பெங்களூரு - சென்னை விரைவுச்சாலை பணிகள் தாமதம்: மின்கம்பிகளை இடம் மாற்றுவதில் சிக்கல்

தமிழகத்தில் பெங்களூரு - சென்னை விரைவுச்சாலையின் 106 கிலோமீட்டர் பகுதி கட்டுமானப் பணிகள், உயர் மின்னழுத்த மின்கம்பிகளை இடம் மாற்றுவதில் ஏற்பட்ட தாமதம் காரணமாக, மேலும் காலதாமதமாகும் என என எதிர்பார்க்கப்படுகிறது.

பெங்களூரு - சென்னை விரைவுச்சாலையின் 106 கிலோமீட்டர் பகுதி கட்டுமானப் பணிகள் திட்டம் கடந்த ஆண்டு நிறைவடைய வேண்டிய நிலையில், இப்போது ஜூன் 2025-ஐ நோக்கி நகர்ந்து வருகிறது.

அதிகாரிகள் கூறுகையில், இந்தத் தாமதம் முக்கியமாக அரக்கோணம் மற்றும் காஞ்சிபுரம் இடையேயான 25.5 கி.மீ. பகுதியில் தான் ஏற்பட்டுள்ளது. இங்கு, டான்ஜெட்கோவால் நிர்வகிக்கப்படும் 400 கே.வி. உயர் மின்னழுத்த மின்கோபுரங்கள், திட்டமிடப்பட்ட பாதையின் 4.5 கி.மீ. தூரத்திற்கு தடையாக உள்ளன. இந்த 102 கோபுரங்களை இடம் மாற்ற, புதிய நிலப்பகுதிகளைப் பெறுதல், முழு வழித்தடத்தையும் மாற்றி அமைத்தல் மற்றும் பல தொழில்நுட்ப சவால்களை எதிர்கொள்ள வேண்டியுள்ளது.

இதுவரை சுமார் 80 கோபுரங்கள் இடம் மாற்றப்பட்டுள்ளன. மீதமுள்ள 22 கோபுரங்களை இடம் மாற்றுவதில் நில உரிமையாளர்களிடமிருந்து எழுந்த சட்டப் பிரச்னைகள் காரணமாக தாமதம் ஏற்பட்டுள்ளது.

திட்டத்தின் விவரங்கள்:

262 கிலோமீட்டர் நீளம் கொண்ட இந்த நான்கு வழிச் சாலை, கர்நாடகாவில் உள்ள ஹோஸ்கோட்டை-யை தமிழ்நாட்டில் உள்ள ஸ்ரீபெரும்புதூர் உடன் இணைக்கும். இந்த விரைவுச்சாலையின் வேக வரம்பு மணிக்கு 120 கி.மீ. என நிர்ணயிக்கப்பட்டுள்ளது. மேலும், 17,000 கோடி ரூபாய் மதிப்புள்ள இந்தத் திட்டம், பெங்களூரு மற்றும் சென்னை இடையேயான பயண நேரத்தை 7 மணிநேரத்திலிருந்து 3 மணிநேரமாகக் குறைக்கும் என எதிர்பார்க்கப்படுகிறது. இது மட்டுமின்றி, இந்த விரைவுச்சாலை, நெரிசல் மிகுந்த சென்னை - பெங்களூரு புறவழிச்சாலையிலிருந்து 20-25% வாகனப் போக்குவரத்தை திசை திருப்பிவிடும் என்றும் எதிர்பார்க்கப்படுகிறது.

தற்போதைய நிலை:

கர்நாடகாவில் உள்ள 71 கி.மீ. பகுதி கடந்த டிசம்பர் 2024-ல் நிறைவு செய்யப்பட்டு, போக்குவரத்துக்காக திறக்கப்பட்டது. தமிழ்நாட்டில், மொத்தமுள்ள 106 கி.மீ. தூரத்தில் 80 கி.மீ. பணிகள் நிறைவடைந்துள்ளன. ஆந்திரப் பிரதேசத்தின் 85 கி.மீ. பகுதி மலைப்பாங்கான பகுதி என்பதால், அங்கு பணிகள் மெதுவாக நடைபெற்று வருகின்றன. இதுவரை 68 கி.மீ. பணிகள் நிறைவடைந்துள்ளன.

குடிபலா முதல் அரக்கோணம் வரையிலான பகுதி 95% நிறைவடைந்துள்ளது. அரக்கோணம் முதல் காஞ்சிபுரம் வரையிலான பகுதி 50% நிறைவடைந்துள்ளது. காஞ்சிபுரம் முதல் ஸ்ரீபெரும்புதூர் வரையிலான இறுதிப் பகுதி 70% நிறைவடைந்துள்ளது.