அ.தி.மு.க - பா.ஜ.க கூட்டணி முறிவு: நிர்மலா சீதாராமனிடம் 'அறிக்கை’ கேட்ட தேசிய தலைமை

Aiadmk | bjp | edappadi-k-palaniswami | nirmala-sitharaman: எதிர்வரும் 2024 மக்களவை தேர்தலுக்கு முன்னதாக தேசிய கட்சியான பா.ஜ.க தலைமையிலான தேசிய ஜனநாயகக் கூட்டணியில் இருந்த  எடப்பாடி கே. பழனிசாமி தலைமையிலான அ.தி.மு.க அதன் கூட்டணியை முறித்துக் கொண்டது. இது தமிழக அரசியலில் பெரும் பரபரப்பை ஏற்படுத்திய நிலையில்,  பா.ஜ.க-வுடனான உறவை அ.தி.மு.க  துண்டித்த சில நாட்களுக்குப் பிறகு, மக்களவைத் தேர்தலுக்கு இன்னும் 6 மாதங்களே  உள்ளதால், கூட்டணி குறித்து மறுபரிசீலனை செய்வதில் ஆளும் பா.ஜ.க-வின்  தேசியத் தலைமை ஆர்வமாக உள்ளது. 

கடந்த செவ்வாய்க்கிழமை அரசு நிகழ்ச்சிக்காக சென்னை வந்திருந்த மத்திய நிதியமைச்சர் நிர்மலா சீதாராமனிடம், அ.தி.மு.க உடனான கூட்டணியின் முடிவு குறித்து “அறிக்கை” அளிக்குமாறு கேட்டுக் கொள்ளப்பட்டதாக அரசியல் வட்டாரங்கள் தெரிவித்துள்ளன. 

மாநில பா.ஜ.க தலைவர் அண்ணாமலை மீது சிறிது காலமாக கோபத்தில் இருந்த அ.தி.மு.க., பிரிந்து செல்லும் என தேசிய தலைமை எதிர்பார்க்கவில்லை என்று அக்கட்சியைச் சேர்ந்த தலைவர்கள் தெரிவிக்கின்றனர். அண்ணாமலைக்கு தலைமை வழங்கிய நீண்ட ஓட்டம் அ.தி.மு.க-வின் நிழலில் இருந்து வெளிவருவதற்கான உத்தியாக இருந்திருக்கலாம் என்றாலும், 2024 தேர்தலை மனதில் வைத்து தனது மாநில கூட்டணி கட்சியான அ.தி.மு.க-வுடன் மீண்டும் இணைய பா.ஜ.க பேட்ச்-அப் முயற்சிகளை மேற்கொண்டதாக தெரிகிறது. தென் மாநிலங்களின் தேர்தல் முடிவுகள் பா.ஜ.க.வின் மக்களவை தேர்தல் லட்சியங்களுக்கு முக்கியமானது என்பதாலும், தேசிய தலைமை நிதியமைச்சர் நிர்மலா சீதாராமனை அனுப்பியுள்ளது. 

ஆங்கிலத்தில் படிக்க:- Days after AIADMK ends alliance, BJP asks Nirmala Sitharaman for a ‘status report’

அ.தி.மு.க.வுடனான கருத்து வேறுபாடுகளை களைய இன்னும் கால அவகாசம் இருப்பதாக பா.ஜ.க தலைமை நம்பியிருக்கலாம் என்றும், தமிழகத்தில் தேர்தல் பேச்சு குறித்து தீவிர பேச்சுவார்த்தையை இன்னும் தொடங்கவில்லை என்றும் பா.ஜ.க-வின் மூத்த தலைவர் ஒருவர் முன்பு கூறியிருந்தார். அ.தி.மு.க.வுக்கு எதிராக ஆத்திரமூட்டும் கருத்துகளை கூற வேண்டாம் என சமீபத்தில் அண்ணாமலையிடம் கூறியதாகவும்  அவர் குறிப்பிட்டு இருந்தார். இது கூட்டணியை அப்படியே வைத்திருக்க பா.ஜ.க தேசிய தலைமை ஆர்வமாக இருப்பதை காட்டுகிறது.

ஆனால், அண்ணாமலை, முன்னாள் முதல்வர்களான அண்ணாதுரை, ஜெயலலிதா என அ.தி.மு.க.வைத் தாக்கி மூலைக்கு தள்ளினார். மாநிலத்தில் பா.ஜ.க இன்னும் சாதகமாக பார்க்கப்படாததால் தற்போதைய நிலைமையை மறுபரிசீலனை செய்வதற்கான உந்துதல் வருகிறது.

அண்ணாமலை சனாதன தர்ம சர்ச்சையில் காலை விட்டு சிக்கிக் கொண்டார். முன்னாள் முதல்வர் அண்ணாதுரை பற்றிய அவரது கருத்துக்கு அவருக்கு பின்னடைவைக் கொடுத்ததை தொடர்ந்து, அண்ணாதுரையின் பாரம்பரியத்தை மதிக்கும் அதே வேளையில், அ.தி.மு.க தலைவர் எடப்பாடி கே.பழனிசாமியை தமிழகத்தில் தேசிய ஜனநாயகக் கூட்டணியின் தலைவராக ஏற்க மாட்டேன் என்று அண்ணாமலை கூறினார். 

செப்டம்பர் 22 அன்று, தி இந்தியன் எக்ஸ்பிரஸ் வெளியிட்ட செய்தியில், அ.தி.மு.க பிரதிநிதிகள் டெல்லிக்கு அவசர அவசரமாக பா.ஜ.க தலைமையைச் சந்திக்கச் சென்றனர். இந்த சந்திப்பைப் பற்றி அறிந்த அ.தி.மு.க-வின் உயர்மட்டத் தலைவர் ஒருவர், பா.ஜ.க தலைவர் ஜே.பி. நட்டாவிடம், தங்கள் கட்சி மற்றும் தலைமைக்கு எதிராக அண்ணாமலை மீண்டும் மீண்டும் கருத்து தெரிவித்ததால், தொண்டர்கள் அதிருப்தியை வெளிப்படுத்தியதாகக் கூறினார். "அவர் மீது நடவடிக்கை எடுக்க நாங்கள் கோரினோம், அல்லது கூட்டணி கட்சிகளை ஒன்றாக வைத்திருக்கவும், அண்ணாமலையை இந்த தேர்தலில் இருந்து விலக்கி வைக்க தமிழகத்திற்கு தேசிய ஜனநாயகக் கூட்டணி சார்பாக ஒருங்கிணைப்பாளரை நியமிக்கவும் பா.ஜ.க தேசிய தலைமையிடம் கோரிக்கை வைத்தோம்," என்று அந்த அ.தி.மு.க தலைவர் கூறினார்.

அப்போது பா.ஜ.க தலைமை எந்தக் கருத்தையும் தெரிவிக்காத நிலையில், சென்னையில் கடந்த திங்கள்கிழமை நடைபெற்ற மாவட்ட செயலர்கள் கூட்டத்துக்குப் பிறகு அ.தி.மு.க பா.ஜ.க உடனான கூட்டணி முறித்துக்கொள்வதாக அறிவித்தது. 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“