சென்னையில் ஜூனில் மழை இல்லை; 40°C மேல் வெப்பமும் இருக்காது: வானிலை ஆய்வு மையம்

சென்னையை பொறுத்தவரை வானிலை மாற்றத்தில் நல்ல மற்றும் கெட்ட செய்திகள் உள்ளன. முதலில் கெட்ட செய்தி என்னவென்றால், ஜூன் மாதத்தில் எஞ்சிய நாட்களில் மழைக்கு வாய்ப்பு குறைவு. நல்ல செய்தி என்னவென்றால், கோடை காலம் முடிவடையும் நிலையில் இருப்பதால், பகல்நேர வெப்பநிலை 40°C ஐத் தாண்ட வாய்ப்பில்லை.

இன்று முதல் கோவை மற்றும் நீலகிரி போன்ற மாவட்டங்களில் தென்மேற்கு பருவமழை தீவிரம் குறையும் என்று எதிர்பார்க்கப்படும் நிலையில், வானிலை ஆய்வு மாதிரிகள் சென்னை அதன் சுற்றுப்புறங்களில் லேசான மழைக்கான சாத்தியக்கூறுகளை காட்டுகின்றன. இருப்பினும், இந்திய வானிலை ஆய்வுத் துறை (IMD) அதிகாரிகள், சென்னை மற்றும் தமிழ்நாட்டின் பெரும்பாலான பகுதிகளில் மாதம் இறுதி வரை வறண்ட வானிலை நிலவும் என்று தெரிவித்துள்ளனர்.

"தற்போதைய நிலவரப்படி, அடுத்த 5 நாட்களுக்கு நகரில் மழை பெய்ய வாய்ப்பில்லை. நல்ல காற்றோட்டத்துடன் வெப்பநிலை 1 அல்லது 2 டிகிரி மாறலாம். கோடைக்காலம் கிட்டத்தட்ட முடிந்துவிட்டதால், வெப்பநிலை மீண்டும் 40°C ஐத் தொடும் என்று நாங்கள் எதிர்பார்க்கவில்லை," என்று மண்டல வானிலை ஆய்வு மைய இயக்குநர் செந்தாமரை கண்ணன் தெரிவித்தார். இன்று, நகரின் சில பகுதிகளிலும், புறநகர்ப் பகுதிகளிலும் லேசானது முதல் மிதமான மழை பெய்யலாம். வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை சுமார் 36°C ஆகவும், குறைந்தபட்ச வெப்பநிலை 26°C முதல் 27°C வரையிலும் இருக்கும் என்றார்.

இன்று நீலகிரி தவிர்த்து கனமழை பெய்ய வாய்ப்புள்ள மற்ற மாநிலப் பகுதிகளில் தனிமைப்படுத்தப்பட்ட இடங்களில் லேசானது முதல் மிதமான மழை பெய்யக்கூடும். நிபுணர்கள் கருத்துப்படி, தமிழகத்தில் பருவமழை குறையக்கூடும் என்றாலும், அடுத்த சில நாட்களுக்கு கேரளா மற்றும் கர்நாடகாவின் சில பகுதிகளில் மழை தொடர வாய்ப்புள்ளது. வடமேற்கு வங்காள விரிகுடா, குஜராத் மீது உருவாகியுள்ள 2 குறைந்த காற்றழுத்த அமைப்புகள், வட இந்தியாவில் பருவமழையைத் தீவிரமாக வைத்திருக்க உதவும். 'ஜூன் மாத இறுதியில் மழை பெய்ய வாய்ப்பு உள்ளது' என்று வலைப்பதிவர் பிரதீப் ஜான் தெரிவித்துள்ளார்.

செவ்வாயன்று, மீனம்பாக்கம் 38.4°C ஐப் பதிவுசெய்தது, இது மாநிலத்திலேயே அதிகபட்ச வெப்பநிலையாகும். நுங்கம்பாக்கம் 37.4°C ஐப் பதிவு செய்தது, இது இயல்பை விட 0.2°C அதிகமாகும்.

ஜூன் 1 முதல், சென்னையில் 54.2 மிமீ மழை பதிவாகியுள்ளது, இது இயல்பை விட சுமார் 59% அதிகமாகும். நுங்கம்பாக்கம் வானிலை ஆய்வு மையம் 74.5 மிமீ (இயல்பை விட 31.3 மிமீ அதிகம்) மழையைப் பதிவுசெய்தது. அதே நேரத்தில் மீனம்பாக்கம் வெறும் 3.4 மிமீ மழையைப் பதிவுசெய்தது, இது இயல்பை விட 42.5% குறைவாகும். தமிழ்நாடு முழுவதும் இதே காலகட்டத்தில் 37.6 மிமீ மழை பதிவாகியுள்ளது.