தீபாவளிக்கு தமிழகத்தில் கனமழை வாய்ப்பு? வானிலை ஆய்வு மைய தலைவர் அமுதா கூறுவது என்ன?

தென்மண்டல வானிலை ஆய்வு மையத் தலைவர் அமுதா நேற்று வெளியிட்ட அறிவிப்பில், தென்மேற்கு பருவமழை அக்.16-ந் தேதி முதல் 18-ந் தேதிக்குள் இந்திய பகுதிகளில் இருந்து விலகுவதற்கான வாய்ப்புகள் இருப்பதாகக் கூறினார். வளிமண்டல கீழடுக்கில் மேற்கு திசை காற்று, கிழக்கு வடகிழக்கு காற்றாக மாறும்போது, தமிழ்நாடு மற்றும் புதுச்சேரியில் வடகிழக்கு பருவமழை தொடங்கும். அந்த வகையில், 16 முதல் 18-ந் தேதிக்குள் வடகிழக்கு பருவமழை தொடங்குவதற்கான வாய்ப்புகள் உள்ளன. 

பொதுவாக வடகிழக்கு பருவமழைக் காலங்களில் தமிழ்நாட்டில் 44 செ.மீ. மழை பதிவாகும். இந்த ஆண்டு இது 50 செ.மீ. வரை பெய்யக்கூடும் என எதிர்பார்க்கப்படுகிறது. வடமாவட்டங்களில் இயல்பாகவும், இயல்பைவிட அதிகமாகவும் மழை பெய்ய வாய்ப்பு உள்ளது. தென்மாவட்டங்களைப் பொறுத்தவரை இயல்பாகவும், இயல்பைவிட குறைவாகவும் பதிவாக வாய்ப்பு இருக்கிறது. கடந்த 15 ஆண்டுகளில் பெரும்பாலான ஆண்டுகள் இயல்பைவிட அதிகமாகவும், 2 ஆண்டுகள் இயல்பைவிட குறைவாகவும் வடகிழக்கு பருவமழை பெய்திருக்கிறது.

தீபாவளி தினத்தன்று மழை இருக்குமா?

வடகிழக்கு பருவமழைக் காலத்திலேயே வரும் தீபாவளி பண்டிகையின் போது மழை இருக்குமா? என்ற கேள்விக்கு, வானிலை ஆய்வு மையம் மற்றும் தனியார் வானிலை ஆய்வாளர்கள் வெவ்வேறு கருத்துக்களைத் தெரிவித்துள்ளனர். தீபாவளி பண்டிகை 20-ந் தேதி (திங்கட்கிழமை) கொண்டாடப்பட உள்ளது. 5 நாட்களுக்கு முன் கூட்டிய கணிப்பில் மட்டுமே மழையைப் பற்றிச் சரியாகக் கூற முடியும் என்பதால், இப்போதைக்கு உறுதியாகச் சொல்ல முடியாது என்று தென்மண்டல வானிலை ஆய்வு மைய தலைவர் அமுதா கூறி உள்ளார். சில இடங்களில் காற்றின் வேகம் அதிகரித்து காணப்படும் என்றும், காற்றழுத்த தாழ்வு நிலை உருவாகும் பட்சத்தில் காற்றின் வேகம் இன்னும் அதிகரிக்கக் கூடும் என்றார்.

இதனிடையே, தமிழ்நாடு வெதர்மேன் பிரதீப் ஜான் தனது எக்ஸ் தளப் பக்கத்தில், அக்டோபர் 20-ந் தேதி கனமழைக்கு வாய்ப்பு இருப்பதாகப் பதிவிட்டுள்ளார். குறிப்பாக, 17 முதல் 21-ந் தேதிக்கு இடையில் காற்று சுழற்சி காரணமாக வட தமிழ்நாட்டில் மழைக்கான சூழல் இருப்பதாகக் கூறியுள்ளார். 2011-ம் ஆண்டு அக்டோபர் 26-ந் தேதி தீபாவளி தினத்தில் கனமழை கொட்டியதை அவர் சுட்டிக்காட்டினார்.

டெல்டா வெதர்மேன் ஹேமச்சந்தர் தீபாவளி பண்டிகையையொட்டி வியாபாரிகளைப் பாதிக்கும் அளவுக்கு கனமழைக்கு வாய்ப்பு குறைவுதான் என்றும், என்றாலும் ஓரிரு இடங்களில் கனமழையோ அல்லது இடி மின்னலுடன் வெப்பச்சலன மழையோ பெய்ய வாய்ப்பு உள்ளதாகவும் தெரிவித்தார். கடந்த 20 ஆண்டுகளில் 2011-ம் ஆண்டில் மட்டும் தீபாவளி தினத்தில் கனமழை பெய்துள்ளது குறிப்பிடத்தக்கது.