பல திட்டங்களுக்கு நிதியுதவி உயர்த்தப்பட்டுள்ளது: ஸ்டாலின் குற்றச்சாட்டை நிராகரித்த மத்திய அரசு

தென் மாநில வளர்ச்சித் திட்டங்களுக்கு நிதி வழங்காமல் இருப்பதாக தமிழக முதல்வர் மு.க.ஸ்டாலின் கூறிய குற்றச்சாட்டை மத்திய அரசு நிராகரித்துள்ளது.

கடந்த 10 ஆண்டுகளில் தமிழகத்தில் ரயில்வே, நெடுஞ்சாலைகள், விமான நிலையங்கள் மற்றும் சமூக மற்றும் கிராமப்புறத் துறைகளுக்கான திட்டங்களுக்கான நிதியை மத்திய அரசு கணிசமாக உயர்த்தியுள்ளதாக மத்திய அரசு வட்டாரங்கள் தெரிவிக்கின்றன.

2009 மற்றும் 2014 க்கு இடையில் ரயில்வே மேம்பாட்டிற்காக தமிழகத்திற்கு ஒதுக்கப்பட்ட பட்ஜெட் சராசரியாக ஆண்டுக்கு 879 கோடி ரூபாயாக இருந்தது, அதே நேரத்தில் 2024-25 பட்ஜெட்டில் மத்திய அரசு மாநிலத்திற்கு 6,331 கோடி ரூபாய் ஒதுக்கியுள்ளது என்று அந்த வட்டாரங்கள் தெரிவித்தன.

இந்த சாதனை பட்ஜெட்டின் பலனாக தமிழகத்தில் புதிய ரயில் பாதைகள் அமைத்தல், மின்மயமாக்கல், புதிய ரயில்கள் இயக்கம், ரயில் நிலையங்கள் மேம்பாடு, பயணிகள் வசதி அதிகரிப்பு ஆகிய பணிகள் அதிவேகத்தில் நடைபெற்று வருகின்றன.

2014ல் 4,985 கி.மீட்டராக இருந்த தமிழக நெடுஞ்சாலைகளின் மொத்த நீளம் 6,806 கி.மீ ஆக அதிகரித்துள்ளது. 2014 முதல் ரூ.64,704 கோடி செலவில் 2,094 கி.மீ நீளம் கொண்ட திட்டங்கள் தமிழகத்தில் வழங்கப்பட்டுள்ளன. மேலும் 48,425 கோடி ரூபாய் செலவில் 1,329 கிமீ நீளம் கொண்ட திட்டங்கள் செயல்படுத்தப்பட்டு வருகின்றன.

தமிழகத்தில் தேசிய நெடுஞ்சாலை மேம்பாட்டுக்காக மத்திய அரசு மொத்தம் ரூ.2 லட்சம் கோடி முதலீடு செய்துள்ளது.

தமிழகத்தில் ரூ.4,000 கோடி மதிப்பிலான 5 திட்டங்களுக்கு மத்திய அரசு ஒப்புதல் அளித்துள்ளதாகவும், அதில் 2 பணிகள் முடிவடைந்துள்ளது. தமிழகத்தில் உள்ள முக்கிய துறைமுகங்களில் மொத்த முதலீடு ரூ.10,168 கோடி என்று அந்த வட்டாரங்கள் தெரிவித்தன.

மீன்வளம் மற்றும் மீன்வளர்ப்பு உள்கட்டமைப்பு மேம்பாட்டு நிதியின் (FIDF) கீழ், 1,574 கோடி ரூபாய் மதிப்பிலான 64 திட்டங்களுக்கு மத்திய அரசு ஒப்புதல் அளித்துள்ளது, அவற்றில் 34 திட்டங்கள் முடிக்கப்பட்டுள்ளன.

பிரதம மந்திரி ஆவாஸ் யோஜனா திட்டத்தின் கீழ், கடந்த 10 ஆண்டுகளில் தமிழகத்தில் 15 லட்சத்துக்கும் அதிகமான வீடுகள் கட்டுவதற்காக ரூ.20,000 கோடியை மத்திய அரசு வழங்கியுள்ளது.

பிரதம மந்திரி ஸ்வாநிதி திட்டத்தின் கீழ் தமிழகத்தில் தெருவோர வியாபாரிகளுக்கு ரூ.670 கோடி மதிப்பிலான ஐந்து லட்சத்துக்கும் அதிகமான கடன்கள் வழங்கப்பட்டுள்ளன. தமிழகத்தைச் சேர்ந்த 46 லட்சத்துக்கும் அதிகமான விவசாயிகள் பிரதமர் கிசான் சம்மன் நிதியின் கீழ் ரூ.11,000 கோடியைப் பெற்றுள்ளதாகவும், ஜல் ஜீவன் திட்டத்தின் கீழ் ஒரு கோடிக்கும் அதிகமான குடும்பங்களுக்கு குழாய் நீர் இணைப்புகள் வழங்கப்பட்டுள்ளதாகவும் அந்த வட்டாரங்கள் தெரிவித்துள்ளன.

மத்திய அரசின் பிரதம மந்திரி உஜ்வாலா மற்றும் பிரதம மந்திரி மாத்ரு வந்தனா யோஜனா திட்டங்களின் கீழ் தென் மாநிலம் தலா ரூ.700 கோடி பெற்றுள்ளது.

2023-24 ஆம் ஆண்டில் நாடு முழுவதும் உள்ள மொத்த செலவீனத்தில் 12.71 சதவீதமாக இருக்கும் மகாத்மா காந்தி தேசிய ஊரக வேலைவாய்ப்பு திட்டத்தின் கீழ் மத்திய அரசு ரூ.13,392.89 கோடியை தமிழ்நாட்டில் செலவிட்டுள்ளது.

தமிழகத்தில் 11 மருத்துவக் கல்லூரிகளுக்கு மத்திய அரசு அனுமதி அளித்து ரூ.2,145 கோடி நிதியை விடுவித்துள்ளதாகவும், தற்போது 11 மருத்துவக் கல்லூரிகளும் முழுமையாக செயல்பட்டு வருவதாகவும் அவர்கள் தெரிவித்தனர்.

Read in English: Centre dismisses Stalin’s charges of neglecting Tamil Nadu, says hiked funding in many schemes

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“