'துரோகிகள் யாராக இருந்தாலும் நடவடிக்கை'... ஓ.பி.எஸ், டி.டி.வி, செங்கோட்டையன் குறித்து இ.பி.எஸ் ஆவேசம்

ராமநாதபுரம் மாவட்டம் பசும்பொன்னில் இன்று (அக்.30) நடைபெற்ற முத்துராமலிங்க தேவர் ஜெயந்தி மற்றும் குருபூஜை விழாவில், முன்னாள் முதலமைச்சர் ஓ.பன்னீர்செல்வம், அ.ம.மு.க. பொதுச்செயலாளர் டி.டி.வி தினகரன் மற்றும் அ.தி.மு.க. முன்னாள் அமைச்சர் செங்கோட்டையன் ஆகியோர் ஒரே நேரத்தில் அருகருகே மரியாதை செலுத்தியது அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்தச் சந்திப்பு, 2026 சட்டமன்றத் தேர்தலை முன்னிட்டு புதிய அரசியல் கூட்டணிக்கான சாத்தியக்கூறுகளை மீண்டும் கிளப்பியுள்ளது.

ஓ.பி.எஸ், தினகரன் 'துரோகிகள்' - எடப்பாடி பழனிசாமி தாக்கு

இந்தச் சூழலில், மதுரை தெப்பக்குளம் பகுதியில் செய்தியாளர்களைச் சந்தித்த அ.தி.மு.க. பொதுச் செயலாளர் எடப்பாடி பழனிசாமியிடம் இதுகுறித்த கேள்விகள் எழுப்பப்பட்டன. அதற்குப் பதிலளித்த அவர், "இந்த மூவரும் அ.தி.மு.க.வில் இருந்தபோதே கட்சிக்கு குழி பறித்ததன் விளைவாகத்தான் கட்சிக்குத் தோல்வி ஏற்பட்டது. துரோகிகள் யாராக இருந்தாலும் உரிய நடவடிக்கை எடுக்கப்படும்" என்று ஆவேசமாகத் தெரிவித்தார். மேலும், ஓ. பன்னீர்செல்வம் மற்றும் டி.டி.வி. தினகரன் ஆகியோர் தி.மு.க.வின் 'பி-டீம்' போல செயல்படுவதாகவும், அ.தி.மு.க.வின் உண்மையான தொண்டர்கள் தங்களுடன்தான் உள்ளனர் என்றும் எடப்பாடி பழனிசாமி கூறினார்.

செங்கோட்டையன் மீது நடவடிக்கை உறுதியா?

அண்மைக் காலமாக கட்சியில் முக்கியத்துவம் குறைந்திருந்த முன்னாள் அமைச்சர் செங்கோட்டையன், ஓ.பி.எஸ் மற்றும் டிடிவி தினகரன் ஆகியோருடன் இணைந்து மரியாதை செலுத்தியது குறித்து செய்தியாளர்கள் கேள்வி எழுப்பினர். செங்கோட்டையன் மீது அ.தி.மு.க. தலைமை நடவடிக்கை எடுக்குமா என்ற கேள்விக்கு பதிலளித்த எடப்பாடி பழனிசாமி, "ஏற்கனவே அனைத்து கட்சிப் பொறுப்புகளும் நீக்கப்பட்டுவிட்டன. இனி முறைப்படி கட்சிசார் நடவடிக்கை எடுக்கப்படும்" என்று திட்டவட்டமாகக் கூறினார். இதனால், இன்று மாலை அல்லது நாளை அ.தி.மு.க. தலைமையிலிருந்து செங்கோட்டையன் நீக்கப்படுவது தொடர்பான அதிகாரப்பூர்வ அறிவிப்பு வெளியாகும் என்று அரசியல் வட்டாரங்கள் எதிர்பார்க்கின்றன.

த.வெ.க. கூட்டணி குறித்த நிலைப்பாடு மீண்டும் உறுதி

தொடர்ந்து, நடிகர் விஜய்யின் தமிழ் வெற்றி கழகம் (த.வெ.க.) உடனான கூட்டணி பேச்சுவார்த்தை குறித்து எழுப்பப்பட்ட கேள்விக்கு பதிலளித்த எடப்பாடி பழனிசாமி, "தமிழக வெற்றி கழகத்தோடு அ.தி.மு.க. கூட்டணி பேச்சு வார்த்தை நடத்தவில்லை. அதுபோல அவர்களும் எங்களோடு கூட்டணி பேச்சுவார்த்தை நடத்தவில்லை" எனத் தெளிவுபடுத்தினார்.