புரோ கபடி லீக்: ஹரியானாவை வீழ்த்தி தமிழ் தலைவாஸ் அபார வெற்றி!

12 அணிகள் களமாடி வரும் 12-வது புரோ கபடி லீக் தொடர் கடந்த ஆகஸ்ட் 29 ஆம் தேதி முதல் விறுவிறுப்பாக நடைபெற்று வருகிறது. இந்நிலையில், புரோ கபடி லீக் தொடரின் 62-வது லீக் ஆட்டம் தமிழ் தலைவாஸ் - ஹரியானா ஸ்டீலர்ஸ் அணிகள் இடையே வெள்ளிக்கிழமை இரவு 9 மணிக்கு சென்னை எஸ்.டி.ஏ.டி பல்நோக்கு உள் விளையாட்டு அரங்கத்தில் நடைபெற்றது. இதில், தமிழ் தலைவாஸ் அணி 45-க்கு 33 என்ற புள்ளிகள் கணக்கில் ஹரியானாவை வீழ்த்தி அபார வெற்றி பெற்றது.

போட்டி ஆரம்பம் முதலே விறுவிறுப்பாக இருந்தது. நடப்பு சாம்பியன் ஹரியானா ஸ்டீலர்ஸ் விரைவாக புள்ளிகளைப் பெறத் தொடங்கியது. முதல் புள்ளியை சாஹில் நார்வால் டேக்கிள் மூலம் பெற, வினய் அதை ஒரு ரைடு மூலம் பின்தொடர்ந்தார். தமிழ் தலைவாஸ் தரப்பில் ரோஹித் பெனிவால் முதல் புள்ளியைப் பெற்றார். நிதேஷ் குமார், வினய்யை டேக்கிள் செய்து தனது இருப்பை உணர்த்தினார்.

ஆட்டத்தின் தொடக்கத்தில் இரு அணித் தலைவர்களான அர்ஜுன் தேஸ்வாலும், ஜெய்தீப் டஹியாவும் புள்ளிகளைப் பெற்றனர். எனினும், ஹரியானா ஸ்டீலர்ஸ் அணியின் கேப்டன் ஜெய்தீப் டஹியா முதல் பத்து நிமிடங்களுக்குள் இரண்டு சூப்பர் டேக்கிள்களைப் பதிவு செய்து, தனது அணிக்கு மூன்று புள்ளி முன்னிலையை ஏற்படுத்தினார். முதல் பாதியில் ஹரியானா அணி 15-13 என்ற இரண்டு புள்ளி முன்னிலையுடன் களத்தை நிறைவு செய்தது.

அர்ஜுன் தேஸ்வால் ஆதிக்கம்: அடுத்தடுத்து ஆல் அவுட்

இரண்டாவது பாதி தொடங்கியவுடன் போட்டிக் களம் முற்றிலும் மாறியது. தொடக்கத்தில் 15-15 என ஆட்டம் சமன் ஆன பிறகு, அது ‘அர்ஜுன் தேஸ்வால் ஷோ’வாக மாறியது. முதல் பாதியில் வெறும் மூன்று புள்ளிகளை மட்டுமே எடுத்த அவர், இரண்டாவது பாதியில் மட்டும் பத்தொன்பது புள்ளிகளை பெற்றார்.

அவரது ஆக்ரோஷமான ரைடிங் மூலம், தமிழ் தலைவாஸ் அணியின் முதல் 'ஆல் அவுட்டை' பதிவு செய்து, மூன்று புள்ளி முன்னிலையைப் பெற்றார். ஆஷிஷ் மற்றும் நிதேஷ் குமாரின் டேக்கிள்கள் முன்னிலையை மேலும் அதிகரிக்க, அர்ஜுன் முதல் சூப்பர் ரைடையும் பதிவு செய்தார்.

விரைவில், அவர் தனது ‘சூப்பர் 10’ஐப் பூர்த்தி செய்ததுடன், பத்து நிமிடங்களுக்குள் ஹரியானா ஸ்டீலர்ஸ் மீது இரண்டாவது ‘ஆல் அவுட்டை’யும் நிகழ்த்தினார். இதன் மூலம் தமிழ் தலைவாஸ் பத்து புள்ளி அசுரத்தனமான முன்னிலையைப் பெற்றது. தொடர்ந்து புள்ளிகளை குவித்த அவர், நடப்பு சாம்பியன் மீது மூன்றாவது 'ஆல் அவுட்டை' கொடுத்து, அணியை 34-21 என்ற வலுவான நிலைக்குக் கொண்டு சென்றார்.

விளையாட்டின் மூன்றாம் பகுதியில், தமிழ் தலைவாஸ் அணி ஹரியானாவை பின்னுக்குத் தள்ளி, ஆட்டத்தின் முழு கட்டுப்பாட்டையும் கையில் எடுத்தது. ஆட்டத்தின் இறுதி மூன்று நிமிடங்களுக்குள் விசால் டேட் 4 புள்ளிகள் கொண்ட ஒரு மாபெரும் ரைடு மூலம் ஹரியானாவுக்கு சிறிது ஆறுதல் அளித்தார், இதன் மூலம் முதல் 'ஆல் அவுட்டை'ப் பதிவு செய்து 41-30 என இடைவெளியைக் குறைத்தார்.

எனினும், விசால் டேட் தனது சூப்பர் 10-ஐ நிறைவு செய்தபோதிலும், அவரது அணியால் மாபெரும் புள்ளிகள் பற்றாக்குறையைச் சமன் செய்ய முடியவில்லை. இறுதியாக, அர்ஜுன் தேஸ்வாலின் 22 புள்ளிகள் உதவியுடன், தமிழ் தலைவாஸ் அணி 45-33 என்ற மறக்க முடியாத வெற்றியைப் பதிவு செய்தது.

நடப்பு தொடரில் அர்ஜுன் தேஷ்வால் தலைமையிலான தமிழ் தலைவாஸ் இதுவரை 10 போட்டிகளில் ஆடி 4-ல் வெற்றி 6-ல் தோல்வி என 8 புள்ளிகளுடன் புள்ளிகள் பட்டியலில் 8-வது இடத்தில் இருக்கிறது. மறுபுறம், ஜெய்தீப் தஹியா தலைமையிலான ஹரியானா ஸ்டீலர்ஸ் அணி இதுவரை 10 போட்டிகளில் ஆடி 6-ல் வெற்றி 4-ல் தோல்வி என 12 புள்ளிகளுடன் புள்ளிகள் பட்டியலில் 9-வது இடத்தில் இருக்கிறது. இந்த சீசனில் இவ்விரு அணிகள் மோதிய ஆட்டத்தில் ஹரியானா ஸ்டீலர்ஸ் 38-36 என 2 புள்ளிகள் கண்ணக்கில் தமிழ் தலைவாஸ் அணியை வீழ்த்தியது. அந்தத் தோல்விக்கு பதிலடி கொடுக்கவே தமிழ் தலைவாஸ் நினைக்கும். எனவே, இன்றைய ஆட்டத்தில் பரபரப்புக்கு பஞ்சமிருக்காது. 

நேருக்கு நேர் 

புரோ கபடி தொடரில் தமிழ் தலைவாஸ் - ஹரியானா ஸ்டீலர்ஸ் அணிகள் இதுவரை 14 போட்டிகளில் நேருக்கு நேர் சந்தித்துள்ளன. இதில் ஹரியானா ஸ்டீலர்ஸ் 9 முறையும், தமிழ் தலைவாஸ் 2 முறையும் வென்றுள்ளன. 3 போட்டிகள் சமனில் முடிந்தது.