பாகிஸ்தானுக்கு எதிராக ஆட மறுத்த இந்திய வீரர்கள்: லெஜண்ட்ஸ் கிரிக்கெட் போட்டி ரத்து

இங்கிலாந்தின் எட்ஜ்பாஸ்டனில் இன்று நடைபெறவிருந்த உலக சாம்பியன்ஸ் லீக்கின் (WCL) இந்தியா மற்றும் பாகிஸ்தான் ஜாம்பவான்களுக்கு இடையேயான போட்டி, இந்திய வீரர்கள் பலரின் புறக்கணிப்பு காரணமாக அமைப்பாளர்களால் ரத்து செய்யப்பட்டுள்ளது. கடந்த ஏப்ரல் மாதம் பஹல்காம் பயங்கரவாத தாக்குதலுக்குப் பிறகு நிலவும் புவிசார் அரசியல் மோதல்களே இந்தப் போட்டி ரத்து செய்யப்பட்டதற்கு முக்கிய காரணமாகும்.

முன்னாள் இந்திய அணியின் தொடக்க வீரர் ஷிகர் தவான், சனிக்கிழமை இரவு சமூக வலைத்தளங்கள் வாயிலாக இந்தப் போட்டியில் பங்கேற்கப் போவதில்லை என்பதை அறிவித்தார். "திரு. ஷிகர் தவான் வரவிருக்கும் WCL லீக்கில் பாகிஸ்தான் அணிக்கு எதிரான எந்தப் போட்டியிலும் பங்கேற்க மாட்டார் என்பதை இதன் மூலம் முறையாக மீண்டும் உறுதிப்படுத்துகிறோம்.

மே 11, 2025 அன்று தொலைபேசி மற்றும் வாட்ஸ்அப் விவாதத்தின் போது இந்த முடிவு ஏற்கனவே தெரிவிக்கப்பட்டது" என்று தவான் தனது X பக்கத்தில் பகிர்ந்துள்ள கடிதத்தில் குறிப்பிடப்பட்டுள்ளது. "தற்போதைய புவிசார் அரசியல் சூழ்நிலை மற்றும் இந்தியாவுக்கும் பாகிஸ்தானுக்கும் இடையே நிலவும் பதட்டங்களை கருத்தில் கொண்டு, திரு. தவான் மற்றும் அவரது அணி இந்த முடிவை எடுத்துள்ளது. இந்த விஷயத்தில் லீக்கின் புரிதலையும் ஒத்துழைப்பையும் நாங்கள் பணிவுடன் கேட்டுக்கொள்கிறோம்."

கடந்த ஆண்டு நடைபெற்ற ஆறு அணிகள் கொண்ட இந்தத் தொடரின் முதல் பதிப்பின் இறுதிப் போட்டியில் இந்தியா மற்றும் பாகிஸ்தான் அணிகள் எட்ஜ்பாஸ்டனில் மோதின. இதில் இந்தியா ஐந்து விக்கெட் வித்தியாசத்தில் வெற்றி பெற்றது குறிப்பிடத்தக்கது.

இந்த செய்தியை ஆங்கிலத்தில் படிக்க க்ளிக் செய்யவும்.

ஞாயிற்றுக்கிழமை அதிகாலையில், WCL அமைப்பாளர்கள் இந்திய ஜாம்பவான்கள் அணிக்கு "அசெளகரியத்தை ஏற்படுத்தியதற்காக" மன்னிப்பு கேட்டனர்.

"இந்த ஆண்டு பாகிஸ்தான் ஹாக்கி அணி இந்தியா வரவுள்ள செய்தி கிடைத்த பிறகு, சமீபத்திய இந்தியா - பாகிஸ்தான் கைப்பந்து போட்டி மற்றும் இரு நாடுகளுக்கும் இடையிலான பிற விளையாட்டுகளில் நடந்த சில போட்டிகளைப் பார்த்த பிறகு, உலக மக்கள் அனைவருக்கும் மகிழ்ச்சியான நினைவுகளை உருவாக்க நாங்கள் WCL இல் இந்தியா - பாகிஸ்தான் போட்டியைத் தொடர நினைத்தோம். ஆனால் இந்தச் செயல்பாட்டில், நாங்கள் பலரின் உணர்வுகளை காயப்படுத்தியிருக்கலாம், மேலும் உணர்ச்சிகளைத் தூண்டியிருக்கலாம்."

"அதையும் தாண்டி, எங்களை அறியாமலேயே நமது இந்திய கிரிக்கெட் ஜாம்பவான்களுக்கு அசெளகரியத்தை ஏற்படுத்தினோம். அவர்கள் நாட்டிற்கு இவ்வளவு பெருமை சேர்த்தவர்கள், மேலும் விளையாட்டின் மீதான அன்பால் மட்டுமே எங்களை ஆதரித்த பிராண்டுகளையும் நாங்கள் பகைத்துக்கொண்டோம். எனவே, இந்தியா - பாகிஸ்தான் போட்டியை ரத்து செய்ய முடிவு செய்துள்ளோம். 

உணர்வுகளை காயப்படுத்தியதற்காக மீண்டும் மனமார்ந்த மன்னிப்பு கேட்டுக்கொள்கிறோம், மேலும் ரசிகர்கள் சில மகிழ்ச்சியான தருணங்களை அனுபவிக்க வேண்டும் என்பதே எங்கள் நோக்கம் என்பதை மக்கள் புரிந்துகொள்வார்கள் என்று நம்புகிறோம்" என்று WCL அறிக்கை தெரிவித்தது.

ஹர்பஜன், ரெய்னா, பதான் சகோதரர்கள் விலகல்:

முன்னதாக சனிக்கிழமையன்று, மூத்த இந்திய நட்சத்திரங்களான ஹர்பஜன் சிங், சுரேஷ் ரெய்னா, இர்ஃபான் பதான் மற்றும் யூசுப் பதான் ஆகியோரும் பாகிஸ்தான் போட்டி இருந்து விலகியதாக தகவல்கள் வெளியாகின. WCL 2025 சீசனுக்கான இந்திய அணியில் யுவராஜ் சிங், ராபின் உத்தப்பா, அம்பதி ராயுடு, ஸ்டூவர்ட் பின்னி, வருண் ஆரோன் மற்றும் வினய் குமார் உள்ளிட்ட ஓய்வு பெற்ற வீரர்களும் இடம்பெற்றுள்ளனர்.

இந்தியா சாம்பியன்ஸ் WCL 2025 அட்டவணை:

இந்தியா தனது இரண்டாவது போட்டியை செவ்வாய்க்கிழமை நார்தாம்ப்டனில் தென் ஆப்பிரிக்கா சாம்பியன்ஸுக்கு எதிராக விளையாட உள்ளது. முகமது ஹஃபீஸ் தலைமையிலான பாகிஸ்தான் சாம்பியன்ஸ் அணி, ஜூலை 25 அன்று லீசெஸ்டரில் தனது அடுத்த போட்டியை விளையாடும். இந்தத் தொடரின் முதல் போட்டியில் இங்கிலாந்து சாம்பியன்ஸிடம் ஐந்து ரன்கள் வித்தியாசத்தில் பாகிஸ்தான் தோல்வியடைந்தது.

இந்தியா சாம்பியன்ஸ் போட்டிகள்:

தென் ஆப்பிரிக்கா சாம்பியன்ஸ் எதிராக (ஜூலை 22)
ஆஸ்திரேலியா சாம்பியன்ஸ் எதிராக (ஜூலை 26)
இங்கிலாந்து சாம்பியன்ஸ் எதிராக (ஜூலை 27)
வெஸ்ட் இண்டீஸ் சாம்பியன்ஸ் எதிராக (ஜூலை 29)