விவசாயி மகன், கால்பந்தில் ஆர்வம்... இந்தியாவுக்கு 2-வது வெண்கலம் வென்று கொடுத்த சரப்ஜோத் சிங் யார்?

33-வது ஒலிம்பிக் திருவிழா பிரான்ஸ் தலைநகர் பாரீசில் கடந்த வெள்ளிக்கிழமை முதல் கோலாகலமாக நடைபெற்று வருகிறது. இதில், இந்திய தரப்பில் 117 வீரர் - வீராங்கனைகள் பங்கேற்று உள்ளனர். இந்நிலையில், பாரீஸ் ஒலிம்பிக் போட்டியின் 4-வது நாளான இன்று நடைபெற்ற துப்பாக்கி சுடுதல் 10 மீட்டர் ஏர் பிஸ்டல் கலப்பு அணிகள் பிரிவுக்கான வெண்கல பதக்க போட்டியில் தகுதி சுற்றில் வெற்றி பெற்ற இந்தியாவின் சரப்ஜோத் சிங் - மனு பாக்கர் இணை, தென் கொரியாவின் ஜின் ஓ யே - வோன்ஹோ லீ ஜோடியை எதிர்கொண்டனர். 

மிகவும் பரபரப்பாக அரங்கேறிய இந்தப் போட்டியில் தொடக்கம் முதலே சிறப்பாக விளையாடிய இந்திய இணை 16-10 என்ற கணக்கில் தென் கொரிய ஜோடியை வீழ்த்தி வெண்கல பதக்கம் வென்று அசத்தினர்.  மனு பாக்கர் ஏற்கனவே பாரிஸ் ஒலிம்பிக்கில் பெண்களுக்கான 10 மீட்டர் ஏர் பிஸ்டல் பிரிவில் வெண்கலப் பதக்கம் வென்றிருந்த நிலையில், ஆடவருக்கான 10 மீட்டர் ஏர் பிஸ்டல் பிரிவில் சரப்ஜோத் சிங் 6வது இடத்தை பிடித்தார். 

யார் இந்த சரப்ஜோத் சிங்?

விவசாயி மகன்

ஹரியானா மாநிலம் அம்பாலாவில் உள்ள தீன் கிராமத்தைச் சேர்ந்தவர் சரப்ஜோத் சிங். அவர் ஜதீந்தர் சிங் என்ற விவசாயி மற்றும் ஹர்தீப் கவுர் ஆகியோரின் மகன் ஆவார். சண்டிகரில் உள்ள டி.ஏ.வி கல்லூரியில் படித்தார். துப்பாக்கி சுடுதல் பயிற்சியாளர் அபிஷேக் ராணாவிடம் பயிற்சி பெறுகிறார்.

கோடைகால முகாமின் போது தற்காலிக ரேஞ்சை நோக்கி சில இளம் வீரர்கள் ஏர் கன்களைப் பயன்படுத்துவதைக் கண்டார். அப்போது அவருக்கு வயது 13. அவரோ கால்பந்து வீரராக வேண்டும் என்ற நம்பிக்கை கொண்டிருந்தார். ஆனால் கைத்துப்பாக்கிகளுடன் காகித இலக்குகளை குறிவைக்கும் குழந்தைகளின் முகங்கள் அவரது மனதை விட்டு நீங்கவில்லை. 

இதனையடுத்து, 2014-ம் ஆண்டு தன் தந்தையிடம் சென்ற சரப்ஜோத் சிங், "அப்பா, நான் ஷூட்டிங் தொடர விரும்புகிறேன்" என்று கூறினார்.  அதற்கு அவரது தந்தை ஜிதேந்தர் சிங், "விவசாய குடும்பத்தில் பிறந்த நமக்கு இந்த விளையாட்டு மிகவும் விலை உயர்ந்தது" என்று தனது மகனிடம் கூறினார். ஆனால் இறுதியில், சரப்ஜோத் ஷூட்டிங் விளையாட பல மாதங்கள் வலியுறுத்தினார். மேலும் அவர் 2019 இல் நடந்த ஜூனியர் உலக சாம்பியன்ஷிப்பில் தங்கப் பதக்கத்தை வென்றார்.

சரப்ஜோத் சிங்கின் பதக்கங்கள் மற்றும் சாதனைகள்

ஆசிய விளையாட்டுப் போட்டி 2022: குழுப் போட்டியில் தங்கப் பதக்கம் மற்றும் கலப்பு அணிப் போட்டியில் வெள்ளிப் பதக்கம்.

ஆசிய சாம்பியன்ஷிப் 2023, கொரியா: 10 மீட்டர் ஏர் பிஸ்டல் தனிநபர் போட்டியில் வெண்கலப் பதக்கம் மற்றும் ஒலிம்பிக் 2024 கலந்து கொள்ள ஒதுக்கீடு இடம்

ISSF உலகக் கோப்பை 2023 போபால்: தனிநபர் போட்டியில் தங்கப் பதக்கம்

உலகக் கோப்பை 2023 - பாகு: கலப்பு குழு போட்டியில் தங்கப் பதக்கம்

ஜூனியர் உலகக் கோப்பை 2022 - சுஹ்ல்: குழு நிகழ்வில் 1 தங்கப் பதக்கம் மற்றும் தனிநபர் மற்றும் கலப்பு குழு நிகழ்வுகளில் 2 வெள்ளிப் பதக்கங்கள்.

ஜூனியர் உலக சாம்பியன்ஷிப் 2021 லிமாவில்: குழு மற்றும் கலப்பு குழு நிகழ்வுகளில் 2 தங்கப் பதக்கங்கள்.

ஒலிம்பிக்கில் இதுவரை துப்பாக்கி சுடுதல் பதக்கம் வென்ற இந்திய வீரர்களின் முழு பட்டியல்:

துப்பாக்கி சுடும் நிகழ்வு - பதக்கம் - ஒலிம்பிக்

ராஜ்யவர்தன் சிங் ரத்தோர் - ஆண்கள் இரட்டை டிராப் - வெள்ளி - ஏதென்ஸ் 2004
அபினவ் பிந்த்ரா - ஆண்கள் 10மீ ஏர் ரைபிள் - தங்கம் - பெய்ஜிங் 2008
ககன் நரங் - ஆண்கள் 10 மீ ஏர் ரைபிள் - வெண்கலம் - லண்டன் 2012
விஜய் குமார் - ஆண்களுக்கான 25 மீ ரேபிட் ஃபயர் பிஸ்டல் - வெள்ளி - லண்டன் 2012
மனு பாக்கர் - பெண்களுக்கான 10 மீ ஏர் பிஸ்டல் - வெண்கலம் - பாரிஸ் 2024
மனு பாக்கர் - சரப்ஜோத் சிங் கலப்பு அணி 10 மீட்டர் ஏர் பிஸ்டல் - வெண்கலம் - பாரிஸ் 2024

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“