அடுத்த வெற்றி யாருக்கு? யு மும்பா - பெங்கால் வாரியர்ஸ் அணிகள் இன்று மோதல்

11-வது புரோ கபடி லீக் போட்டி ஐதராபாத்தில் கடந்த 18 ஆம் தேதி முதல் தொடங்கி விறுவிறுப்பாக நடைபெற்று வருகிறது. டிசம்பர் 29 ஆம் தேதி வரை நடக்கவுள்ள இந்தத் தொடரில் 12 அணிகள் களமாடியுள்ளன. இதில், ஒவ்வொரு அணியும் தலா 22 ஆட்டத்தில் விளையாட வேண்டும். 

லீக் முடிவில் புள்ளிகள் அடிப்படையில் முதல் 6 இடங்களை பிடிக்கும் அணிகள் பிளே -ஆப் சுற்றுக்கு முன்னேறும். லீக்கில் 'டாப்-2' இடங்களை வசப்படுத்தும் அணிகள் நேரடியாக அரைஇறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதும். அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், புரோ கபடி லீக் தொடரில் இன்று சனிக்கிழமை (அக்.25) இரவு 8 மணிக்கு ஐதராபாத்தில் உள்ள கச்சிபௌலி ஸ்டேடியத்தில் அரங்கேறும் ஆட்டத்தில் யு மும்பா - பெங்கால் வாரியர்ஸ் அணிகள் மோதவுள்ளன. 

யு மும்பா மற்றும் பெங்கால் வாரியர்ஸ் அணிகள் தங்களது கடைசி போட்டியில் வென்ற உற்சாகத்துடன் களமாடுகின்றன. யு மும்பா குஜராத் ஜெயண்ட்ஸ் அணியையும், பெங்கால் வாரியர்ஸ் உ.பி யோதாஸையும் வீழ்த்திய கையுடன் களமாடுகின்றன. அதனால், இந்த இரு அணிகளும் அடுத்த வெற்றிக்கு குறி வைக்கும். எனவே, இவ்விரு அணிகள் மோதும் இன்றைய ஆட்டத்தில் பரபரப்புக்கு பஞ்சமிருக்காது.  

நேருக்கு நேர் 

புரோ கபடி லீக் வரலாற்றில், யு மும்பா மற்றும் பெங்கால் வாரியர்ஸ் 20 முறை நேருக்கு நேர் விளையாடியுள்ளன. இதில் யு மும்பா 14 முறையும், பெங்கால் வாரியர்ஸ் 5 முறை வென்றுள்ளன. ஒரு போட்டி டையில் முடிந்தது.

கடைசியாக இவ்விரு அணிகள் மோதிய ஆட்டத்தில் பெங்கால் வாரியர்ஸ் அணி 46-34 என்ற கணக்கில் வெற்றி பெற்றது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“