பொன்முடி வீட்டில் ரெய்டு; இ.டி எங்களுக்கு தேர்தல் பிரச்சாரம் செய்கிறது: ஸ்டாலின் பேட்டி

அமலாக்கத்துறை தொடர்ந்து ரெய்டு செய்வது மூலம் திமுகவுக்கு சார்பாக தேர்தல் பரப்புரை செய்து கொண்டிருக்கிறது  என்று முதல்வர் ஸ்டாலின் கூறினார்.

எதிர்கட்சி கூட்டத்தில் பங்கேற்பதற்கு பெங்களூரு புறப்பட்ட  தமிழ்நாடு முதல்வர் ஸ்டாலின் சென்னை விமானநிலையத்தில்  செய்தியாளர்களை சந்தித்தார்.

“ பாஜக ஆட்சியை வீழ்த்த வேண்டும் என்பதற்காக எதிர்கட்சிகள் ஒன்று சேர்ந்து ஏற்கனவே பாட்னாவில் கூட்டத்தை கூட்டி முடிவுகளை எடுத்தோம். தொடர்ந்து கர்நாடகாவில் இன்றும் நாளையும் எதிர்கட்சிகள் கூட்டம் நடைபெறுகிறது. இதில் 24 கட்சிகள் பங்கேற்கின்றன.

தொடர்ந்து கூட்டம் நடத்துவதால் பாஜக ஆட்சிக்கு எரிச்சல் ஏற்பட்டிருக்கிறது.  இதனால் அமலாக்கத்துறையை சோதனை செய்ய அனுப்புகின்றனர். ஏற்கனவே வட மாநிலங்களில் இந்த பணிகளை  செய்து கொண்டிருந்தனர்.  தற்போது தமிழ்நாட்டிலும் செய்து கொண்டிருகின்றனர் இதற்கு திமுக கவலைப்படவில்லை.

இன்று பொன்முடி இல்லத்தில் அமலாக்கத்துறை  சோதனை நடந்து வருகிறது. இந்த வழக்கை பொறுத்தவரை  ஜெயலலிதா முதலமைச்சராக இருந்தபோது பொய்யாக போடப்பட்ட வழக்கு.

கடந்த 10 ஆண்டு காலம் அதிமுகதான் ஆட்சியில் இருந்தது. அப்போது இதுபோன்ற நடவடிக்கை எடுக்கப்படவில்லை. சமீபத்தில் 2 வழக்குகளில்  இருந்து  பொன்முடி விடுதலை செய்யப்பட்டுள்ளார்.

சட்ட ரீதியாக அவர் இந்த வழக்கை சந்திப்பார். வரும் தேர்தலில் இதற்கெல்லாம் மக்கள் சரியான பதிலை வழங்குவர். ஏற்கனவே ஆளுநர் எங்களுக்காக தேர்தல் பிரச்சாரத்தை செய்துகொண்டிருக்கிறார். தற்போது அமலாக்கத்துறை அவருடன் சேர்ந்து கொண்டது. எனவே எங்களுக்கு தேர்தல் வேலை சுலபமாக இருக்கும்,

காவிரி பிரச்சனை மற்றும் மேகதாது பிரச்சனையில் கலைஞர் கருணாநிதியின் கொள்கை முடிவில் இருந்து நாங்கள் விலகே இல்லை. இந்த கூட்டம் மத்தியில் இருக்கும் பாஜக ஆட்சியை அகற்றுவதற்கான கூட்டம். தற்போது ஒட்டுமொத்த நாட்டையும் அச்சுறுத்தி வருகிறது பாஜகதான்” என்று அவர் கூறினார்.  

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“