சொத்து குவிப்பு வழக்கில் கே.கே.எஸ்.எஸ்.ஆர் விடுவிக்கப்பட்டது எப்படி? நீதிபதி ஆனந்த் வெங்கடேஷிடம் அமைச்சர் தரப்பு விளக்கம்

2011-ம் ஆண்டு வருமானத்துக்கு அதிகமாக சொத்து குவித்த வழக்கில் இருந்து அக்டோபர் 2022 இல் விசாரணை நீதிமன்றத்தால் வருவாய்த்துறை அமைச்சர் கே.கே.எஸ்.எஸ்ஆர் ராமச்சந்திரன் விடுவிக்கப்பட்டதற்கு எதிராக ஆகஸ்ட் 2023 இல் தானாக முன்வந்து எடுத்துக் கொள்ளப்பட்ட சீராய்வு மனு மீதான விசாரணையை சென்னை உயர்நீதிமன்றம் புதன்கிழமை முடித்து வைத்தது. 

தமிழக அரசில் வருவாய் மற்றும் பேரிடர் மேலாண்மைத் துறை அமைச்சராக இருப்பவர் கே.கே.எஸ்.எஸ்.ஆர்.ராமச்சந்திரன். இவர் 2006 - 2011 தி.மு.க ஆட்சியில் பிற்படுத்தப்பட்டோர் நலத் துறை அமைச்சராக இருந்தப்போது வருமானத்திற்கு அதிகமாக ரூ.44.59 லட்சம் சொத்து சேர்த்ததாக அவர் மீதும், அவரது மனைவி ஆதிலெட்சுமி மீதும் அ.தி.மு.க ஆட்சி நடந்த 2011 ஆம் ஆண்டு லஞ்ச ஒழிப்புத் துறை வழக்குப் பதிவு செய்தது.

இந்த வழக்கில் இருந்து தன்னை விடுவிக்கக் கோரி சாத்தூர் ராமச்சந்திரன் ஸ்ரீவில்லிப்புத்தூர் நீதிமன்றத்தில் மனு தாக்கல் செய்தார். இந்த வழக்கை விசாரித்த கீழமை நீதிமன்ற நீதிபதி, போதிய ஆதாரங்கள் இல்லாததால், ராமச்சந்திரனை வழக்கில் இருந்து விடுவித்து உத்தரவு பிறப்பித்தார்.

இதனிடையே அமைச்சர் சாத்தூர் ராமச்சந்திரனை விடுவித்த உத்தரவை சென்னை உயர் நீதிமன்ற நீதிபதி ஆனந்த் வெங்கடேஷ் தாமாக முன்வந்து மறுஆய்வுக்கு எடுத்தார். இவ்வழக்கில் இறுதி விசாரணை சென்னை உயர் நீதிமன்றத்தில் நடந்து வருகிறது.

இந்த வழக்கு நீதிபதி ஆனந்த் வெங்கடேஷ் முன்பு நேற்று மீண்டும் விசாரணைக்கு வந்தது. அப்போது நீதிபதி, “எந்த காரணங்களின் அடிப்படையில் அமைச்சர் வழக்கில் இருந்து விடுவிக்கப்பட்டார் என அறிய விரும்புகிறோம். விடுவித்த காரணம் சரியாக இருந்தால் விடுவிப்பு செய்வதை ஏற்றுக்கொள்ள தயாராக இருக்கிறோம்” என்றும் தெரிவித்தார்.

அமைச்சர் தரப்பில், “புதிய விசாரணை அதிகாரியிடம் வழங்கிய ஆவணங்கள் சரியாக இருந்த காரணத்தால் மேற்கொண்டு எதிர்ப்பு எதுவும் தெரிவிக்கவில்லை. முதலில் விசாரித்த அதிகாரி அதனை கவனிக்கத் தவறிவிட்டார். விசாரணை அதிகாரியின் முடிவை நீதிமன்றம் ஏற்பதற்கு எந்த தடையும் இல்லை. நீதிமன்றத்தில் என்ன ஆவணங்கள் தாக்கல் செய்யப்பட்டதோ அதன் அடிப்படையில் தீர்ப்பு வழங்கப்பட்டு உள்ளது. இறுதி அறிக்கையின் அடிப்படையில் தான் நீதிமன்றம் விடுதலை செய்தது” என்று தெரிவிக்கப்பட்டது.

அமைச்சர் ராமச்சந்திரனுக்கு எதிரான மறுசீராய்வு மனு மீதான விசாரணையில் மூத்த வழக்கறிஞர் எஸ்.முரளிதர் மற்றும் என்.ஆர். இளங்கோ தங்கள் வாதங்களை முடித்தனர். 

அப்போது நடுநிலையான நீதிபதியின் முன் அவர்கள் வாதிடுகிறார்கள் என்று உறுதியளித்த நீதிபதி, விடுவிக்கப்பட்ட நடைமுறைகள் துல்லியமாக பின்பற்றப்பட்டதாகக் கண்டறியப்பட்டால், தானாக முன்வந்து எடுத்துக் கொள்ளப்பட்ட மறு சீராய்வு மனுக்களை முடிக்கவும் தயங்க மாட்டோம் என்று நீதிபதி கூறினார். 

மூன்று முறைகேடான சொத்து குவிப்பு வழக்குகளிலும், குற்றம் சாட்டப்பட்டவர்கள் அமைச்சர் பதவியில் இருந்து விலகியபோது அவர்களுக்கு எதிராக லஞ்ச ஒழிப்புத்துறை குற்றப்பத்திரிகை தாக்கல் செய்ததையும், அவர்கள் மீண்டும் அமைச்சர்கள் ஆனவுடன் வழக்கில் இருந்து விடுக்கப்பட்டதையும் கண்டறிந்ததாக நீதிபதி சுட்டிக்காட்டினார். 

வேறு எந்த ஊழல் வழக்குகளிலும் இதுபோன்ற மேலதிக விசாரணைகள் அரிதாகவே மேற்கொள்ளப்படும் என்றும், அரசியல்வாதிகள் சம்பந்தப்பட்டவர்களிடம் விசாரணை நடத்துவது அரிது என்றும் கூறிய நீதிபதி, குற்றம் சாட்டப்பட்டவர்கள் அதிகாரத்தில் இருக்கிறார்கள் என்ற ஒரே காரணத்திற்காக இந்த வழக்குகளில் விசாரணைக்கு உத்தரவிட முடியாது என்று நீதிபதி கூறினார்.

லஞ்ச ஒழிப்புத்துறை மேற்கொண்டு விசாரணை நடத்தி அமைச்சர்களுக்கு க்ளீன் சிட் வழங்கியதற்கு நம்பத்தகுந்த காரணங்கள் இருந்தால், அவர்களை தொந்தரவு செய்யக்கூடாது என்று நீதிபதி கூறினார். அதேநேரம் லஞ்ச ஒழிப்புத்துறை சேகரித்த பொருட்கள் மற்றும் விசாரணை நீதிமன்ற தீர்ப்புகளை ஆராய நீதிபதி முடிவு செய்தார். 

தானாக முன்வந்து எடுத்துக் கொள்ளப்பட்ட மறுசீராய்வு மனுக்களின் முடிவு எதுவாக இருந்தாலும், குற்றவியல் நீதித்துறையை சீர்குலைக்க முடியாது என்ற வலுவான செய்தி நிச்சயமாக வெளிவரும் என்றும், குறிப்பாக அதிகாரத்தில் இருப்பவர்களால் எந்த முறைகேடு நடந்தாலும், யாரேனும் ஒருவரால் நிச்சயம் விசாரிக்கப்படுவார் என்றும் நீதிபதி கூறினார். 

இருப்பினும், நிதியமைச்சர் தங்கம் தென்னரசு மற்றும் முன்னாள் முதல்வர் ஓ.பன்னீர்செல்வம் ஆகியோரின் விடுதலையை எதிர்த்து தொடரப்பட்ட இதேபோன்ற சீராய்வு மனுக்களில் தானாக முன்வந்து விசாரணையை முடித்த நீதிபதி என்.ஆனந்த் வெங்கடேஷ், தீர்ப்பை ஒத்திவைக்க முடிவு செய்தார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“