நயன்தாரா ஆவணப்படத்தில் 'சந்திரமுகி' காட்சிகள்: நெட்ஃபிளிக்ஸ், டார்க் ஸ்டூடியோ பதில் அளிக்க ஐகோர்ட் உத்தரவு

நடிகை நயன்தாராவின் வாழ்க்கை வரலாற்று ஆவணப்படத்தில், சூப்பர் ஸ்டார் ரஜினிகாந்த் நடித்த 'சந்திரமுகி' திரைப்படக் காட்சிகள் அனுமதியின்றி பயன்படுத்தப்பட்டதாகக் கூறப்படும் விவகாரம் தொடர்பாக, ஆவணப்படத்தை தயாரித்த டார்க் ஸ்டூடியோ நிறுவனமும், அதனை வெளியிட்ட நெட்ஃபிளிக்ஸ் நிறுவனமும் 2 வாரங்களுக்குள் பதிலளிக்க சென்னை உயர் நீதிமன்றம் உத்தரவிட்டுள்ளது.

'சந்திரமுகி' படத்தின் பதிப்புரிமை பெற்றுள்ள ஏபி இண்டர்நேஷனல் நிறுவனம் தாக்கல் செய்த மனுவில், தங்களது அனுமதி பெறாமல் ஆவணப்படத்தில் 'சந்திரமுகி' காட்சிகளைப் பயன்படுத்தியதால், அவற்றை நீக்கக் கோரியும், 5 கோடி ரூபாய் இழப்பீடு கோரியும் நோட்டீஸ் அனுப்பியும் எந்த நடவடிக்கையும் எடுக்கப்படவில்லை எனக் குற்றம் சாட்டியுள்ளது. மேலும், ஆவணப்படத்தில் உள்ள 'சந்திரமுகி' காட்சிகளுக்குத் தடை விதிக்க வேண்டும், அந்தக் காட்சிகளை நீக்க உத்தரவிட வேண்டும், அத்துடன் ஆவணப்படம் மூலம் ஈட்டிய லாபக் கணக்கைச் சமர்ப்பிக்க உத்தரவிட வேண்டும் என்றும் மனுவில் கோரப்பட்டுள்ளது.

ஏற்கெனவே, நடிகர் தனுஷின் வொண்டர்பார் தயாரிப்பு நிறுவனம், இதே ஆவணப்படத்தில் 'நானும் ரவுடிதான்' படக் காட்சிகள் அனுமதியின்றி பயன்படுத்தப்பட்டதாகக் கூறி, ஒரு கோடி ரூபாய் இழப்பீடு கேட்டு வழக்குத் தொடுத்துள்ளது குறிப்பிடத்தக்கது. இந்த இரு வழக்குகளையும் விசாரித்த நீதிபதி செந்தில்குமார் ராமமூர்த்தி, 'சந்திரமுகி' படக் காட்சிகள் தொடர்பான மனுவுக்கு டார்க் ஸ்டூடியோ மற்றும் நெட்ஃபிளிக்ஸ் நிறுவனங்கள் இரண்டு வாரங்களுக்குள் பதிலளிக்க வேண்டும் என உத்தரவிட்டுள்ளார். இந்த உத்தரவு, நயன்தாராவின் ஆவணப்படம் தொடர்பான சட்டச் சிக்கல்களை மேலும் தீவிரப்படுத்தியுள்ளது.