புரோ கபடி லீக் 2024: தெலுங்கு டைட்டன்ஸ் அணியிடம் தமிழ் தலைவாஸ் போராடி தோல்வி!

11-வது புரோ கபடி லீக் போட்டி ஐதராபாத்தில் கடந்த 18 ஆம் தேதி முதல் தொடங்கி விறுவிறுப்பாக நடைபெற்று வருகிறது. டிசம்பர் 29 ஆம் தேதி வரை நடக்கவுள்ள இந்தத் தொடரில் 12 அணிகள் களமாடியுள்ளன. இதில், ஒவ்வொரு அணியும் தலா 22 ஆட்டத்தில் விளையாட வேண்டும். 

லீக் முடிவில் புள்ளிகள் அடிப்படையில் முதல் 6 இடங்களை பிடிக்கும் அணிகள் பிளே -ஆப் சுற்றுக்கு முன்னேறும். லீக்கில் 'டாப்-2' இடங்களை வசப்படுத்தும் அணிகள் நேரடியாக அரைஇறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதும். அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், புரோ கபடி லீக் தொடரில் புதன்கிழமை (நவ.06) இரவு 9 மணிக்கு ஐதராபாத்தில் உள்ள கச்சிபௌலி ஸ்டேடியத்தில் நடைபெற்ற ஆட்டத்தில் தமிழ் தலைவாஸ் - தெலுங்கு டைட்டன்ஸ் அணிகள் மோதியது.

புரோ கபடி லீக் தொடரில், தமிழ் தலைவாஸ் மற்றும் தெலுங்கு டைட்டன்ஸ் அணிகள் இடையே நடைபெற்ற ஆட்டத்தில், தொடக்கத்தில் தெலுங்கு டைட்டன்ஸ் அணி ஆதிக்கம் செலுத்தினாலும் துணிந்து எழுந்த தமிழ் தலைவாஸ் அணி வீரர்கள் சிறப்பாக விளையாடினர்.ஆனாலும், ஆட்ட நேர முடிவில், தமிழ் தலைவாஸ் அணி தோல்வியைத் தழுவியது.  தமிழ் தலைவாஸ் அணி 34 புள்ளிகளையும் தெலுங்கு டைட்டன்ஸ் அணி 35 புள்ளிகளையும் எடுத்தது. இதன் மூலம் 1 புள்ளி வித்தியாசத்தில் தமிழ் தலைவாஸ் அணியை வீழ்த்தி தெலுங்கு டைட்டன்ஸ் அணி வெற்றி பெற்றது.  

நடப்பு சீசனில் இதுவரை 6 போட்டிகளில் ஆடியுள்ள தமிழ் தலைவாஸ் அணி 3 வெற்றி, 2 தோல்வி, 1 போட்டி டிரா என 20 புள்ளிகளுடன் புள்ளிகள் பட்டியலில் 2வது இடத்தில் இருந்து வருகிறது. இந்த சீசனில் சிறப்பாக செயல்பட்டு வரும் அந்த அணி முந்தைய பெங்களூரு புல்ஸ் அணிக்கு எதிராக 32- 36 என்கிற கணக்கில் தோல்வியைத் தழுவியது. 

இந்தத் தொடரில் தொடர்ந்து ஆதிக்கம் தமிழ் தலைவாஸ் அணி வெற்றிப் பாதைக்கு திரும்புவது அவசியமாகும். அதனால், இவ்விரு அணிகள் மோதும் இன்றைய ஆட்டத்தில் பரபரப்புக்கு பஞ்சமிருக்காது. 

நேருக்கு நேர் 

புரோ கபடி லீக் வரலாற்றில் தமிழ் தலைவாஸ் 15 முறை தெலுங்கு டைட்டன்ஸ் அணியை எதிர்கொண்டுள்ளது. இதில்  தமிழ் தலைவாஸ் அணி 9 முறையும், தெலுங்கு டைட்டன்ஸ் 5 முறை வென்றுள்ளன. ஒரு போட்டி டையில் முடிந்துள்ளது.

இந்த சீசனில் தமிழ் தலைவாஸ் மற்றும் தெலுங்கு டைட்டன்ஸ் அணிகளுக்கு இடையே நடைபெற்ற போட்டியில், தமிழ் தலைவாஸ் 44-29 என்கிற புள்ளிகள் கணக்கில் வெற்றி பெற்றது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“