பகுஜன் சமாஜ் கட்சியின் தமிழ்நாடு தலைவரான ஆம்ஸ்ட்ராங் கொல்லப்பட்டது தொடர்பான விரிவான விசாரணையில் இப்போது குறைந்தபட்சம் 24 பேரைக் கைது செய்ய வழிவகுத்துள்ளது, கேங்ஸ்டர் போட்டியாளர்கள், நிதி பரிவர்த்தனைகள் மற்றும் ஆழமான பகைகள் ஆகியவற்றின் வலையை உருவாகி சதித்திட்டத்தில் ஒன்றிணைந்துள்ளனர். ஆம்ஸ்ட்ராங்கை கொல்லும் சதியில் அனைவரும் ஒன்றிணைந்துள்ளனர். இதில், அ.தி.மு.க, பா.ஜ.க, இளைஞர் காங்கிரசை சேர்ந்தவர்களும் அடங்குவர்.
ஆங்கிலத்தில் படிக்க: Behind BSP leader’s murder, a coalition of plotters & rivals with political links
கொலை நடந்த சில மணி நேரங்களுக்குப் பிறகு, 8 பேர் சரணடைந்த நிலையில், திரைப்படத் தயாரிப்பாளரும் நீலம் பண்பாட்டு மையத்தின் தலைவருமான பா.ரஞ்சித் தலைமையிலான தலித் குழுக்கள், உண்மையான குற்றவாளிகளை தி.மு.க அரசு பாதுகாப்பதாகவும் அரசியல் நோக்கம் இருப்பதாகவும் குற்றம் சாட்டினர்.
கடந்த ஆண்டு நடந்த ஒரு ரவுடி கொலையில் இந்த கொலை தொடர்புள்ளது என்பது காவல்துறையின் ஆரம்பக் கண்டுபிடிப்பு என்றாலும், ஆம்ஸ்ட்ராங்கின் கொலை ஒரு பழிவாங்கலின் விளைவு அல்ல, மாறாக பல்வேறு கும்பல்களின் நோக்கங்கள், அவரை கொலை செய்வதற்கான காரணமாக ஒவ்வொருவரும் அவர்களின் சொந்த நோக்கங்களின் சங்கமம் என்பது விசாரணையில் மெதுவாக தெரியவந்துள்ளது.
பகுஜன் சமாஜ் கட்சி ஆதரவாளர்கள் சென்னையில் 6 பேர் கொண்ட கும்பலால் தமிழ்நாடு பகுஜன் சமாஜ் கட்சித் தலைவர் கே ஆம்ஸ்ட்ராங் வெட்டிக் கொல்லப்பட்டதைக் கண்டித்து ராஜீவ் காந்தி அரசு மருத்துவமனை முன்பு திரண்டனர். (PTI/File)
பெயர் குறிப்பிட விரும்பாத மூத்த புலனாய்வாளர், ஆம்ஸ்ட்ராங்கிற்கு பல எதிரிகள் இருப்பதாக கூறினார். “குறைந்தபட்சம் ஆம்ஸ்ட்ராங்கின் எதிரிகளில் அரை டஜன் பேர் அவரை ஒழிக்க ஒன்றிணைந்ததாகத் தெரிகிறது. சிலர் பணத்தையும், சிலர் ஆள்பலத்தையும், சிலர் உளவு வேலையையும் வழங்கினர். அவர்கள் வெவ்வேறு கட்டங்களில் பங்களித்தனர், ஆனால், அவரை ஒழிப்பதே அவர்களின் குறிக்கோளாக இருந்தது” என்று அந்த அதிகாரி கூறினார்.
கடந்த ஆண்டு படுகொலை செய்யப்பட்ட ‘ஆற்காடு’ சுரேஷின் மனைவி பொற்கொடி (40) திங்கள்கிழமை கைது செய்யப்பட்டதன் மூலம் இந்த வழக்கில் சமீபத்திய முன்னேற்றம் ஒன்று வந்தது. ஆம்ஸ்ட்ராங் கொலையில் பங்கேற்ற மேலும் 7 பேருடன் சரணடைந்ததாகக் கூறப்படும் சுரேஷின் சகோதரர் பொன்னை பாலு உட்பட சந்தேக நபர்களுக்கு நிதி உதவி வழங்கியதாக அவர் குற்றம் சாட்டப்பட்டார்.
சுரேஷின் கொலைக்கு பழிவாங்கும் நடவடிக்கை என்ற காவல்துறையின் ஆரம்பக் கருத்து, குற்றத்திற்கு சற்று முன்பு பொற்கொடியிடம் இருந்து பாலுவுக்கு பணப் பரிமாற்றம் செய்யப்பட்டதற்கான ஆதாரங்களால் வலுப்பெற்றது.
ஜூலை 5-ம் தேதி கொலை நடந்த ஒரு வாரத்திற்குள், புலனாய்வாளர்கள் மற்றொரு கும்பலின் தொடர்பைக் கண்டுபிடித்தனர். திருச்சியைச் சேர்ந்த எஸ். மலர்கொடி (52), திருநின்றவூரைச் சேர்ந்தவர் கே.சதீஷ் (33), பழைய வண்ணாரப்பேட்டையைச் சேர்ந்த கே.ஹரிஹரன் (27) - ஆகிய மூன்று பேர் கைது செய்யப்பட்டனர். இதில் இருபது ஆண்டுகளுக்கு முன்னர் கொல்லப்பட்ட 'தோட்டம்' சேகரின் மனைவிதான் மலர்க்கொடி, 2021-ல் மற்றொரு ரவுடி கொலையில் அவரது பங்கிற்காக விசாரணைக்கு உட்படுத்தப்பட்டார்.
தி இந்தியன் எக்ஸ்பிரஸிடம் பேசிய புலனாய்வாளர்கள், ஆம்ஸ்ட்ராங் கொலைக்கு சில நாட்களுக்கு முன்பு முக்கிய குற்றம் சாட்டப்பட்ட ஒருவருக்கு செய்யப்பட்ட குறிப்பிடத்தக்க நிதி பரிவர்த்தனைகளின் ஆதாரங்கள் மூலம் ஆம்ஸ்ட்ராங் கொலையில் அவர் ஈடுபட்டதாகக் கூறப்பட்டது வெளிச்சத்திற்கு வந்தது.
டெல்லி விமான நிலையத்தில் கைது செய்யப்பட்ட வழக்கறிஞர் மலர்க்கொடி மற்றும் வழக்கறிஞர் ஹரிஹரன் ஆகிய அ.தி.மு.க நிர்வாகிகள் கட்சியில் இருந்து நீக்கப்பட்டனர்.
பல ஆண்டுகளுக்கு முன்பு எதிர் ரவுடி கும்பல் மீது நாட்டு வெடிகுண்டுகளை வீசியதாக மலர்க்கொடி முன்பு கைது செய்யப்பட்டார்.
புலனாய்வாளர்கள் கூறுகையில், ஹரிஹரன் மற்றும் மலர்க்கொடி ஆகியோர் ஆம்ஸ்ட்ராங் கொலை செய்யப்படுவதற்கு முன்பு கொலையாளிகளுக்காக வெடிகுண்டுகளை தயாரித்ததாகக் கூறப்படுகிறது. மேலும், இந்தியாவில் இருந்து தப்பி நேபாளத்தில் பதுங்கியிருப்பதாக நம்பப்படும் மற்றொரு முக்கிய சந்தேக நபரான சம்போ செந்திலிடம் இருந்து சுமார் ரூ.6 லட்சம் பரிவர்த்தனை செய்யப்பட்டதையும் கண்டுபிடித்துள்ளனர்.
இந்த விசாரணை அதோடு நிற்கவில்லை. திருநின்றவூரை சேர்ந்த பா.ஜ.க பிரமுகர் டி.செல்வராஜ் (49), வடசென்னை பா.ஜ.க மாவட்ட பொறுப்பாளர் எம். அஞ்சலை (48) ஆகியோரை போலீசார் கைது செய்தனர். கட்சியில் இருந்து நீக்கப்பட்ட இருவரும், தாக்குதல் நடத்தியவர்களுக்கு நிதி உதவி செய்ததாக குற்றம் சாட்டப்பட்டுள்ளது. கொலை செய்யப்பட்ட ரவுடி ஆற்காடு சுரேஷுடன் தொடர்புடையதாகக் கூறப்படும் ஹிஸ்டரி ஷீட்டர் அஞ்சலை, குற்றம் சாட்டப்பட்டவர்களில் ஒருவருக்கு பணம் செலுத்தியதாகவும், ஆம்ஸ்ட்ராங் கொலை செய்யப்படுவதற்கு முன்பு சில தாக்குதல்காரர்களுக்கு அடைக்கலம் கொடுத்ததாகவும் குற்றம் சாட்டப்பட்டதாக காவல்துறை தெரிவித்துள்ளது.
“ஆம்ஸ்ட்ராங் மையநீரோட்ட அரசியலில் ஈடுபட்டார், ஆனால், அவரது கடந்த காலம் அவருக்கு பல எதிரிகளை உருவாக்கியது” என்று ஒரு அதிகாரி கூறினார்.
1997-ம் ஆண்டு அ.தி.மு.க முன்னாள் எம்.எல்.ஏ ஸ்டான்லி சண்முகம் கொலை வழக்கில் தண்டனை பெற்ற தமிழக இளைஞர் காங்கிரஸ் பொறுப்பாளர் என். அஸ்வதாமன் மற்றும் அவரது தந்தை நாகேந்திரன் ஆகியோருடன் ஆம்ஸ்ட்ராங்கிற்கு மற்றொரு பகை இருப்பது கண்டுபிடிக்கப்பட்டதை அடுத்து விசாரணை தீவிரமடைந்தது. அஸ்வதாமன் கைது செய்யப்பட்டதை அடுத்து அவர் காங்கிரஸில் இருந்து நீக்கப்பட்டார்.
புலனாய்வாளர்கள் கூறுகையில், தொழில்துறை மற்றும் குடியிருப்பு திட்டங்களுக்கு நிலத்திற்கான தேவை அதிகரித்து வரும் சென்னைக்கு வடக்கே உள்ள திருவள்ளூரில் நில ஒப்பந்தம் தொடர்பாக ஆம்ஸ்ட்ராங்குடன் அஸ்வத்தாமனுக்கு மோதல் இருந்ததாகக் கூறப்படுகிறது. பேச்சுவார்த்தையின் போது ஆம்ஸ்ட்ராங் அஸ்வதாமனை தனது கைத்துப்பாக்கியால் மிரட்டியதாகவும், ஒப்பந்தத்தில் இருந்து விலகும்படி கட்டாயப்படுத்தியதாகவும் அதிகாரிகள் தெரிவித்தனர். பின்னர், நாகேந்திரன் பரோலில் வெளிவந்தபோது, அவர் மத்தியஸ்தம் செய்ய முயன்றார். “அவர் தனது மகன் நில வியாபாரத்தில் சுமூகமாக இருக்க வேண்டும் என்று விரும்பியதால், பிரச்சினையைத் தீர்க்க ஆம்ஸ்ட்ராங்கை தொலைபேசியில் அழைத்தார். ஆனால் ஆம்ஸ்ட்ராங் நாகேந்திரனை அவமதித்ததாகக் கூறப்படுகிறது” என்று ஒரு அதிகாரி கூறினார்.
இந்த வழக்கில், திருவேங்கடம் (33), ஆம்ஸ்ட்ராங் மீது மிகக் கடுமையான காயங்களை ஏற்படுத்தியதாகக் குற்றம் சாட்டப்பட்டார். ஆம்ஸ்ட்ராங் கொலை நடந்த ஒரு வாரத்திற்குப் பிறகு, திருவேங்கடம் போலீஸ் காவலில் இருந்தபோது அதிகாரிகள் மீது துப்பாக்கிச் சூடு நடத்த முயன்றபோது அவர் காவல்துறையினரால் சுட்டுக் கொல்லப்பட்டார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/M8Jo8Huf5MQRwAWcH5st.jpg)