அமித்ஷா வீட்டில் இல்லை; சென்னையில் தான் அ.தி.மு.க அலுவலகம் இருக்கு; சந்தேகம் இருந்தால் வந்து பார்த்துவிட்டு போங்கள்: கனிமொழிக்கு இ.பி.எஸ் பதிலடி

தமிழகத்தில் 2026-ஆம் ஆண்டு சட்டசபைத் தேர்தல் நடைபெறவுள்ளது. இதற்காக தி.மு.க., அ.தி.மு.க., த.வெ.க உட்பட பல கட்சில்கள் தேர்தல் களப்பணிகளில் ஈடுபட்டு வருகின்றனர். அந்த வகையில் சமீபத்தில் தமிழக வெற்றிக் கழக தலைவர் விஜய் திருச்சி, நாகை, திருவாரூர் உள்ளிட்ட இடங்களில் அரசியல் சுற்றுப் பயணம் மேற்கொண்டு தேர்தல் பரப்புரையில் ஈடுபட்டார்.

வரும் டிசம்பர் மாதம் வரை அரசியல் சுற்றுப் பயணத்தில் ஈடுபட விஜய் திட்டமிட்டுள்ளார். இது ஒரு புறம் இருக்க மற்றொரு புறம் அ.தி.மு.க பொதுச் செயலாளர் எடப்பாடி பழனிசாமி 'மக்களைக் காப்போம் தமிழகத்தை மீட்போம்' என்ற பெயரில் தமிழகம் முழுவதும் அரசியல் சுற்றுப்பயணம் மேற்கொண்டு வருகிறார். 

நீலகிரி மாவட்டத்திற்கு இன்று வருகை தந்திருக்கும் எடப்பாடி பழனிசாமி குன்னூரில் உரையாற்றினார். அப்போது, “அ.தி.மு.க வின் தலைமை அலுவலகம் டெல்லியில் உள்ள மத்திய உள்துறை அமைச்சர் அமித்ஷா வீட்டில் இருப்பதாக கனிமொழி கூறுகிறார். 

உண்மையில் கனிமொழி கனவு கண்டிருக்கிறார் போல. கனிமொழி அவர்களே அ.தி.மு.க அலுவலகம் சென்னையில் தான் உள்ளது. சந்தேகம் இருந்தால் வந்து பார்த்துவிட்டு செல்லுங்கள்” என்று கூறியுள்ளார். சமீபத்தில் அ.தி.மு.க பொதுச்செயலாளர் எடப்பாடி பழனிசாமி டெல்லியில் உள்துறை அமைச்சர் அமித்ஷாவை நேரில் சந்தித்தார்.

இந்த சந்திப்பிற்கு பிறகு பாஜக முன்னாள் தலைவர் அண்ணாமலை மற்றும் பாஜக மாநிலத் தலைவர் நயினார் நாகேந்திரன் ஆகியோர் எடப்பாடி பழனிசாமியை நேரில் சந்தித்தது குறிப்பிடத்தக்கது.