worldcup 2023 | india-vs-england | mohammed-shami | sunil-gavaskar | kapil-dev: 13-வது ஒருநாள் (50 ஓவர்) உலகக் கோப்பை கிரிக்கெட் திருவிழா இந்தியாவின் பல்வேறு நகரங்களில் விறுவிறுப்பாக நடைபெற்று வருகிறது. இந்த தொடரில் நேற்று ஞாயிற்றுக்கிழமை லக்னோவில் நடந்த லீக் ஆட்டத்தில் நடப்பு சாம்பியானான இங்கிலாந்து அணியை இந்தியா எதிர்கொண்டது.
மிகவும் பரபரப்பாக நடந்த இந்தப் போட்டியில் முதலில் பேட்டிங் செய்த இந்திய அணி 50 ஓவர்கள் முடிவில் 9 விக்கெட்டுகள் இழப்பிற்கு 229 ரன்கள் சேர்த்தது. இந்திய அணியில் சிறப்பாக ஆடிய கேப்டன் ரோகித் சர்மா 87 ரன்களும், சூர்யகுமார் யாதவ் 49 ரன்களும் எடுத்தனர். இங்கிலாந்து அணி தரப்பில் டேவிட் வில்லி 3 விக்கெட்டுகளை வீழ்த்தினார்.
தொடர்ந்து களமிறங்கிய இங்கிலாந்து அணி 34.5 ஓவர்களில் 129 ரன்களுக்கு ஆல் அவுட்டாகியது. அந்த அணியின் நட்சத்திர வீரர்களான ஜோ ரூட் மற்றும் பென் ஸ்டோக்ஸ் இருவரும் டக் அவுட்டாகி வெளியேறினர். அதிகபட்சமாக லிவிங்ஸ்டன் 27 ரன்கள் எடுத்தார். இந்திய அணி தரப்பில் முகமது சமி 4 விக்கெட்டுகளையும், பும்ரா 3 விக்கெட்டுகளையும், குல்தீப் யாதவ் 2 விக்கெட்டுகளையும் வீழ்த்தினர்.
வியந்து பேசிய கவாஸ்கர்
இந்நிலையில், இந்தியா 100 ரன்கள் வித்தியாசத்தில் இங்கிலாந்தை வீழ்த்தியது குறித்து இந்திய கிரிக்கெட் ஜாம்பவான் வீரரான சுனில் கவாஸ்கர் பேசுகையில், ஒருநாள் கிரிக்கெட்டில் அணிக்கு உள்ளேயும் வெளியேயும் இருந்தபோதிலும், முகமது ஷமியின் கிராமத்தில் உள்ள பயிற்சி ஆடுகளங்கள் அவருக்கு எவ்வாறு ரிதத்தைக் கண்டறிய உதவின என்பது குறித்து வெளிப்படுத்தி இருந்தார்.
மேலும், வலைப் பயிற்சியில் அதிக அளவில் பந்துவீசுவதற்கு முக்கியத்துவம் கொடுக்கும்போது ஷமி கொஞ்சம் ஓல்டு ஸ்கூல் என்றும், கபில் தேவ், வேகப்பந்து வீச்சாளர்கள் வலைகளில் அதிக அளவில் சிறப்பாகச் செயல்படுவது மற்றும் போட்டி நாட்களில் முழு வீச்சை பெறுவதற்கான மைலேஜைப் பெறுவது குறித்தும் குறிப்பிட்டு அவர் கூறினார்.
இதுதொடர்பாக அவர் பேசுகையில், "அவரிடம் நிறைய கடின உழைப்பு இருக்கிறது. வீட்டிற்குத் திரும்பும்போது, அவர் பல பிட்ச்களை உருவாக்கியுள்ளார். மேலும் அவர் அங்கு பந்துவீசி பயிற்சி எடுக்கிறார். ஒரு பந்துவீச்சாளருக்கு அதுதான் முக்கியம். அவர் தனது தனிப்பட்ட கிரிக்கெட் உடற்தகுதியைப் பார்க்கிறார். அவர் தான் சிறப்பாக எதில் செயல்படுகிறறோம் என்பதைப் பார்க்கிறார். அது அவருடைய வேகப்பந்து வீச்சு தான். வலைகளில் பல ஓவர்கள் வீசுவது மூலம் நிலையாக இருக்கிறார். அவர் ஜிம்மில் இருப்பவரா என்று தெரியவில்லை. நீங்கள் நாள் முழுவதும் ஜிம் செய்யலாம். ஆனால் நாள் முடிவில்... கபில் தேவ் என்ன செய்து கொண்டிருந்தாரோ அதையே முகமது ஷமி செய்து வருகிறார். வலையில் பந்துவீசி பந்து வீசி பயிற்சி எடுக்கிறார்.
'அடடா, வலையில் 15-20 டெலிவரிகள் மட்டுமே வீச வேண்டும்' என்று உங்கள் பயோ-மெக்கானிக் நிபுணர்கள் சொல்வதை அவர் கேட்பதில்லை. ஒரு வேகப்பந்து வீச்சாளராக, அவர் பந்து வீசுவதற்கு ஓடும்போது, அவருக்கு கால்களுக்கு அதிக மைலேஜ் தேவை என்பது அவருக்குத் தெரியும்.
அவர் அதைக் காட்டுகிறார். அவரிடம் ரிதம் மிகவும் நன்றாக இருக்கிறது. அவர் பந்துவீச ஓடும்போது, ட்ரோன் கேமரா அதைப் பிடிக்கும்போது, புலி அல்லது சிறுத்தை வேட்டையை பாய்ந்து செல்வது போல் காட்சியளிக்கிறார். இது ஒரு அற்புதமான காட்சி." என்று கூறி வியந்துள்ளார் சுனில் கவாஸ்கர்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“