உதயநிதி ஸ்டாலினுக்கு துணை முதல்வர் பதவி குறித்த பேச்சு; கூட்டணி கட்சிகளில் இருந்து அதிருப்தி குரல்கள்

Arun Janardhanan 

2019 லோக்சபா தேர்தலுக்கு முன் தமிழகத்தில் தி.மு.க தலைமையிலான கூட்டணி உருவான பிறகு முதல்முறையாக, முதல்வர் மு.க.ஸ்டாலினின் மகன் உதயநிதியை துணை முதல்வராக உயர்த்துவது குறித்து வி.சி.க தலைவர் ஒருவர் அதிருப்தி தெரிவித்துள்ள நிலையில், கூட்டணிக்குள் பதற்றமான அறிகுறிகள் தென்படுகின்றன. 

ஆங்கிலத்தில் படிக்க: Amid talk of Stalin’s son as Deputy CM, voices of dissent from ally corner

தமிழ் செய்தி சேனலான தந்தி டி.வி.,யிடம் பேசிய வி.சி.க (விடுதலை சிறுத்தைகள் கட்சி) துணை பொதுச்செயலாளர் ஆதவ் அர்ஜுனா, உதயநிதியின் பெயரை குறிப்பிடாமல், “நேற்று சினிமாவில் இருந்து வந்த ஒருவர்” துணை முதல்வர் ஆகப் போகிறார் என்று கருத்து தெரிவித்தார். மேலும், “அதிகாரத்தில் (மாநில அமைச்சரவையில்) பங்கு பெறுவது முக்கியமானது... தி.மு.க.,வுக்கும் நாங்கள் தேவை; தி.மு.க.,வின் தயவில் இருக்கும் சிறிய கட்சி போல் நாங்கள் இல்லை,” என்றும் ஆதவ் அர்ஜூனா கூறினார்.

தமிழக அரசில் எந்த தி.மு.க கூட்டணிக்கும் எந்த இலாகாவும் இல்லை.

2021ல் வி.சி.க உடன் இணைந்து பணியாற்றத் தொடங்கிய அரசியல் வியூகவாதியும் இந்த ஆண்டில் வி.சி.கட்சியில் இணைந்தவருமான ஆதவ் அர்ஜுனாவின் கருத்துக்கள், மூத்த தி.மு.க தலைவர்களிடமிருந்து உடனடி எதிர்வினையை எதிர்கொண்டன. அதன்பின்னர் ஆதவ் அர்ஜூனாவின் கருத்துக்களில் இருந்து வி.சி.க., தன்னை விலக்கிக் கொள்ள முயன்றது, அதன் தலைவர் திருமாவளவனும் புதன்கிழமை தனது மௌனத்தை கலைத்தார்.

கள்ளக்குறிச்சி கள்ளச்சாராய மரண சோகத்தின் பிரதிபலிப்பாக ஏற்பாடு செய்யப்பட்ட ‘முழு மதுவிலக்கு மாநாட்டிற்கு’ அ.தி.மு.க.,வை அழைக்கும் வி.சி.க.,வின் ஆச்சரியமான முடிவின் பின்னணியில் ஆதவ் அர்ஜூனாவின் கருத்துக்களால் தி.மு.க - வி.சி.க உறவில் விரிசல் ஏற்பட்டது. கள்ளக்குறிச்சி கள்ளச்சாராய சோகத்தால் பாதிக்கப்பட்டவர்கள் பெரும்பாலும் தலித்துகள். தி.மு.க தலைவரும், முதல்வருமான ஸ்டாலின் வெளிநாட்டில் இருந்தபோது மதுவிலக்கு மாநாட்டு தேதி அறிவிக்கப்பட்டு அழைப்பு அனுப்பப்பட்டது.

ஸ்டாலின் அமெரிக்காவில் இருந்து திரும்பிய பிறகு, திருமாவளவனை சந்தித்துப் பேசினார், பின்னர், அக்டோபர் 2-ம் தேதி நடைபெறும் மாநாட்டில் தி.மு.க.வும் கலந்துக் கொள்ளும் என்று கூறி, விரிசலுக்கு முற்றுப்புள்ளி வைத்தனர். 

ஆதவ் அர்ஜுனாவின் கருத்துக்களுக்கு விமர்சனம் செய்த தி.மு.க தலைவர் ஆ.ராசா, திருமாவளவன் இடதுசாரி மதிப்புகளின் வலுவான ஆதரவாளர் என்றும், தலித் உரிமைகளுக்காகவும் வகுப்புவாதத்திற்கு எதிராகவும் எப்போதும் "சமரசமின்றி" போராடியவர் என்று புகழாரம் சூட்டினார். “சமீபத்தில் வி.சி.க.,வில் இணைந்த ஒருவர் இதுபோன்ற அறிக்கைகளை வெளியிட்டது மிகவும் துரதிர்ஷ்டவசமானது. திருமாவளவனுக்குத் தெரியாமல் ஆதவ் அர்ஜுனா பேசியதாக நான் நம்புகிறேன்,” என்று தி.மு.க.,வின் முக்கிய தலித் முகமான ஆ.ராசா கூறியுள்ளார்.

ஆதவ் அர்ஜுனா தனது கருத்துகளில், உதயநிதி நடித்த 2023 ஆம் ஆண்டு வெளியான மாமன்னன் திரைப்படத்தைப் பற்றியும் குறிப்பிட்டார், முக்கிய கதாபாத்திரமாக, உள்ளூர் நிலப்பிரபுத்துவத்தின் முன் தனது தந்தையின் கீழ்ப்படிதலுக்கு எதிராக கிளர்ச்சி செய்யும் ஒரு தலித் எம்.எல்.ஏ.,வின் மகனாக உதயநிதி நடித்திருந்ததைப் பற்றிக் குறிப்பிட்டார். ஒரு காட்சியில், அவரது எம்.எல்.ஏ., தந்தை நிலப்பிரபுவின் முன் இருக்கையில் அமர்வதை எதிர்க்கும் போது, உதயநிதி ஒரு நாற்காலியைப் பிடித்து வலுக்கட்டாயமாக உட்கார வைப்பார்.

“மாமன்னன் மாதிரி. என் தலைவரை (திருமாவளவன்) அதிகாரத்தை பகிர்ந்து கொள்ள வேண்டிய ஒன்றாகவே பார்க்கலாம், அதற்காக பொறுமையாக காத்திருக்க வேண்டும். ஆனால் புதிய தலைமுறை தொண்டர்கள் அப்படி இல்லை. அவர்கள் கேட்கிறார்கள், 'எனது தலைவர் எப்போது மேல்நிலையில் வருவார்? இன்னும் எத்தனை காலம் இப்படியே பணியாற்ற வேண்டும்?’ திரைத்துறையைச் சேர்ந்த ஒருவரை அடுத்த துணை முதல்வராகக் கருதும்போது, அதை ஏன் என் தலைவனால் அடைய முடியவில்லை? நான் சாதாரண தொண்டர்களின் உணர்வுகளை பிரதிபலிக்கிறேன்,” என்று ஆதவ் அர்ஜூனா கூறினார்.

2021 சட்டமன்றத் தேர்தலுக்குப் பிறகு அதிகாரப் பகிர்வைக் கோர திருமாவளவன் தயாராக இல்லை, ஆனால் கட்சிக்கு உரிய உரிமை கிடைக்க வேண்டும் என்று ஆதவ் அர்ஜூன் கூறினார். “இது பேரம் பேசுவது அல்ல. எங்களை சிறிய கட்சிகளாக பாவித்து, தி.மு.க.,வை ஏன் பெரிய கட்சியாகப் பார்க்க வேண்டும்? உண்மையிலேயே தி.மு.க பெரிய கட்சியாக இருந்தால் தனித்து நிற்க வேண்டும்... வி.சி.க ஆதரவு இல்லாமல் வடமாவட்டங்களில் தி.மு.க.,வால் வெற்றி பெற முடியாது” என்று ஆதவ் அர்ஜூனா கூறினார்.

ஆதவ் அர்ஜூனாவின் இந்த கருத்துக்கு தி.மு.க கடும் கோபத்தில் இருக்கும் நிலையில், வி.சி.க மூத்த தலைவரும், திருமாவளவனின் நெருங்கிய கூட்டாளிகளுமான வன்னி அரசு, ”ஆதவ் அர்ஜூனாவின் கருத்து முற்றிலும் தனிப்பட்டது. நாங்கள் ஒரு கட்சியை நடத்தி வரும் நிலையில், எங்கள் தலைவரை மேலிடத்தில் பார்க்க வேண்டும் என்ற நோக்கத்தில் இருக்கிறோம். (ஆனால்) ஆதவ் அர்ஜுனா சொன்னது அவருடைய பார்வை,” என்று கூறினார்.

திருமாவளவனுக்கு நெருக்கமான மற்றொரு மூத்த வி.சி.க தலைவர் இதே கருத்துக்களை எதிரொலித்தார், மேலும், கட்சியின் முக்கிய போராட்டம் பா.ஜ.க மற்றும் ஆர்.எஸ்.எஸ் தலைமையிலான வகுப்புவாத சக்திகளுக்கு எதிரானது என்று கூறினார். தி.மு.க.வுடனான கூட்டணி வலுவாக இருப்பதாகக் கூறி, ஆட்சியில் பங்கேற்காமல் இருப்பதற்கான வி.சி.க.,வின் விருப்பத்தை குறைத்து மதிப்பிட வேண்டாம். நாம் ஒன்றாக வேலை செய்யும் போது, வெற்றி என்பது அனைவருக்கும் கிடைக்கும் என்றும் அந்த தலைவர் கூறினார்.

வி.சி.க.வுக்குள் ஆதவ் அர்ஜுனாவின் எழுச்சி, அதாவது கட்சியில் உயர் பதவியை வகிக்கும் ஒரே தலித் அல்லாதவராக அவர் மாறியது, விரைவானது மற்றும் ஒருமனதாக பிரபலமடையவில்லை. மத்திய ஏஜென்சிகளின் ரேடாரின் கீழ் இருக்கும் அவரது மாமனார் மற்றும் சர்ச்சைக்குரிய ஆனால் சக்திவாய்ந்த தொழிலதிபர் மற்றும் லாட்டரி மன்னன் சாண்டியாகோ மார்ட்டினுடனான அவரது தொடர்புகளை பலர் இதில் காண்கிறார்கள்.

ஆதவ் அர்ஜுனா உண்மையில் 2015 முதல் 2021 வரை தி.மு.க.,வின் பிரச்சாரக் குழுவில் இருந்தவர். 2019 மக்களவைத் தேர்தலுக்கு தி.மு.க.,வில் இருந்து டிக்கெட் கிடைக்காததால் வி.சி.க.,வுக்கு மாறினார். 2021 சட்டமன்றத் தேர்தலுக்குப் பிறகு, வாய்ஸ் ஆஃப் காமன் என்ற அரசியல் வியூகக் குழுவை ஆதவ் அர்ஜூனா நிறுவினார், இதன் வாடிக்கையாளராக வி.சி.க மாறியது, கட்சியை அதன் முக்கிய தலித் தளத்திற்கு அப்பால் விரிவுபடுத்த இந்தக் குழு உதவுகிறது.

வி.சி.க.,வுக்குள் இருக்கும் பல ஆதாரங்கள் கட்சியில் ஆதவ் அர்ஜுனாவின் செல்வாக்கு குறித்து கவலை தெரிவித்தனர். ஒரு தலைவர் கூறினார்: “தாழ்மையான விவசாயப் பின்னணியில் இருந்து வந்த ஆதவ் அர்ஜுனா செல்வம் மிகுந்த இடத்தில் திருமணம் செய்துக் கொண்டார். ஜனவரியில் நடைபெற்ற வி.சி.க மாநாட்டிற்கு பல கோடிகள் உட்பட நிதி திரட்டுவதில் அவரது நிதி பலமும் பங்கும் அவருக்கு வி.சி.க.,வுக்குள் முன்னோடியில்லாத இடத்தை அளித்துள்ளது.”

மற்றொரு வி.சி.க வட்டாரம் கூறுகையில், ஆதவ் அர்ஜுனாவுக்கு தனக்கு டிக்கெட் மறுத்த தி.மு.க மீது இன்னும் ஒரு கொந்தளிப்பு இருந்து கொண்டே இருக்கலாம். இதனால்தான் அவர் தி.மு.க.,வை குறிவைத்து வி.சி.க பேனரை பயன்படுத்துகிறார் என்றார்.

வி.சி.க., மூத்த தலைவர் ஒருவர் கூறியதாவது: அக்கட்சியின் அரசியல் வியூகவாதி திருமாவளவன். வேறு எவருக்கும் வேறுபட்ட மூலோபாயத்தை உருவாக்க அதிகாரம் இல்லை. ஆதவ் அர்ஜுனா புதிதாக நுழைந்தவர், அவருக்கு கட்சியின் சித்தாந்தம் அல்லது வரலாறு பற்றி எதுவும் தெரியாது.

இதற்கிடையில், உதயநிதி துணை முதல்வராகப் பதவியேற்க உள்ளதாக கடந்த சில நாட்களாக ஸ்டாலின் பல குறிப்புகளை வெளியிட்டார். புதன்கிழமை காலை, இறுதியாக இந்த விவகாரத்தில் தனது மவுனத்தை கலைத்து, திருமாவளவன் கூறியதாவது: தி.மு.க மற்றும் வி.சி.க கூட்டணியில் எந்த பிரச்சனையும் இல்லை, எங்களுக்குள் எந்த சந்தேகமும் இல்லை. அதிகாரப் பகிர்வு தொடர்பான எனது காணொளி ஒன்று இந்த சர்ச்சையைத் தூண்டியுள்ளது. எங்கள் கட்சித் தலைவர்களிடம் பேசியுள்ளேன், அவர்களின் கருத்துப்படி உரிய நடவடிக்கை எடுப்போம்” என்றார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“