நாதள்ளா நகை கடை உரிமையாளர் மீது வழக்குப் பதிவு செய்ய ஐகோர்ட் உத்தரவு

நகைச் சீட்டு நடத்தி கோடிகணக்கில் மோசடி செய்த நாதெள்ளா ஜுவல்லரி மீது மோசடி வழக்கு பதிவு செய்ய சென்னை போலீசாருக்கு சென்னை உயர் நீதிமன்றம் உத்தரவிட்டுள்ளது.

சென்னை திருவொற்றியூரைச் சேர்ந்த நீலாம்பாள் உள்பட 17 பேர் தாக்கல் சென்னை ஐகோர்ட்டில் தாக்கல் செய்த மனுவில், சென்னை புரசைவாக்கத்தில் உள்ள நாதெள்ளா ஜுவல்லரி நகைக் கடையில், ஜீரோ சதவீத நகை வாங்கும் திட்டத்தின் கீழ் மாதம் ரூபாய் 5 ஆயிரத்துக்கான நகை சீட்டில் சேர்ந்து பணம் கட்டி வந்தேன். இந்த திட்டமானது, கடந்த ஆண்டுடன் முடிந்து விட்டது.

இத்திட்டத்தின் படி, ஒவ்வொருவருக்கும், குறைந்த பட்சம் ஒரு லட்சம் முதல் 2.5 லட்சங்கள் ரூபாய் வரை முதிர்ச்சி பணம் கிடைக்கும். இந்த பணத்துக்கு, செய்கூலி, சேதாரம் இல்லாமல், நகை தருவதாக அந்த நிறுவனம் கூறியிருந்தது. ஆனால், சொன்னபடி நாதெள்ளா நிர்வாகம், நகையும் தரவில்லை. கட்டிய பணத்தையும் திருப்பி கொடுக்கவில்லை. இதுகுறித்து கடைக்கு சென்று அங்கிருந்த மேலாளரிடம் கேட்டபோது, கட்டிய பணத்துக்கு 5 சதவீத வட்டியுடன் திருப்பி தருவதாக கூறினார். ஆனால், பணத்தை திருப்பி கொடுக்கவில்லை.

கடந்த மாதம் 17 ஆம் தேதி, இக்கடையில் பணம் கட்டிய சுமார் நூற்றுக்கும் மேற்பட்டோர், அங்கு சென்றபோது, தீபாவளி கழித்து 19 ஆம் தேதி வரும்படி கூறினர். அதை நம்பி மீண்டும் நாங்கள் சென்ற மாதம் 19 ஆம் தேதி புரசைவாக்கம் கடைக்கு சென்றோம். கடை முன்பு கூட்டம் கூடியதை கண்டதும், கடை நிர்வாகிகள் போலீசாருக்கு தகவல் கொடுத்தனர். அங்கு வந்த வேப்பேரி போலீஸ் இன்ஸ்பெக்டர், கடை முதலாளியிடம் தொடர்பு கொண்டு பேசி, அக்டோபர் 23 ஆம் தேதி, பணம் கட்டியவர்களுக்கு செட்டில்மெண்ட் செய்வதாகவும், அன்று முதலாளியே நேரில் வர இருப்பதாக உறுதி கொடுத்திருப்பதாகவும், போலீஸ் இன்ஸ்பெக்டர் எங்களிடம் உத்திரவாதம் கொடுத்தார்.

இதை நம்பி, அங்கிருந்து நாங்கள் கலைந்து சென்றோம். ஆனால், சொன்னபடி, சென்ற மாதம் 23 ஆம் தேதி கடைக்கு சென்று பார்த்தபோது, கடை மூடப்பட்டிருந்தது. நாதெள்ளா கடையின் மற்ற கிளைகளும் மூடப்பட்டுவிட்டதாக, அப்போதுதான் எங்களுக்கு தெரியவந்தது. இதுதொடர்பாக, அன்றைய தினமே, நான் உள்பட 94 பேர், சென்னை போலீஸ் கமிசனர் அலுவலகத்தில் புகார் செய்தோம். இதுநாள் வரை, அந்த புகார் மீது எந்த நடவடிக்கையும் எடுக்கவில்லை. எனவே, நாங்கள் கொடுத்த மோசடி புகாரின் பேரில், நாதெள்ளா ஜுவல்லரி கடை அதிபர், நிர்வாகத்தின் மீது மோசடி வழக்கு பதிவு செய்து நடவடிக்கை எடுக்க சென்னை போலீஸ் கமிஷனருக்கு உத்தரவிட வேண்டும்.

இவ்வாறு மனுவில் கூறியிருந்தனர்.

இந்த வழக்கு நீதிபதி எம். எஸ். ரமேஷ் முன்பு இன்று விசாரணைக்கு வந்தது. மனுதாரர்கள் சார்பில் வழக்கறிஞர் ஜெகசுந்தரி பாலமுருகன் ஆஜராகி வாதிட்டார். இவரது வாதத்தை தொடர்ந்து, மனுதாரர்கள் கொடுத்த புகார் மீது, வழக்கு பதிவு செய்து விசாரிக்கும்படி, சென்னை போலீஸ் கமிஷனருக்கு நீதிபதி எம்.எஸ். ரமேஷ் உத்தரவிட்டு விசாரணை தள்ளிவைத்தார்.