தி.மலை: அரசுப் பேருந்து- கார் நேருக்கு நேர் மோதி விபத்து: அசாம் மாநிலத் தொழிலாளர்கள் உள்பட 7 பேர் பலி

திருவண்ணாமலை மாவட்டம் செங்கம் பக்கிரிபாளையம் புறவழிச்சாலையில் அந்தனூர் பகுதியில் அரசுபேருந்தும் டாடா சுமோ காரும் நேருக்கு நேர் மோதி விபத்துக்குள்ளானதில் காரில் பயணம் செய்த 7 பேர் சம்பவ இடத்தில் உயிரிழந்தனர்.

திருவண்ணாமலை வழியாக கிருஷ்ணகிரிக்கு நேற்று இரவு (அக்.23) காரில் 11 பேர் பயணம் செய்தனர். மறுபுறம் பெங்களூரில் இருந்து பயணிகளை ஏற்றிக்கொண்டு அரசு பேருந்து திண்டிவனம்-கிருஷ்ணகிரி தேசிய  நெடுஞ்சாலையில் வந்து கொண்டிருந்தது. செங்கம் புறவழிச்சாலை அந்தனூர் பகுதியில் பேருந்து வந்து கொண்டிருந்த போது அதிவேகமாக வந்த கார் பேருந்து மீது நேருக்கு நேர் மோதி விபத்துக்குள்ளானது. 

இந்த விபத்தில் காரில் பயணித்த 11 நபர்களில் 7 பேர் சம்பவ இடத்திலேயே உயிரிழந்தனர். மேலும் படுகாயமடைந்த 4 பேர் செங்கம் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர். விபத்தில் உயிரிழந்தவர்களின் உடலை மீட்டு காவல்துறையினர் உடற்கூராய்வுக்காக அரசு மருத்துவமனைக்கு அனுப்பி வைத்துள்ளனர். விபத்து குறித்து காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர். 

விசாரணையில், உயிரிழந்த 7 பேரில் அசாம் மாநிலத்தைச் சேர்ந்த தொழிலாளர்கள் உள்ளனர். உயிரிழந்தவர்களில் பின்மல் தீர்த், குஞ்சா ராய், டல்லு, நிக்கோலஸ் மற்றும் நாராயண் சேத்தி ஆகியோர் அசாமைச் சேர்ந்தவர்கள். மற்ற 2 பேர் கிருஷ்ணகிரி மாவட்டத்தைச் சேர்ந்த டிரைவர் புனித்குமார் மற்றும் காமராஜ் என அடையாளம் காணப்பட்டுள்ளது.

இவர்கள் அனைவரும் ஓசூர் அருகே உள்ள ஒரு தொழிற்சாலையில் வேலை செய்து வந்துள்ளனர். ஆயுதபூஜை தினத்தன்று புதுச்சேரிக்கு சென்றுவிட்டு திரும்பிக் கொண்டிருந்த போது விபத்து ஏற்பட்டுள்ளது.