உதயநிதி துணை முதல்வர் ஆவதில் தவறில்லை: பாஜக துணைத் தலைவா் கே.பி.ராமலிங்கம் பேட்டி

உதயநிதி துணை முதல்வராக ஆவதில் தவறில்லை என பாஜக மாநில துணைத் தலைவா் கே.பி.ராமலிங்கம் கூறியுள்ளார்.

திருச்சியில் பல்வேறு நிகழ்ச்சியில் பங்கேற்க வந்த பாஜக மாநில துணைத் தலைவா் கே.பி.ராமலிங்கம், பாஜக அலுவலகத்தில் செய்தியாளர்களை சந்தித்தார். அப்போது அவர் தெரிவித்ததாவது;

மக்கள் விரோதச் செயல்களை செய்துவரும் திமுக அரசு, அதிலிருந்து மக்களை திசைதிருப்பவே மத்திய பட்ஜெட்டில் தமிழகம் புறக்கணிக்கப்படுவதாக பொய் கூறி போராட்டம் நடத்துகிறது. இது புதிய வரிகளால் தமிழக மக்கள் பாதிக்கப்படுவதை மறைக்க நடத்தும் நாடகம்.

திமுக கூறுவது உண்மையாக இருந்தால், மத்திய அரசு எந்தெந்தத் துறைகளுக்கு நிதியைக் குறைத்துள்ளது எனப் பட்டியலிட்டு மக்களிடம் கூறலாமே. மத்திய அரசின் வலிமையை குறைத்துக் காட்டுவது தேச விரோதம்தான்.

ஆந்திரத்துக்கு ரூ.15 ஆயிரம் கோடி சிறப்பு நிதி வழங்கியுள்ளதாக திமுக கூறுகிறது. ஆனால் அந்த நிதி, திமுக அங்கம் வகித்த காங்கிரஸ் ஆட்சியில் ஒப்புக்கொண்ட நிதிதான். அதுவும் தலைநகரங்களை மாற்றியதற்காக வழங்கிய நிதி. இதேபோல, தமிழகத்திலும் 3 தலைநகரங்கள் அமைக்கப்பட்டால், மத்திய அரசு பாஜக அரசு நிதி வழங்கும்.

உதயநிதி துணை முதல்வராக ஆவதில் தவறில்லை. தமிழக மக்கள் அதையும் பார்க்கட்டும். திமுக அமைச்சா்கள் மீதான வழக்கு விசாரணையில் மத்திய பாஜக அரசின் தலையீடு இல்லை.

தமிழகத்திலிருந்து திமுகவை அகற்றுவதே பாஜகவின் லட்சியம். அதை நோக்கிப் பயணிப்போம் என்றார்.

இந்த செய்தியாளர் சந்திப்பில் மாவட்டச் செயலா் ராஜசேகரன் உள்ளிட்ட பாஜக பிரமுகர்கள் உடனிருந்தனா்.

செய்தி: க.சண்முகவடிவேல்