‘ரீல்ஸ், லைக்-ல கெத்து இல்ல... மார்க்ஸ், டிகிரி-லதான் கெத்து’ - மாணவர்களுக்கு ஸ்டாலின் அறிவுரை

சென்னயில் உள்ள குட் ஷெப்பர்ட் கான்வென்ட் பள்ளியின் நூற்றாண்டு நிறைவு விழா வெள்ளிக்கிழமை நடைபெற்றது. இந்த விழாவில் சிறப்பு விருந்தினராக கலந்துகொண்ட முதலமைச்சர் மு.க. ஸ்டாலின், சமூக ஊடகங்களில் வரும் 'லைக்ஸ்' மற்றும் 'ரீல்ஸ்' கெத்து இல்லை, மதிப்பெண்கள் எடுப்பது, பட்டம் பெருவதுதான் முக்கியம் என்று முதலமைச்சர் மு.க. ஸ்டாலின் மாணவர்களுக்கு அறிவுரை கூறினார்.

விழாவில் முதலமைச்சர் மு.க.ஸ்டாலின் பேசியதாவது: “கல்வி, நண்பர்கள், சூழல்தான் குழந்தைகளின் எதிர்காலத்தை தீர்மானிக்கும் என்பதால், பெற்றோர்கள் தங்கள் பிள்ளைகள் சொல்வதைக் காதுக்கொடுத்து கேட்க வேண்டும். மனசுவிட்டு பேச வேண்டும். ஒரு பிரச்னையென்றால் குழந்தைகள் பயமின்றி, பெற்றோரிடம் பகிரும் அளவுக்கான நம்பிக்கையை அவர்களுக்கு பெற்றோர்கள்தான் கொடுக்க வேண்டும். தன் பெஸ்ட் ஃப்ரெண்ட் அம்மா, அப்பா என்று குழந்தைகள் சொல்ல வேண்டும். 

மாண்வர்கள் சாதி, மத பிரிவினை பார்க்காமல் அனைவரையும் சமமாக நடத்தும் பண்பை மாணவர்கள் பள்ளியில் வளர்த்துக்கொள்ள வேண்டும். தமிழ்நாடு எப்போதும் சமத்துவப்பூங்காவாக, சகோதரத்தோடு திகழ வேண்டும் என்றால் மாணவர்கள் இப்போதே இந்த எண்ணத்தோடு வளர வேண்டும். 

உங்கள் ரோல் மாடலை இன்ஸ்டாவில் தேடாதீர்கள். நீங்கள் ரீல்ஸ்-ல் பார்க்கிறதெல்லாம் ரியாலிட்டி என்று நம்பிவிடாதீர்கள். லைக்ஸ், ரீல்ஸ்-ல் கெத்து இல்லை. மார்க்ஸ், டிகிரி-ல் தான் கெத்து இருக்கிறது. படிப்பது போல, நன்கு விளையாடவும் வேண்டும். உடல்நலனும் முக்கியம்” என்று முதலமைச்சர் மு.க.ஸ்டாலின் மாணவர்களுக்கு அறிவுரை கூறினார்.