Ravichandran Ashwin: இந்திய கிரிக்கெட் அணியின் முன்னணி சுழற்பந்து வீச்சாளராக வலம் வருபவர் சென்னையை சேர்ந்த ரவிச்சந்திரன் அஸ்வின். அண்மையில், தர்மசாலாவில் நடந்த இங்கிலாந்துக்கு எதிரான 5வது மற்றும் கடைசி டெஸ்ட் போட்டியில் களம் இறங்கியதன் மூலம் 100-வது டெஸ்டில் ஆடிய 14-வது இந்தியர் என்கிற பெருமையைப் பெற்றார். அத்துடன் முதல் தமிழக வீரர் என்ற சாதனையையும் படைத்தார்.
மேலும், இந்த டெஸ்ட் தொடரில் ராஜ்கோட் நடந்த 3வது டெஸ்டில் அஸ்வின் 500 டெஸ்ட் விக்கெட்டை கடந்தார். இந்த மைல்கல்லை கடந்த 9-வது வீரர், 2-வது இந்திய வீரர் என்ற சாதனையையும் அஸ்வின் படைத்தார். இந்நிலையில், 100 டெஸ்டில் விளையாடி இருப்பதுடன், 500 விக்கெட்டுகளை சாய்த்து சாதனை படைத்த அஸ்வினுக்கு தமிழ்நாடு கிரிக்கெட் சங்கம் சார்பில் பாராட்டு விழா சென்னை சேப்பாக்கம் ஸ்டேடியத்தில் சனிக்கிழமை நடந்தது. அஸ்வின் தனது குடும்பத்தினருடன் விழாவில் பங்கேற்றார்.
அஸ்வினுக்கு ரூ.1 கோடிக்கான காசோலையை சர்வதேச கிரிக்கெட் கவுன்சில் மற்றும் இந்திய கிரிக்கெட் வாரிய முன்னாள் தலைவர் என்.சீனிவாசன் வழங்கி பாராட்டினார். மேலும் 500 விக்கெட்டுகள் வீழ்த்தியதை நினைவு கூறும் வகையில் தங்க நாணயத்தால் 500 என்று வடிவமைக்கப்பட்ட கேடயமும் அவருக்கு வழங்கப்பட்டது.
உணர்ச்சி வசப்பட்ட அஸ்வின்
அஸ்வின் தனது வாழ்க்கையில் சோதனைகள் மற்றும் இன்னல்களை நேருக்கு நேர் சந்தித்த 'வலிமையான' தனிநபராக தன்னைப் பார்க்கிறார். சமீபத்தில் ஐ.சி.சி-யின் ஆண்டின் சிறந்த வீரராக முடிசூட்டப்பட்டிருந்தாலும், அவரது கிரிக்கெட் வாழ்க்கையைத் தொடர்வது கூட அர்த்தமற்றதாக உணர்ந்த நாள்கள் இருந்தன
குறிப்பாக 2017 ஆம் ஆண்டு அணியில் அவரது எதிர்காலம் குறித்து எந்த தெளிவும் இல்லாமல் இருந்தது. மேலும், ஆஃப்-ஸ்பின்னர் அஸ்வினை ஒயிட்-பால் அணியில் ஓரங்கட்டப்பட்டார். "அவர் கைவிடப்பட்டாரா அல்லது ஓய்வில் அனுப்பட்டாரா என்பது அவருக்குத் தெரியாது. அஸ்வினிடம், ‘நீ சரியில்லை’ என்று யாராவது சொன்னால், அவர் அதிலிருந்து வெளியே வந்து வேலை செய்வார். ஆனால் அவர் ஏன் அங்கு இல்லை என்று கூறப்படாதபோது, அவர் சிரமப்படுவதை நான் பார்த்தேன், ”என்று அவரது மனைவி பிரித்தி அஸ்வின் சமீபத்தில் 'தி இந்தியன் எஸ்பிரஸிடம்' கூறினார்.
இந்நிலையில், அஸ்வின் தி இந்தியன் எக்ஸ்பிரஸின் சமீபத்திய ஐடியா எக்ஸ்சேஞ்சில் நிகழ்ச்சியில் பேசுகையில் அதனை ஒப்புக்கொண்டார். “நான் கிரிக்கெட்டிலிருந்து விலக முடிவு செய்தேன். நான் என்ன செய்வேன் என்று என்னையே கேட்டுக்கொண்டேன். மேலும் வாழ்க்கையில் நான் எதைச் செய்தாலும், அந்தத் தொழிலில் என்னால் முடிந்தவரை சிறந்து விளங்க முயற்சிப்பேன். நான் ஒருவேளை எம்.பி.ஏ படிக்க முயற்சிப்பேன், அப்படியே மார்க்கெட்டிங் லைனில் முயற்சிப்பேன்” என்று கூறினார்.
ஆங்கிலத்தில் படிக்கவும்: When R Ashwin almost quit cricket for MBA and marketing: ‘I was crying for a long time…didn’t expect my dad to say that’
அஸ்வினுக்கு, தனக்கு நெருக்கமானவர்களிடம் தன் மனநிலையைப் பகிர்ந்து கொள்வதும் சிக்கலான உரையாடலாக இருந்தது என்பதையும் அவர் விளக்கினார், “என் குடும்பம் எனக்காக பக்க பலமாக இருந்தாலும், நான் என் குடும்பத்திற்கு திரும்பி வர முடியும் என்றாலும், என்னால் நிறைய விஷயங்களைச் சொல்ல முடியாது. கிரிக்கெட்டை, அரசாங்க நிறுவன செயல்பாடுகள் மற்றும் பண்புக்கூறுகளைக் கொண்ட ஒரு கார்ப்பரேட் நிறுவனம் என்று நான் கூறுவேன்.
இருப்பினும், நான் வந்து என் அப்பாவிடம் கார்ப்பரேட் விஷயங்களைப் பற்றி பேசினால், அவர் சொல்லும் ஒரே ஒரு வரி: 'இது எல்லாம் அரசியல்' என்பார். ஆனால் அவர் கூறும் அந்த வரி மிகப் பெரியது. ரசிகர்கள் கூட அதையே சொல்கிறார்கள். சிலநேரங்களில், இருண்ட இடத்தில் இருந்தால், அப்படித் தான் இருக்கும் என நானும் கூட நினைத்திருக்கிறேன். ஆனால் இது மிகவும் தவறான விஷயம். ஏனென்றால் ஒருவரின் வெற்றி அவருக்கு மிக எளிதாக வருகிறது என்று நினைக்கிறோம். அது இல்லை. எனது மனைவி நான் பேசுவதை கேட்க விரும்புவார். ஆனால் அவர் மிகவும் இளமையான குடும்பத்தைக் கொண்டிருந்தார், நான் அவருக்கு போதுமான நேரம் ஒதுக்கவில்லை.
என் அப்பா ஏதோ சொன்னார். வீட்டில் சில பிரச்சனைகள் எழுந்தன. நான் என் அப்பாவிடம் ஏதோ சொன்னேன். எனக்கும் அப்பாவுக்கும் இடையேயான பிரச்சனை அதிகரித்தது. இறுதியில் அவர், 'உனக்கு தெரியுமா? நீ மிகவும் நேர்மையாகவும் உண்மையாகவும் இருக்கிறாய். அதனால்தான் நீ அதிக நெருக்கடியைச் சந்திக்கிறாய்.’ என்று கூறிவிட்டு சென்றுவிட்டார். நான் உணர்ச்சிவசப்படுபவன் அல்ல. நான் மிகவும் வலிமையானவன் என்று நினைக்க விரும்புகிறேன். ஆனால் நான் என்னை நானே பூட்டிக்கொண்டேன். பின்னர் நான் அழ ஆரம்பித்தேன். நான் நீண்ட நேரம் அழுது கொண்டிருந்தேன். என் அப்பா இப்படி சொல்வார் என்று நான் எதிர்பார்க்கவில்லை. அவர் என்ன செய்தார் என்பதை அவர் உணரவில்லை என்று நான் நினைத்தேன்.
நான் என் வீட்டில் உள்ளவர்களை மிகவும் கஷ்டப்படுத்துகிறேன் என்று நினைத்தேன். நான் அறைக்குள் என்னைப் பூட்டிக்கொண்டேன். நான் கிரிக்கெட் பார்க்கவில்லை. எனது அறை எப்போதும் இருட்டாகவே இருக்கும். எம்.பி.ஏ படித்து விட்டு மார்க்கெட்டிங் லைனில் செல்லலாம் என்று நினைத்தேன். இதன்பிறகு கவுன்சிலிங் சென்றேன். அது எனது வாழ்வை மாற்றியது." என்று அவர் கூறினார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“