நெல்லை, சேலம் பயணிகளுக்கு குட் நியூஸ்; எக்ஸ்பிரஸ் ரயில்களில் முன்பதிவில்லா பெட்டிகள் இணைப்பு

தெற்கு ரயில்வே, தனது சில முக்கிய எக்ஸ்பிரஸ் ரயில்களில் பெட்டிகளின் அமைப்பில் மாற்றம் செய்து, 2-ம் வகுப்பு பொதுப் பெட்டிகளின் எண்ணிக்கையை அதிகரிக்க முடிவு செய்துள்ளது. இந்த நடவடிக்கை, நீண்டகாலமாகப் பொதுப் பெட்டிப் பயணிகளின் தேவையை பூர்த்தி செய்யும் என்பதால், வரவேற்பைப் பெறும் என்று எதிர்பார்க்கப்படுகிறது.

ஏன் இந்த மாற்றம்?

பொதுப் பெட்டிகளில் நெரிசல் அதிகமாக இருப்பதும், குறைந்த கட்டணத்தில் பயணிக்கும் மக்களுக்குப் போதுமான வசதிகள் இல்லாததும் நீண்டகால குறையாக இருந்து வருகிறது. இந்தக் குறையைப் போக்கும் விதமாக, சில ஏ.சி., படுக்கை வசதிப் பெட்டிகளுக்குப் பதிலாக, கூடுதல் பொதுப் பெட்டிகளை இணைக்க தெற்கு ரயில்வே முடிவு செய்துள்ளது. இது, குறைந்த வருவாய் பிரிவினர், அன்றாடப் பயணிகளின் தேவையை பூர்த்தி செய்யும் நோக்கில் எடுக்கப்பட்ட முக்கிய நடவடிக்கையாகும்.

எந்தெந்த ரயில்களில் மாற்றம்? 

இந்த மாற்றங்கள் செப்டம்பர் முதல் அமலுக்கு வர உள்ளன. இங்கு, எந்தெந்த ரயில்களில், என்ன மாதிரியான மாற்றங்கள் செய்யப்பட உள்ளன என்பது குறித்த விரிவான தகவல்கள் கொடுக்கப்பட்டுள்ளன:

மும்பை - சென்னை எழும்பூர் எக்ஸ்பிரஸ் (வண்டி எண். 22157/22158)

மும்பையிலிருந்து சென்னை எழும்பூர் நோக்கி வரும் ரயில் (22157): செப்டம்பர் 5, 2025 முதல், இந்த ரயிலில் ஒரு 3-ஆம் வகுப்பு ஏ.சி. பெட்டி மற்றும் ஒரு படுக்கை வசதி பெட்டிக்கு மாற்றாக, இரண்டு 2-ஆம் வகுப்பு பொதுப் பெட்டிகள் இணைக்கப்படும். சென்னை எழும்பூரிலிருந்து மும்பை நோக்கிச் செல்லும் ரயில் (22158): செப்டம்பர் 8, 2025 முதல், இந்த மாற்றம் அமலுக்கு வரும்.

சென்னை எழும்பூர் - சேலம் எக்ஸ்பிரஸ் (வண்டி எண். 22154/22153)

சென்னை எழும்பூரிலிருந்து சேலம் நோக்கிச் செல்லும் ரயில் (22154): செப்டம்பர் 6, 2025 முதல், இந்த ரயிலில் ஒரு 3-ஆம் வகுப்பு ஏ.சி. பெட்டி மற்றும் ஒரு படுக்கை வசதி பெட்டிக்கு மாற்றாக, இரண்டு 2-ஆம் வகுப்பு பொதுப் பெட்டிகள் இணைக்கப்படும். சேலத்திலிருந்து சென்னை எழும்பூர் நோக்கி வரும் ரயில் (22153): செப்டம்பர் 7, 2025 முதல், இந்த மாற்றம் அமலுக்கு வரும்.

தாதர் (மகாராஷ்டிரா) - நெல்லை எக்ஸ்பிரஸ் (வண்டி எண். 11021/11022)

தாதரிலிருந்து நெல்லை நோக்கி வரும் ரயில் (11021): செப்டம்பர் 9, 2025 முதல், இந்த ரயிலில் ஒரு படுக்கை வசதிப் பெட்டிக்கு மாற்றாக, ஒரு 2-ஆம் வகுப்பு பொதுப் பெட்டி இணைக்கப்படும். நெல்லையிலிருந்து தாதர் நோக்கிச் செல்லும் ரயில் (11022): செப்டம்பர் 11, 2025 முதல், இந்த மாற்றம் அமலுக்கு வரும்.

இந்த மாற்றங்கள், குறிப்பாக 2-ம் வகுப்பு பொதுப் பெட்டிகளில் ஏற்படும் இடநெரிசலைக் குறைத்து, பயணிகளுக்குச் சவுகரியமான பயணத்தை உறுதிசெய்ய உதவும். நீண்ட தூரப் பயணங்களில், குறைந்த கட்டணத்தில் பயணிக்க விரும்பும் மக்களுக்கு இது பயனுள்ளதாக அமையும்.