியவில்லை. 46வது ஓவரில் உசாமா மிரை அவர்களின் வேகப்பந்து வீச்சாளர்கள் நியாயமான முறையில் பந்துவீசுவதால் எந்தப் பயனும் இல்லை என்று டிரஸ்ஸிங் ரூமில் உள்ள ஒருவர் பாபருக்கு செய்தி அனுப்பியிருக்க வேண்டும். ஆனால் கடினமான விஷயத்தை யார் செய்வார் என்பது தான் கேள்வி?" என்று என்று ரஷித் லத்தீஃப் கூறுகிறார்.
முன்னோக்கி பார்த்தல்
ஒருவர் தங்கள் சொந்த ஆபத்தில் பாகிஸ்தானை எண்ணலாம். முதுகு பக்கம் சுவர் இருக்கும் போது மூலை முடுக்கில் இருக்கும் புலிகள் மிகவும் ஆபத்தானவை. கடந்த ஆண்டு ஆஸ்திரேலியாவில், டி20 உலகக் கோப்பையின் போது, ஜிம்பாப்வேயிடம் தோற்று, கிட்டத்தட்ட போட்டியிலிருந்து வெளியேறியது. ஆனால் அவர்கள் இறுதிப் போட்டியில் விளையாடினர்.
1992 உலகக் கோப்பையைப் போலவே, அவர்கள் தொடர்ச்சியாக மூன்றில் தோல்வியடைந்தனர். பின்னர் மூன்று நேரான கேம்களை வென்று அரையிறுதிக்குள் நுழைந்தனர்.
விசித்திரக் கதை மீண்டும் வருமா? பாபர் அடுத்த இம்ரானாக முடியுமா? என்கிற அடுக்கடுக்கான கேள்விகள் எழுந்த வண்ணம் உள்ளன.
"எங்கே ஆபத்து இருக்கிறதோ, அங்கே தேடுவதற்கு அன்பு இருக்கிறது. அது பாகிஸ்தானிய வழி. அவர்கள் அவுட்-ஆஃப்-பாக்ஸ் கிரிக்கெட்டை விளையாட வேண்டும், பாகிஸ்தான் கடந்த காலத்தில் அதைச் செய்திருக்கிறது." என்று ரஷீத் லத்தீஃப் நம்பிக்கை தெரிவித்துள்ளார்.
ரஷீத் லத்தீஃப்பை போலவே, மீதமுள்ள நான்கு போட்டிகளில் பாகிஸ்தான் இன்னும் சிறப்பாக விளையாட முடியும் என்று சோயப் அக்தரும் நம்பிக்கை தெரிவித்துள்ளார். ஆனால் கேப்டன் பாபர் அசாம் முன்னேறுவாரா? என்றும் கேள்வி எழுப்பியுள்ளார்.
“பாபருக்கு தைரியம் இருக்கிறதா, சகிப்புத்தன்மை இருக்கிறதா? அவருக்கு திறமை இருக்கிறதா? 1992 இம்ரான் கான் போல் அவரால் செயல்பட முடியுமா? ஷாஹீன் வாசிம் அக்ரம் ஆக முடியுமா? ஹரிஸ் ரவுஃப் அக்விப் ஜாவேத் ஆக முடியுமா?, ஷதாப் முஷ்டாக் அகமது ஆக முடியுமா? இந்த அணியால் அதைச் செய்ய முடியுமா? நான் இந்த அணியை நம்புகிறேன் ஆனால் அவர்கள் செய்கிறார்களா? என்பது கடவுளுக்குத் தெரியும்,” என்று அக்தர் கூறியுள்ளார்.
பாகிஸ்தான் மீதமுள்ள 4 போட்டிகளில் தென் ஆப்பிரிக்கா, வங்கதேசம், நியூசிலாந்து மற்றும் இங்கிலாந்து அணிகளை எதிர்கொள்கிறது. இந்த 4 அணிகளை வென்றால் மட்டுமே அவர்களால் அரைஇறுதிக்கு தகுதி பெற முடியும். ஒரு போட்டியில் தோல்வி பெற்றால் கூட அரைஇறுதிக்கான வாய்ப்பு குறைந்து விடும். அதே நேரத்தில், 1992ல் விளையாடிய ஜாம்பவான்கள் மற்றொரு மீட்புத் திட்டத்தில் அவர்களுக்கு உதவுவார்கள் என்று நம்ப வேண்டும்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/c1uXtZu0aITKlvYZ7uwn.jpg)